|
Post by Tanweer on Jun 2, 2007 13:56:17 GMT 5
Mohabat….. rang nasal firqa’ haysiyat…. En sab say buland hoti hay…. Es ka nasha kisi par bhi aur kabhi bhi charh sakta hay aur asia charhta hay k phir utarnay ka naam nahi leta- Zair-e-nazar tareekhi kahani bhi aik daastan-e-mohabat hay jab aik adna kaneez k hosh o hawas par mohabat nay qabza kar kay usay farzangi say deewangi ki rahon par dhakel diya-Os ka matloob os ka mehboob os k samnay tha magar oski rasaee say bahir… wo osko dekh saakti thee magar osay mehsoos karnay ki esay ijazat na thee- Mehboob es qadar qareeb ho magar anjanay faslay es ka rasta rokay hon to kaisi kaisi qaimatien barpa hoti hon gi….. mohabat ki esi afsoon gari k sacha ehwal Sukhanwar ki nazar kiya ja raha hay …. Mughliya dor ki akaas es dastan-e-gul-o-rang main mahalati sazishon say lay kar husan o ishq tak k waqiyaat shamil hain….[/i][/color]
************************************************** NOTE: masiwaey Jumatul mobarik har roz es ki qist pesh ki jaey gi. **************************************************
Wo teesra din tha- moosla dhar barish na khatam ho rahi thi’ na kam ho rahi thi aur na he zara dam lay rahi thi- siyah badal jaisay saf bandhay hoovay the- ooper talay chalay aa rahay the- darya-e-jamna pehlay din seraab hova- doosray din laba lab hova- phir teesray din to chalaknay hi laga tha-
Barish yoon moun zor na hoti to bagh-e-gul afshan k ghanay darakhton main jhoolay paray hotay- baigmaat apni saheliyon k sang rang barangay malboosat main jhoolti hovi’ aanchal urati hovi qehqahay lagati rehtien- aisay waqat khoobsurat kaneezien sawan k geet gati theen aur raqs karti hoovi apnay apnay lehngon k daeray banati chali jati theen-
Fil waqat ye silsala nahi raha tha- bagh-e-gul afshan ki haryali udaas thi- ghanay darakhton ki dali dali aur patay patay say dharon aansoo beh rahay the- Wali ehad shehzada Humayun apni wasee-o-areez khawab gaah main bistar-e-alalat par para hova tha- aik asi (80) sala tajarbay kar peer tabeeb ki ungliyaan beemar ki nabz par theen aur nabz thee k lamha ba lamha alwida kehnay ki dhamkiyan day rahi thi-
Shehzaday ki walida Maham begam kabhi betay k sarhanay aa kar duaien maang rahi thi’ kabhi paenati pohanch kar ronay lagti thi- magar aab aisa waqat aa para the k jan day kar bhi oski jan nahi bacha sakti thi- aasar bata rahay the k os k saath ziyadah door tak nahi ja sakay gi- sirf dawa say lay kar dua tak ka safar reh gaya tha-
Bagh-e-gul afshan ki imarat k aik kamray main entehaee tajrabay kar atibaa ka ijlaas jari tha- wo aapas main behas kar rahay the- kabhi kisi k mashwaray ko maan rahay the’ kabhi kisi k mashwaray ko rad kar rahay the- shehzaday k liey aik hatmi moaasar dawa tajweez kar rahay the’ phir etefaq-e-raey say jo mojaweza dawa hoti thi osay shehzahday par azmaya jata tha- phichlay do dino say yehi silsala jari tha- lekin maraz main aafaqa nahi ho raha ho raha tha- mareez nay subah say aankhien band kar le theen- es qadar niqahat thi k palkien nahi utha raha tha-
Ye ajeeb duniya hay- jahan matam hota hay’ wahan khushiyan bhi hoti hain- esi imarat ki chath k neechay haram ki char deewari main khushiyon ka mela laga hoova tha- wahan hazrat badshah Babar ki dosri beewiyan yaani shehzada Humayun ki soteli maaien bhi theen- en k dil say duaien nikal rahi theen k Humayun Allah ko piyara ho jaey- os k baad hazrat badshah Babar ka janasheen en main say kisi ka beta ho sakta tha- wahan har maa ki yehi aarzoo thi- wo sab apnay apnay betay k sar par badshahat ka taj dekhna chahti theen.
Takhat agarchay sonay chandi ka hota hay’ heeray jawaheraat say murasaa hota hay. lekin es par qabza jamaey rakhnay k liey sari zindagi mukhalefeen say jang larni parti hay. Bahir har simat say dushmano ki yalghaar hoti rehti hay aur os say ziyadah androon-e-khana jang jari rehti hay.
Wo sonay chandi ka takhat jo heeray jawaheraat say murasaa hota hay. Os main apno k kantay chubhtay rehtay hain. Kabhi sokanien aik doosray k khilaf sazishaien karti hain. Kabhi soteli maaien aik doosray ki olaad k liey zehar ugalti rehti hain. Kabhi beta baap ki garden utaar kar takhat par baithta hay. Kabhi bhaee apnay bhaee kay lahoo main naha kar surkhuru ho jata hay.
