|
Post by Tanweer on Jun 18, 2007 16:20:57 GMT 5
(Qist # 17)
Humayun nay aik^dam say chonk kar bay^yaqeeni say osay dekha- wo apnay baap’ dada aur doosray badshahon ki tarah ilm-e-najoom ko manta tha- mukhtalif najoomiyon say mustaqbil k halaat maloom karta rehta tha- aik mahir najoomi nay olaad-e-nareena ki pesh^goee ki thi lekin ye nahi bataya tha k kis khush^naseebbegam say takhat-o-taaj ka waris paida ho ga-
Chaar shadiyaan karnay k baad bhi wo ab tak aik betay ka baap nahi ban paya tha- es liey Akhtari ki baat sun kar yaqeen nahi ho raha tha- os nay poocha- “kiya tom nay hamari aakam madar ko apnay halaat say agaah kiya hay?”
Os nay asbaat main sar hila kar kaha- “main nay zikar kiya tha- onho nay meri janam kundali mujh say li hay- wo apnay najoomiyon say durust maloomaat hasil karna chahti hain-“
Phir to tom hamari walidah majidah k zehan main naqsh ho chuki ho- tomharay jeotashi ki pesh^goee k mutabiq khawh aik raat ki azdawaji zindagi ho ya sari umar ki….. baharhal tom hamaray muqadar main likh di gaee ho-“
“Main kuch arz karna chahti hon-“
“ham sun rahay hain-“
“aap nay farmaya tha’ meri teen khawhishien poori karien gay-“ wo muskura kar bola- “tomhari aik he khawhish hazar khawhishon par bhari par rahi hay- waisay koi aur khawhish ho to bolo- ham waday k mutabiq osay zaroor poora karien gay- bashartekay wo jaiz ho-“
wo boli- “jaiz hay…. Pehlay mujhay aap ki hamsheera (Gul Badan Begam) ki khidmat par mamoor kiya gaya tha- wahan main nay aapko pehli baar door he say dekha tha- main nahi janti’ aap main kaisi kashish hay? Bas main khinchti chali gaee- phir aap ki walidah majidah malika begam mujhay yahan lay aaien- yahan main nay kaee baar apko dekha aur har baar meray andar ye khawhish machalti rahi k aap ko aik baar ….. sirf aik baar chooh loon…..”
wo khush ho kar bola- “kiya waaqi…? Sirf choohnay ki khawhish machalti rahi?”
os nay asbaat main sar hil kar kaha- “fil^waqat meri yehi khawhish hay- main aap ko zara chooh lena chahti hon-“
wo hanstay hovay bola- “ba^Khuda… ham bohat khush hovay- aao- hamien chooh lo…..”
Akhtari nay jhuki jhuki nazron say samnay kharay hovay qad^awar shehzaday ko dekha- phir jhijakti hovi’ aagay barhti hovi os k qadmon main aa kar baith gaee- taqreeban aik bars k entezar k baad os ki ye khawhish poori ho rahi thi- os nay dono haath aagay barha kar os k peron ko chooh liya- onhien ahista ahista sehlanay lagi- shehzaday k qadmon say aik lehar si uthi’ phir seedhi dimagh tak pohanch gaee- aisa saroor tari hova k aunkhien band ho gaeen-
Idhar Akhtari ki dharkanien pagal ho rahi theen- agarchay wo apni manzil ko pa nahi sakti thi- magar itnay qareeb pohanch gaee thi k haath barha kar osay chooh rahi thi- os k dono haath’ peron ko sehlatay hovay oopar uth rahay the- wo bhi ghutno k bal uth rahi thi- patang oonchi aur oonchi uraan lay rahi thi- shehzaday nay jazbaat say larazti hovi awaaz main kaha- “bas- tom nay chooh liya’ aab jao….”
Os ka sar os k ghuton say lag gaya- phir es say pehlay k patang kuch aur oonchii urran bharti- wo tarap kar alag ho gaya- esi waqat darwazay par dastak sunaee di- wo jaisay rah-e-farar hasil kar raha tha- os nay foran he palat kar darwazay ko khol diya- samnay he maham begam khari hovi thi- os nay farsh par bethi hovi Akhtari ko dekha phir betay ko dekh kar sakhat lehjay main Akhtari say poocha- “tom yahan kaisay aa gaeen?”