Bagh-e-afshan ka mahol bhi kuch aisa hi tha. Wahan ka manzar bhi bari dhaki chuhpi aur napi tuli khana jangi pesh kar raha tha. Hazrat badshah Babar ka rob aur dabdaba es qadar tha k baigmaat khul kar aik doosray ki mukhalfat nahi karti theen. Lekin dar pardah mukhalfana karwaiyan karnay say baz nahi aati theen. Doosri begmaat apni sokan Maham begam say khul kar ye nahi keh sakti theen k tera Humayun kafi arsay tak hazrat badshah ka ladla reh chukka hay’ aab esay mar janay day aur Allah karay mar he jaey. Es k baad hamaray betay ko janashini milay ge.
Wo na to galiyan day rahi theen. Na kos rahi theen. Bazahir oski sehat yabi k liey haath utha rahi theen magar duaoun k bajaey baduaien day rahi theen.
Maham begam nay sirf aik beta Humayun paida kiya tha. Babar ki doosri biwi Gul Rukh begam nay paanch betay paida kiey the. Kamran Mirza’ Askari Mirza’ Shah Rukh’ Ahmed aur Gulzar. Ye aakhri teen betay bachpan he main mar gaey the. Kamran Mirza bara beta tha. Ye tawaqo thi k Humayun na raha to Gul Rukh begam k betay Kamran Mirza ko takhat-o-taj milay ga.
Babar ki aik aur biwi Dildar begam thi, os nay do beyton ko janam diya tha, on main say aik mar gaya tha, doosra Hindustan main paida hoova tha. Es liey osay Hindal k nam say pukara jata tha. Dildar begam ki soch ye thi k pehlay Humayun lurakh jaey os k baad Kamran Mirza takhat nasheen ho ga to baad main os say nimat liya jaey ga. Keunkay Dildar begam aur Gul Rukh begam ki manzil aik thi’ maqsad aik tha. Es liey wo dono aik ho gae theen. Unho nay aik bohat he phonchay hovay aamil say rajoo kiya tha’ osay pachaas hazar sika raej ul waqat diya tha. Es k ewaz aamil nay aik taweez likh detay hoovay kaha “ aap kisi bhi tarah es taweez ko beemar shehzaday k takeay k neechay rakh dain’ ye jald he apna asar dikhaey ga”.
(Jari hay ................................Baqi kal …… )
|
|
|
Post by Rafi Tabasum on Jun 3, 2007 5:52:30 GMT 5
wah
|
|
|
Post by Tanweer on Jun 3, 2007 13:47:25 GMT 5
(Qist # 02)[/i]
Aik begam nay kaha “ye to bili k galay main ghanti bandhnay wali baat hovi- Humayun k kamray main kon jaey ga ? kon esay es k takeay k neechay esay rakhay ga ?” Doosri nay kaha “Maham begam apnay betay k paas saanp ban kar bethi rehti hain- Humayun k liey khana to door ki baat hay dawa bhi aati hay to pehlay khud chakhti hain, es k baad betay k moon tak phonchanay deti hain-“
Wo dono tadbeerien sochnay lagien- aamil nay baray daway say kaha tha “taweez zood asar hay- agar esay takeay k neechay na rakha ja sakay to es k paenati rakh diya jaey- bas itna ho k wo taweez beemar k qareeb rahay-“
Gul Rukh begam aur Dildar begam nay sar jor kar socha “haram main jo kanezien hain wo shehzaday ki moon charhi hain- hamaray kam nahi aaien gi- ulta bhed khol dain gi-“
Wasee-o-areez imarat k farsh par jharoo denay aur wahan ki safaee karnay k liey kisi bhangan ko anay ki ijazat nahi thi- es kaam k liey sharif magar ghareeb khandan ki larkiyoon ko rakha jata tha-
Gul Rukh begam nay kaha- “en larkiyoon ki lagi bandhi tankhah hoti hay- bohat ghareeb aur zaroorat mand hoti hain- enhien ziyadah raqam ka lalach diya jaey ga to en main say koi hamara kaam kar guzray gi-“
Dildar begam nay kaha-“job hi karna hay’ jaldi karien- hazrat badshah ko betay k alalat ki etelaa bhej di gaee hay- wo apnay sahibzaday ko bohat aziz rakhtay hain- ye khabar suntay he doray chalay aaien gay-“
Gul begam nay kaha “fikar na karien – darya charha hoova hay- lehrien moon zor hain- aisee surat main kashtiyaan nahi dali jaien gi- hazrat badshah itni jaldi yahan tak pohanch nahi paien gay- hamari nazar main aik mulazima hay ….. “
Dildar begam nay esay sawaliya nazroon say dekha phir poocha “kiya yahien gul afshan main hay?“
Os nay asbaat main sar hila kar kaha “haan- es ka naam Akhtari hay- es nay kal he hamari hamdardi pa kar apna dukhra sunaya tha- es ka baap daaemi mareez hay- bhaee nasha karta hay- kamanay wala koi nahi hay aur kisi ko e ski shadi ki fikar nahi hay-“
Phir Gul Rukh nay hanstay hoovay kaha “kam bakhat choda baras ki hay aur abhi say shadi ki fikar ho gaee hay- agar ham esay ziyadah say ziyadah raqam dain gay to wo aik dulha khareednay k lalach main hamara kaam zaroor karay gi-“
Dildar begam nay kaha “Maham begam esay betay k kamray main sagee k liey bulati hain- ham nay dekha hay- jab take say andar nahi bulaya jata’ wo darwazay say lagi bethi rehti ha- es beemar k liey duaien mangti rehti hay-“
Ye jo khadmaien aur kanezien hoti hain- ye hamari salamti k liey sirf es liey duaien mangti hain k enhien ham say rozi’ roti milti hay- warna Akhtari jaisi khadmah ko shehzaday say kon se dolat mil janay wali hay k woe s k darwazay par dil say duaien mangti rehti hay-“
Gul Rukh begam nay esi waqat Akhtari ko talab kiya- wo foran he hazir ho gae- enhien salam kar k baray adab say sar jhuka kar khari ho gae- Gul Rukh nay kaha- “kal tom nay apna dukhra sunaya tha ham tom say bohat mutasir hain- tomharay kaam aana chahtay hain- itni dolat dena chahtay hain k tomhari poori zindagi sanwar jaey-“
Wo khush ho kar boli- “khuda nay aap ko darya dili atta ki hay- meri dua hay’ khuda aap ko aur naiki day- main aap ki aur aap k sahibzadon ki lambi omar k liey hamesha duaien mangti rahoon gi-“
“Ham tomharay liey naiki kar rahay hain- tom hamaray liey kiya kar sakti ho?” aap jo hukam dain gi’ e ski tameel karoon gi- angaroon par chalnay ko kehien gi to chal kar dikhaoon gi-“
“Tomhein angaroon par nahi chalna hay- hamari aur hamaray sahibzadoon ki salamti k liey Maham begam k khilaaf kuch karna hay-“
Akhtari nay aik dam say chonk kar sar uthaya- ghabra kar dono begmaat kok dekha- Dildar begam nay poocha- “kiya hoova ? dar gaien … ?”
Wo jaldi say inkar main sar hila kar boli- “nan-nahi… haan- mm- magar aap to janti hain Maham begam kitni zalim hain? Mujhay apnay khilaf kuch kartay hoovay pakar liya to kharay kharay meri khal utarwa dain gi-“
Gul begam nay kaha- “kaam itna aasan hay k Maham begam ko khabar nahi ho gi- jab hamara kaam kar rahi ho to ye keon nahi samajtien k ham tomhien tahafuz bhi dain gay- tom par koi aanch nahi anay dain gay-“
Gul Rukh apni jagah say uth kar ahista ahista chalti hovi os k qareeb aaee- phir boli- “tom nahi jantien k tomhien kitnay inam-o-ikraam say nawaza jaey ga? Humayun k baad fhamaray betay Kamran Mirza ko takhat-o-taj milay ga- jis din wo takhat nasheen ho ga’ esi din tomhien itni bari jageer atta ki jaey gi k tomhari olaad ki olaadien bhi aish-o-ishrat k saath zindagi guzarti rahien gi-“
Akhtari buri tarah sehmi hoovi thi- magar en begamaat ko ye taasur nahi dena chahti thi k khofzada ho kar en ka kaam nahi karay gi- wo boli- “meray baba kehtay hain’ bohat kuch panay k liey bohat si mosibaton say guzarna parta hay- lekin aap k saey main reh kar omeed hay’ mujh par koi mosibat nahi aaey gi-“
Dildar begam nay kaha- “shabaash! Tom hamara dil khush kar rahi ho-“
Os nay poocha- “mujhay kiya karna ho ga?”
(Jari hay ………………… Baqi kal )
|
|
|
Post by Rafi Tabasum on Jun 3, 2007 15:23:51 GMT 5
aik dafa phir wah jari rakhaiay achi kahani hay Tanweer bhai
|
|
|
Post by Sukhanwar on Jun 3, 2007 16:13:41 GMT 5
tanwee bhai bohat dilchasp kahani hy aap ka shukar guzaar hoon k aap ny aik tareekhi waaqiay ko sukhanwar ki zeenat bana kar is bazm k araakeen ko dilchasp tehreer parhnay ko dee aap yeh daastan jaari rakhiay yaqeenan araakeen ko pasand aay gee aur is main dilchaspi barhti rahay gi thanx razi
|
|
|
Post by Tanweer on Jun 3, 2007 17:17:31 GMT 5
Tabbasum bhaee aur Razi bhaee!
aap dono hazraat ka kahani main dilchaspi ka shukriya, aur Tabbasum bhaee apki bay sakhta "WAH" ka bhi shukriya...
inshallah ye silsala jari rahay ga, aap sab ka taawon aur dua chahiey.