Humayun nay jaldi say kaha- “ wo…. Esay ham nay bulaya hay-“
Os nay betay ko ghoortay hovay poocha- “kiya tom maa kay etemaad ko thais pohncha rahay ho?”
Wo jaldi say bola- “nahi aakam madar! Ham nay aisa kuch nahi kiya hay- aap ki qasam kah kar kehtay hain- esay haath bhi nahi lagaya hay-“
Maham begam nay Akhtari say kaha- “chalo utho- yahan say jao…”
Wo uth kar khari ho gaee- phir sar jhukaey en k qareeb say guzarti hovi khawab^gaah say bahir chali gaee- Maham begam nay kaha- “kal subah apnay lashkar k saath ja rahay ho?”
“ji aakam madar…..!”
isha ka waqat ho chukka hay- kiya namaz qaza karnay ka iradah hay?”
hargiz nahi- abhi wazoo karnay ja rahay hain- kiya aap ham say kuch kehnay aaee hain?”
wo taeed main sar hila kar boli- “aik jeotashi nay akhtari ki janam kundali banaee thi- main nay wo kundali apnay najoomi Munir Ahmad Shaami ko di thi- Shaami nay bhi apnay tor par os ka zaeecha banaya nay aur ye khush^khabri sunaee hay k ye larki hamaray liey khush^qadam hay- aik beta zaroor paida karay gi-“
Humayun nay poocha- “najoomi nay darasal kaha kiya hay? Kiya wo beta takhat-o-taaj ka waris ho ga?”
Malilka nay chonk kar kaha- “jab wo tomhara beta hay to takhat-o-taaj ka waris kioun nahi ho ga?”
Wo preshan ho kar bola- “kiya Munir Ahmad Shaami nay ye nahi bataya k Akhtari k naseeb main dar^badri likhi hovi hay? Wo hamari aik he raat ki malika ban paey gi?”
(Jari hay ………………. Baqi kal.……)
|
|
|
Post by Tanweer on Jun 19, 2007 11:13:42 GMT 5
(Qist # 18)
Ye kaisi batien kar rahay ho? Shaami nay ham say aisi koi baat nahi kehi hay- ye to koi baat he na hovi k nikaah parhaya jaey ga’ wo tomhari mankooha ho gi aur sirf aik raat k liey …. Es k baad kiya wo shahi mahal chohr kar chali jaey gi?’
“Ham yaqeen say nahi keh saktay- kiya honay wala hay? Es nay khawhish biyaan kartay waqat sirf aik raat ki baat ki thi- es k peechay zaroor koi aaham baat hay-“
“tom kisi makhmasay main na paro- wo aik raat ki dulhan ho ya hazar raaton ki……. Lekin aik betay ko zaroor janam day gi- ye hindu jeotashi nay bhi kaha hay aur musalmaan najoomi nay bhi- tomhien bay^tuki baton main nahi ulajhna chahiey- jao ! namaz parho aur Khuda ko yaad karo- wohi mushkalien aasaan karta hay-“
wo bola- “jab aap ko muradien poori honay ka yaqeen hay to phir dair kioun kar rahi hain?”
“ham kabhi dair na kartay- magar achanak tom Kalanjar ki mohim par rawana ho rahay ho- hamien tomhari wapsi ka entezar karna ho ga- Khuda nay chaha to kaamyaab-o-kamraan loto gay- jis roz phoncho gay’ osi roz tomhara nikaah os khush^bakht say parhwaya jaey ga-“
wo shehzaday k kamray say nikal kar hazrat badshah Babar ki khawab^gaah ki taraf janay lagi- idhar Gul Rukh begam nay Gul Afshan k aik hissay main apnay bhaee ko bulwaya tha- osay khabar mili thi k os ka beta Kamran Mirza Kabuol say Lahore ki taraf aa raha hay-
wo bhaee say boli- “biradar ! aap ko bari tez raftari say Lahore jana ho ga- hamaray betay ko ye khabar phonchaien k hazrat badshah sakht aleel hain- Humayun Kalanjar ka qilla taskheer karnay ja raha hay aur Aagaray ka takhat hamaray betay Kamran ka entezar kar raha hay-“
Bhaee nay kaha- “Gul Rukh ! ham aap k dam^qadam say esh-o-ishrat ki zindagi guzar rahay hain- aap jo peghaam dein gi’ ham phoncha dein gay- magar es par nazar-e-sani karien to behtar ho ga-“
“Aap kehna kiya chahtay hain?”