Tanweer
|
|
|
Post by azeezbelgaumi on Jun 3, 2007 17:31:43 GMT 5
Kya kahne Tanweer bhai..... Keep it up. azeez belgaumi
|
|
|
Post by Tanweer on Jun 3, 2007 21:15:47 GMT 5
(Qist # 3)
Gul Rukh nay apnay grebaan say aik chota sa teh shuda kaghaz nikal kar kaha- “ye taweez hay- esy Humayun k takeay k ya bistar k neechay chupana hay- bas es say ziyadah tomhien kuch nahi karna ho ga-“
Dildar nay kaha- “ye jan jokham ka kaam nahi hay- sirf hoshyari ka hay- tom Maham begam say say nazrien bacha kar aisa kar sako gi-“ Akhtari nay asbat main sar hilla kar apnay dono haath yoon phelaey’ jaisay kheraat lay rahi ho- Gul Rukh nay o ski hateli par wo taweez rakhtay hoovay kaha- “esay foran chupa lo- aaj ye nanha sa kaghaz ka tukra day rahay hain- kal es hateli par aik bohat bari jageer ka parwana ho ga-“
Es nay es nanhay say kaghaz ko dono hathon main daba liya- peshani say laga kar haath jornay k andaz main kaha- “aap ka hukam sar aankhon par- main apnay baba ki ye batien aazmaoon gi k masaib say guzarnay k baad he rahatien milti hain-“
Os nay es taweez ko apnay greban main chupa liya- Dildar nay kaha- “ye kam aaj he hona chahiey- balkay abhi hona chahiey-“ wo boli “gharyali chaar bajata hay’ tab malika begam mujhay andar bulati hain- main osi waqat ye kam kar sakon gi-“
Theek hay tom ja sakti ho- ye yaad rakhna’ tom par kari nazar rakhi jaey gi- kaam bohat aasan hay- kar guzro gi to hamari jaisi begmaat ki tarah aish-o-ishrat ki zindagi guzarti raho gi-“
Wo sar jhukaey ultay qadmon chalti hovi es kamray say bahir aa gae- es imarat k peechay khadmaoun ki rihaish k liey chohti chohti kothariyan bane gae theen- Akhtari ko halat nay asiay mor par phoncha diya tha’ jahan wo heran thi’ preshan thi’ buri tarah uljhi hovi thee- es nay apni kothri main aa kar darwazay ko andar say band kiya- phir dharaktay hovay dil par haath rakh liya- es dil k pas wo nanha sa taweez bhi tha aur es k dil andar shehzada Humayun bhi dharak raha tha-
Wo larki nadaan thi- dil k moamalay nay esay aqal say khali kar diya tha- wo zarah ho kar aftaab tak phonchna chahti thee- khud nahi janti thee k es ka dil keoun shehzaday ki taraf khincha chala jata hay? Es mamooli si chokri k andar ye khawhish machalti rehti thi k bas aik baar dor kar jaey aur shehzaday k wajood say lipat jaey-
Aksar dil ki tamanaie pagal hoti hain- aqal say inka koi wasta nahi rehta- ye samajtay hovay bhik paoun ki joti kabhi sar par nahi rakhi jati’ wo tasawor main shehzaday ko sar karti rehti thi- sochti thi –“agar main joti hoon to joti he rahon gi- kabhi sar nahi charhon gi- paoun talay he rahon gi- magar wo paoun meray shehzaday k hoon aur kisi k na hoon“
Es nay dharaktay hoovay dil par haath rakha- e ski hateli k neechay jaisay taweez nahi tha’ paraya khanjar tha aur ye khanjar apnay dil ko katnay k liey diya gaya tha- “ haey…..! ye mujhay kis azmaaish main mubtila kiya ja rraha hay? Ye to tay hay k apni jan day doon gi magar apnay mehboob ki jan nahi loon gi- lekin eska doosra pehloo bohat he bhayanak hay- agar main nay begmaat k ehkamaat ki tameel na ki to ye darpardah bohat buri tarah enteqam lein gi- apnay karindon k zareeay meray ghar ko aag laga dain gi- meray apno ko nayzon par charha dain gi- main ye ilzam nahi day sakon gi k wo begmaat meray zareay itni bari sazish kar rahi hain- chohta moon bari baat… koi meri baat ka yaqeen nahi karay ga-
Wo bari dair tak band darwazay say lagi khari rahi- kabhi tehalti rahi’ kabhi baithti rahi aur sochti rahi’ esay kiya karna chahiey…. ? phir aqal nay samjhaya- “aisa kaam karo k shehzada salamat rahay aur begmaat ka hukam bhi poora ho jaey-“
Ws nay greban main haath daal kar os taweez ko nikala- os ka kaghaz zafraani rang ka tha- es nay osay khola to andar aik aur the shuda kaghaz tha- osay khol kar dekha- wahan kuch aari tirchi lakeerian khinchi hovi theen- har goshay par chand haroof likhay gaey the aur darmiyan main chand adaad darj the- wo thori dair tak enhain dekhti- sochti rahi phir apni jagah say uth gae-
Es ki charpaee k pas he aik chohta sa sandooq rakha hova tha- os main es k kapray aur kuch zaroori cheezien rakhi rehti theen- os nay sandooq ko khola aur es thereer shuda kaghaz ko apnay kaproun k neechay chupa diya- phir esi size ka sada kaghaz teh kar k zafraani rang k kaghaz mein lapait diya- esay taweez ki shakal de aur apnay greban main chupa liya-
Chand ghariyan guzarnay k baad wo shehzaday ki khawab gah k pas aaee to Gul Rukh ki aik razdar kaneez nay aa kar chupkay say kaha- “tomhien begam sahiba nay talab kiya hay-“
Wo kaneez k saath aik kamray main aa gaee- wahan Gul Rukh begam aur Dildar begam es ki muntazir theen- onho nay kaneez ko wahan say janay ka hukam diya- jab wo chali gaee to Gul Rukh nay kaha- “abhi kuch saatien guzartay he gharyali char bajaey ga aur tomhienbulaya jaey ga-“
Wo boli main poori tarah mustaid hoon- aap ka kaam zaroor karoon gi- mujhay apni zindagi sanwarni hay- aap ka kaam har hal main ho ga-“
Dildar nay poocha – “wo taweez kahan hay?”
Os nay foran os taweez ko nikal kar enhien dikhaya phir osay andar rakhtay hovay kaha- “main nay esay jan say ziyaadah sambhal kar rakha hay- ye kaam asaan honay k bawajood andayshon say bharpor hay- kuch bhi ho sakta hay- aap apni kamyabi k liey duaien karti rahien- wo duaien mujhay bhi lagti rahien aur main Maham begam ki nazron main nahi aaoun gi-“
Wo en say rukhsat ho kar shehzaday ki khawabgah ki taraf aaee- os waqat gharyali chaar baja raha tha- Maham begam band darwazay k peechay thi- os nay hukam diya k Akhtari ko safaee k liey andar bhej diya jaey-
Os nay morchal wali aik bari si jharo le- asphanj ka aik bara sa tukra uthaya phir pani say bhari hovi balti utha kar kamray main aa gaee- wo pehlay jharo dayti thi- phir asphanj ko pani main bhigo kar pooray farash ko ragar ragar kar saaf karti thi- garmi aur barsat k mosam main qaleen hata diey jatay the takay thandak rahay- phir mosam-e-sarma main dobara qaleen bicha diey jatay the-
Beemar shehzada bistar par aunkhien band kiey para tha- Maham begam sarhanay baithi kalam-e-pak ki aayatien parh rahi thi- Akhtari farash par jharo day rahi thi aur chor nazron say Humayun ko dekhti thi phir malika begam k khouf say safaee main lag jati thee-
(Jari hay ……….. Baqi kal......)[/i][/color]
|
|
|
Post by Rafi Tabasum on Jun 3, 2007 23:08:40 GMT 5
bohat khoob
|
|
|
Post by Tanweer on Jun 4, 2007 16:11:28 GMT 5
(Qist # 4)
Osay jharo lagatay waqat shehzaday k bistar k charon taraf ghomna parta tha- phir asfanj say farash ko ragartay waqat bhi wo apnay mehboob ka tawaf karti rehti thi- dil dharak dharak kar kehta tha- “ye kaisa pagal pan hay …. ? amma kehti hay’ jab main bachi thi to haath utha kar chaand ko maanga karti thi- shaid kabhi duaoun say wo chaand mil jata- lekin zamin ka ye aftab kaisay milay ga ?”