“Agarchay Humayun Aagarah chohr kar ja raha hay aur hazrat badshah aleel hain magar es ka matlab ye nahi hay k takhat khali para hay- hazrat badshah ki dehshat tamam dushmano par taari rehti hay- ye yaad rakhien k sher beemar ho kar bhi sher he rehta hay- agar Kamran Mirza k phonchanay tak hazrat badshah Babar talwaar uthanay k qabil ho gaey to aap maa betay k haq main bohat bura ho ga-“
wo boli- “andeshon main mubtila rehnay walay kabhi hukamraan nahi ban saktay- takhat-o-taaj hasil karnay k liey khatraat say khelna he parta hay- hamara beta yahan aaey ga to medaan saaf milay ga- odhar ka poora lashkar es k saath ho ga- wo yahan phonchtay he Gul Afshan ko muhasaray main lay kar hazrat badshah ko qedi bana lay ga- wo beemar hain’ uth bhi nahi paaien gay- ham onki teemar dari k liey yahan mojood rahien gay-“
Wo uthtay hovay bola- “theek hay- ham abhi yahan say rawana hotay hain-“
Wo boli- “Kamran Mirza say kehna’ maa betay dono ka faidah ye hay k osay Aagaray ka takhat milay ga aur hamara faidah ye hay k hamien apna shohar milay ga- Gul Afshan main sirf ham he on k saath rahien gay- baqi tamam begmaat ki chuhti kar di jaey gi…..mard k liey takhat-o-taaj piyara aur aurat k liey os ka sartaaj piyara…… jaien teer ki raftaar say hamaray betay k paas phonchien-“
Wo wahan say chala gaya- shahi mahalaat main yehi tamashay hotay hain- badshah takhat-o-taaj k liey lartay rehtay hain aur begmaat apnay sartaaj k liey larti rehti hain- sazishien karti rehti hain- es tarah apni saltanat ko tabah-o-barbaad karti rehti hain- Gul Rukh tabahi-o-barbaadi ki batien durust keh rahi thi- lekin jo keh rahi thi’ khud osay samajh nahi pa rahi thi-
(Jari hay ………………. Baqi kal.……)
|
|
|
Post by Tanweer on Jun 20, 2007 13:55:44 GMT 5
(Qist # 19)
Humayun ki pehli biwi Begga begam Kabul main thi. Wo Humayun say door nahi rehti thi. Es ki aik wajah to yehi thi k mohabat karnay wali biwi ki hesiyat say os k dukh such main shareek rrehna chahti thi. Medaan-e-jang main bhi os k saath janay ki zid kiya karti thi.
Shohar ka sayaa ban kar rehnay ki doosri wajah ye thi k wo apni sokono ko wali ehd Humayun par hawi honay ka mouqa nahi dena chahti thi. Ye khoob samajhti thi k Humayun k aur os ki walidah Maham begam k dil par wohi bahoo hukam^rani karay gi jo aik betay ko janam day gi aur ye os ki bad^qismati thi k os nay pehli baar aik beti ko janam diya tha.
Aab wo doosri baar maa ban^nay wali thi. Es baar poori omeed thi k Humayun k waris ko janam day gi. Aisay waqat etelaa mili k Aagaray k bagh-e-Gul Afshan main Humayun sakht aleel hay. Wo os k paas janay k liey tarap gaee. Yehi waqat hota hay’ teemardari ka aur shohar ki khidmat guzari ka…. Lekin Maham begam nay sakhti say kehla bheja k wo hamilah hay. Aisi halat main safar hargiz na kiya jaey. Bachay ko muqsaan ho ga to wo hamesha k liey shehzadah Humayun say mehroom ho jaey gi.