Os nay Humayun k paenati pohanch kar Maham begam ko dekha- wo sar jhukaey pharnay main masroof thi- os nay foran he es teh kiey hovay khokalay taweez ko makhmali bistar k neechay chupa diya- Humayum ka paoun qareeb he tha- dil machalnay laga k isay aik zara sa chHoo lay- aisay he waqat Maham begam nay betay par phonknay k liey sar uthaya to wo jaldi say asfanj ko tham kar farash ki safaee karnay lagi-
“Haey …. ! kitnay qareeb phonach kar kitni door ho gae hoon? Meray mehboob! Meray matloob! Ye mujhay kiya ho jata hay? Tomhein dekhtay he nasha pukarnay lagta hay- main madhosh ho jati hoon- meri aarzooien kehti hain’ tomhien chHoo loon to saroor tari ho jaey ga- pakar loon to jaisay kaenaat ki kalaee haath aa jaey gi aur jakar loon to tomharay wajood ki jakarbandiyon main mera wajood gom hota chala jaey ga… “
wo kaam poora kar k khawabgah say bahir aa gaee- thori dair baad Gul Rukh nay phir isay talab kiya- wo en k samnay hazir ho kar apnay khali hathon ko phelatay hoovay boli- “kaam ho chuka hay- main nay os taweez ko sahib-e-alam k bistar k neechay chupa diya hay-“
Dildar begam nay kaha- “filhal tom par bharosa karna ho ga- agar hamara maqsad poora nahi ho ga to ye samajh liya jaey ga k tom nay hamara kaam nahi kiya hay-“
Akhtari andar say sehmi hovi thi- bari khamoshi say en ki batien sun rahi thi- Gul begam nay kaha- “tomhari sachai aur wafadari k sabot hamien os waqat milien gay- jab taweez apna asar dikhaey ga aur wo beemar es duniya say kooch kar jaey ga- agar aisa na hova to tom apnay buray anjam k liey tiyar rehna-“ wo buray anjam say darnay wali nahi thi- bas ye andesha the k shehzaday k kaam aanay k bawajood os beemar k saath kuch bhi ho sakta hay- wo boli- “aik arz karna chahti hoon-“
Gul Rukh nay sar hilatay hovay kaha- “Hoon…”
Wo boli- “baray baray aamil hazraat say bhi ghalatiyaan hoti hain- koi hamesha kamyab nahi rehta- kabhi kabhi en k taweez ganday bay-asar bhi ho jatay hain-“
Durust kehti ho- agar beemar sehatyab ho kar wo bistar chohray ga to os ki khawab gah kabhi na kabhi khali ho gi- aisay waqat hamari wafadar kaneez wahan jaey gi aur os k bistar k neechay dekhay gi k wo taweez mojod hay ya nahi? Agar mojod ho ga to ye wazeh ho jaey ga k tom nay apna kaam diyaanatdari say kiya hay aur os aamil nay aik bay-asar taweez diya hay- phir os aamil say nimat liya jaey ga-“
Aisay he waqat bahir shor buland hova k hazrat badshah Babar tashreef la rahay hain- wo sab apnay kamray say nikal kar wasee-o-areez rahdari main aa gaien- imarat k andar aur bahir khawaja sara nangi talwarien liey pehraydari k faraez anjam daytay rehtay the- aik khawja sara nay Maham begam k samnay hazir ho kar ghutnay tektay hovay kaha- “ Malika begam ka iqbal buland ho- hazrat badshah nay darya aboor kar liya hay- hazoor-e-aala kisi bhi saa’at main yahan tashreef lanay walay hain-“
Bahir barish ka zor kuch kam ho gaya tha- beshumar musalah sipahee jamna k sahil say bagh-e-afshan ki imarat tak do safoun main kharay ho gaey the- Babar kashti say utar kar tezi say chalta hova musalah siphaiyon k darmiyan say guzarta hova imarat k andar aa gaya-
Gul Rukh begam aur Dildar begam es k esteqbal k liey rahdari main khari theen- onho nay adaab-e-shahi k mutabiq os ki tazeem ki’ osay salam kiya- wo betay ki alalat say bohat preshan tha- os nay jabran muskuratay hovay kaha- “Gul Rukh aur Dildar aap apnay sahibzadon ko chor kar hamaray beemar Humayun ki iyaadat k liey aaee hain- ye dekh kar khushi ho rahi hay- ham kuch waqat aap dono k saath guzarien gay- abhi rasta chohr dain-“
Wo foran he aik taraf ho gaien- wo tez tez qadam uthata hova aagay barhnay laga- samnay khawab gah k khulay hovay darwazay par Maham begam khari aansoo baha rahi thi- wo boli- “ham adaab-e-shahi nahi jantay- en lamhat main sirf apnay betay ki maa hain-“
Babar os k shanay ko thapak kar tezi say chalta hova khawab gah main dakhil hova- jawan’ qad aawar pahar jaisay betay ko bistar-e-alalat par dekh kar aik dam say tarap gaya- jhuk kar peshani ko bosa daytay hovay bola- “Babar ki jan! aunkhien kholo- aik badshah’ baap ki zaban say duaien mangta hova tomharay pas aya hay- aunkhien kholo- baap ko hosla do k tom masa-ib aur beemariyon say larna jantay ho-“
Maham begam nay peechay say kaha- “baap ki awaz betay k kano tak nahi pohanch rahi hay- subah say es ki aunkhien band hain- hamara laal…. Hamaray jigar ka tukra neem behoshi ki halat main hay-‘
(Jari hay ………………. Baqi kal…)
|
|
|
Post by Rafi Tabasum on Jun 4, 2007 23:10:51 GMT 5
kahani theek ja rahi hay Tanweer sahib
|
|
|
Post by Tanweer on Jun 5, 2007 11:58:40 GMT 5
(Qist # 5)
Babar nay palat kar garajdar awaz main poocha- “tabeeb hazraat kiya kar rahay hain? enhay foran hazir kiya jaey-“
Maham begam nay kaha- “ab yahan aa kar ghusa dikha rahay hain- ham nay beemari ki khabar kal bheji thi aur aaj tashreef la rahay hain- aap ko hamaray betay say kiya mohabat ho sakti hay? Aap k to dosri begmaat say kae betay hain- khuda na khawasta hamaray laal ko kuch ho gaya to aap ka kuch nahi jaey ga- hamari kookh jal jaey gi-“
“khudara malika! Aisee batein na karien- aap achi tarah janti’ Humayun hamien apni jan say ziyadah aziz hay- ham bohat pehlay elaan kar chukay hain- ye hamara wali ehad hay- hamaray takhat-o-taj ka janasheen hay- magar aap maa ki mamta kay agay bap ki mohabat aur shafqat ko bhool rahi hain… behtar hay’ haram main jaien- yahan tabeeb hazraat anay walay hain-“
wo sar jhuka kar aansoo ponchti hovi wahan say chali gae- thori dair baad kaee atibaa’ mosheer hazraat aur wo umraa tashreef lay aey jo mushkil halaat main Babar ka saath diya kartay the- os nay tamam tabeeb hazraat ko ghusay say dekhtay hovay poocha- “ye hamaray wali ehad k saath kiya ho raha hay? Kiya aap k pas aisi koi dawa nahi hay jo hamaray betay ko aunkhien kholnay’ kuch bolnay aur sun^nay ki tawanaee day sakay?”
Aik tabeeb nay kaha- “ham bharpor koshish kar rahay hain- apni tibi zindagi k tamam tajarbaat ko aazma rahay hain- magar khuda he behtar janta hay k hamari tadbeerien aur dawaien bay asar keoun ho rahi hain?”
Os nay garaj kar poocha- “kiya ham samajh lien k shehzaday ka maraz la-elaaj hay? Pooray Hindustan main koi aisa maseeha’ koi aisa muaalij nahi hay jo hamaray betay ka elaaj kar sakay?”
Aik mosheer Mir Abu-Al-Baqa nay arz kiya- “hamaray aaba-o-ajdaad nay bataya hay’ jab atibaa elaaj say aajiz ho rahay hon’ koi dawa asar na kar rahi ho’ tamam tadbeerien nakaam ho rahi hon to en halaat main sadaqah diya jaey-“
Doosray nay taeed ki- “bay shak- jab insaani aloom say estefaza na ho sakay’ koi hikamt-e-amli kaam na aey to aisay waqat sadaqah aur duaien….. ye do he cheezien kaam aati hain-“
Babar nay kaha- “ham apnay betay ki sehat yabi aur taweel umri k liey apna sab kuch qurban kar saktay hain- hamien mashwara diya jaey’ es silsalay main kiya karna chahiey?”
Aik nay kaha- “apna qeemati maal sadaqay k tor par day dena chahiey-“
Doosray mosheer nay kaha- “hazrat badshah ka iqbal buland ho- Gawaliyar k raja Bikarmajeet ki badshah Ibrahim k saath jang hovi thi- wo es jang main maray gaey the- en k adamiyon nay shehzada Humayun ko nazranay k tor par aik heera pesh kiya tha- os heeray ka wazan aath misqaal hay- johariyon ka mutafiqa biyan hay k es heeray ki qeemat tamam duniya ki aik din ki amadani k barabar hay- aap es heeray ka sadaqah day saktay hain-“
Babar nay inkar main sar hila kar kaha- “wo heera Humayun ko diya gaya tha- wo os ki malkiyat hay- hamien apni koi qeemati cheez sadaqay k tor par deni chahiey-“
Wo palat kar betay k pas ayaa- wo aunkhien band kiey bayhis-o-harkat para hova tha- esay aisi halat main dekh kar dil tezi say dharknay laga- wo betay k sar par haath phertay hovay bola- “sari duniya k maal aur takhat-o-taj ki kiya oqaat hay? Hamaray Humayun ka badal sirf yehi hay k ham khud ko os par fida kar dain-“
Tamam hazereen nay preshan ho kar Babar ko dekha- aik ameer nay kaha- “Hindustan main mughal saltanat qaem ho chuki hay- sultanat ki baqa k liey aur shehzada Humayun ki sarparasti k liey aap ki zindagi bohat aaham hay- aap ko salamat rehna hay- insha Allah …. Hamaray sahib-e-alam jald he shifa paien gay- aap k saey main aur aap ki sarparasti main apni tabaee omar ko pohanchien gay-“
Babar nay dono haath utha kar kaha- “bas agay kuch na kaha jaey- hamaray seenay main folaad ka dil hay’ magar ye dil betay k liey bohat kamzor ho chuka hay- ye subah say aunkhien band kiey baybasi say yon para hova hay jaisay koi pursan-e-hal na ho- koi tabeeb es ka elaaj nahi kar pa raha hay- ham say es ki baycheni dekhi nahi ja rahi- ye hamara akhari faisla hay- ham apni jan ka sadaqah dain gay- aap hazraat tashreef lay ja saktay hain-“
(Jari hay ………………. Baqi kal.……)
|
|
|
Post by Rafi Tabasum on Jun 6, 2007 6:31:24 GMT 5
acha silsla ja raha hay Tanweer bhai
|
|
|
Post by Tanweer on Jun 6, 2007 16:36:55 GMT 5
acha silsla ja raha hay Tanweer bhai Nawazish hay aapki Tabasum bhaee! Shukriya Tanweer
|
|
|
Post by Tanweer on Jun 6, 2007 16:38:50 GMT 5
(Qist # 6)
Onho nain hukam ki tameel ki- sar jhuka kar wahan say chalay gaey- en k jatay he Mahma begam nay aa kar preshani say poocha- “Ye ham kiya sun rahay hain? Aap apni jan ka sadaqah dena chahtay hain?”
“Wo bola aap preshan keoun ho gaien? Kiya aik din hamien jan say nahi jana hay?”
“Wo Allah ki marzi ho gi- aap apni tabaee omar guzar kar jaien gay- lekin waqat-e-muqararah say pehlay jan ka sadaqah dena goya khudkushi karna hay-“
“Sadaqah denay ko khudkushi nahi keh saktay- jab Allah Tallah qabool farmaey ga’ hamari jan k badlay betay ko zindagi day ga to ye sarasar sadqah ho ga’ khudkushi nahi ho gi- bas ab khamosh rahien- ham kisi behas k muthamil nahi hain-“
Os nay palat kar betay ko dekha- phir os k sar par haath phertay hovay kaha- “ham ja rahay hain- namaz say farigh ho kar wapis aaien gay- yahan oud-o-ambar chahtay hain- agarbatiyan bhi sulgaee jaien-“
Ye hukam day kar wo tezi say chalta hova khawabgah say bahir ayaa- wahan do begmaat es ki muntazir theen- Gul Rukh begam nay kaha- “aap badshah hain- mutliq-ul-anaan hain- aap ko apni man mani say koi nahi rok sakta- lekin ham shareek-e-hayat ki hesiyat say shikayat kar sakti hain- faryad kar sakti hain-“
Os nay on dono ko dekha phir poochah- “kiya faryad hay tomahari …. ?”
Dildar begam nay kaha- “aap say guzarish hay’ hamaray beton say insaaf karien-“
“Ham nay na insafi kab ki hay?”
wo boli- “hamara aik jawan beta Hindaal hay-“
Gul Rukh nay kaha- “hamaray do qadawar’ shehzor betay Kamran aur Askari hain- ye sab aap k lahu ka attiya ahin- aap aik betay ki khatir apnay teen beton ko yateem bana dena chahtay hain- ye kahan ka insaaf hay?”
Babar nay kaha- “teen nahi…… char betay yateem hon gay- agar ham Allah ko piyaray ho gaey to Humayun bhi sehatyab ko kar yateem kehlaey ga-“
Dildar nay kaha- “Humayun fakhar karay ga k baap nay os ki khatir jan di aur hamaray beton k sar jhukien gay k aap nay aik ki khatir teen beton ko yateem bana diya-“
Os nay dono begmaat ko gehri sanjeedgi say dekha phir kaha- “har insaan apnay nuqta-e-nazar say aur har rishta apnay jazbati zawiyon say dekhta hay aur samjhta hay- tom dono es waqat maaon ki zaban say bol rahi ho- tomhari mamta keh rahi hay’ teen beton ko koi nuqsaan na phonchay aur aik beemar reh kar es dar-e-fani say kooch kar jaey- tom dono ki mamta salamat rahey aur teesri ki mamta sari omar roti bilakti rahay-“
Wo afsos karnay k andaz main bola- “ye maaien itni khud gharz keon hoti hain? Aik mamta ki laash par apnay beton ki zindagi taameer karna chahti hain- tom dono ye keon nahi sochtien k teeno maaon k betay salamat rahien? Teno ki mamta hansti muskurati rahay-“
Dono begmaat nay chor nazron say aik doosray ko dekha- phir Gul Rukh nay kaha- “ham Humayun k dushman nahi hain- os ki salamati chahtay hain- lekin es k saath he apnay suhaag ki salamati sab say aziz hay-“
“To phir ham say behas na karien- Humayun ki salamati k liey duaien mangti rahien- ham khudkashi karnay nahi’ ibadat karnay ja rahay hain- os mabood ki manajaat karien gay- os ki raza maloom karien gay- kiya wo jan k badlay jan qabool karay ga? Agar qabool karay gato hamien ya tomhein kiya haq phonchta hay k oski qabooliyat say inkaar karien?”
wo koi jawab na day sakien- aik doosray ka moon taknay lagien- Babar apnay makhsoos andaz main chalta hova en k darmiyan say guzarta hova os kamray ki taraf chala gaya jo ibadat k liey makhsoos tha-
(Jari hay ………………. Baqi kal.……)
|
|