Wo aik mah baad zachgi say farigh honay wali thi. Phir os k baad bhi shaid aik aadh mah tak safar k qabil na rehti. Humayun say aiseetaweel judaee giraan guzar rahi thi. Lekin halaat nay majboor aur bay^bas kar diya tha.
Bas aik omeed thi’ agar betay ko janam day to Humayun aur os ki maa khud he dorray chalay aaien gay. Osay sar aunkhon par bithaien gay. Phir wo doosri sokono par bhi bartari hasil kar lay gi.
Fil^waqat sokanay na honay k barabar theen. Humayun ki aik begam Koh-e-Noor nay aik beti ko janam diya tha. Os k baad mayoos ho kar maikay ja bethi thi. Humayun ko os say koi khaas lagao nahi tha. Lehaza wo os ki zindagi say nikal gaee thi.
Begga begam ko apni saas Maham begam par tao aata tha. Wo saas sahiba aik pota hasil karnay k liey kisi na kisi haseen shehzadi say Humayun ka nikaah parhwa diya karti thi. Abhi aik baras pehlay yehi hova tha.
Hova ye tha k Mewa Jan nahi aik entehaee haseen aur no^jawan larki Gul Badan begam (Humayun ki hamsheera) ki khidmat par mamoor thi. Wo Maham begam ko itni pasand aaee k os nay betay say os ka nikaah parhwa diya. Begga begam ko maloom hova to wo Lahore say safar karti hovi Dehli phonchi. Saas say shikayat kartay hovay boli. “Aakam madar! Ham nay das roz pehlay etelaa di thi k ham maa ban^nay walay hain. Aap kham^khah aik aur sokan lay aaee hain. Es baar ham aik larkay ko janam denay walay hain”.
Maham begam nay kaha. “tom pehlay aik beti ko janam day chuki ho. Hamien bharosa nahi hay. Jab betay ko janam do gi to kalejay say laga lein gay”.
Aik mah baad Mewa Jan nay yeh khush^khabri sunaee. “main bhi maa ban^nay wali hon. Insha^Allah aik betay ko janam doon gi”.
Maham begam nay Buraaq nami aik bohat qeemati zewar banwaya. Phir osay dono k samnay rakhtay hovay kaha. “jo bhi beta paida karay gi. Ye zewar osi ka ho ga”.
Humayun ki sab he begmaat shahi khandano say taaluq rakhti theen. On k paas maal-o-daulat ki kami nahi thi. Phir bhi aurat ko jitna zewar milay kam hi lagta hay. Aik beta paida karnay par Buraaq jaisa qeemati zewar milta to wo chamakta damakta’ heeray jawheraat say murassa zewar aik fateh maa kay seenay par tamghay ki tarah saja rehta.
On dino Humayun ki chaar begmaat theen. Aik to Begga begam thi. Doosri bibi Koh-e-Noor thi. Os say elehdagi ho chuki thi. Teesari ka naam Chaand Bibi aur chohti Shaad Bibi thi. Chonkay chaar say ziyadah ki gunjaesh nahi thi. Es liey Maham begam doosri bahoo Koh-e-Noor ko hata kar Mewa Jan ko lay aaee thi.
Chaand Bibi aur Shaad Bibi nay abhi tak na beta paida kiya tha’ na beti…… jab zarghez zameenay khareedi gaee theen to ye aasaraa bhi tha k apni matloobah fasal zaroor ho gi. Begga begam beta paida karay ya na karay. Os ka bol bala rehta tha. Wo bohat he aalaa shahi khan^daan say taaluq rakhti thi aur Humayun ki sar charhi thi. Baqi teen begmaat andayshon main mubtila ho gaee theen k jo bhi beti paida karay gi osay Humayun ki zindagi say aur shahi khan^daan say kharij kar diya jaey ga.
(Jari hay ………………. Baqi kal..……)
|
|
|
Post by Sukhanwar on Jun 21, 2007 10:32:54 GMT 5
tanweer bhai aap ka shukar guzar hoon k aap aik tareekhi daastan humain parhnay ko day rahay hain is main jis tara aap ny dilchaspi ko barqaraar rakha wo qabil e sataaish hy thanx razi
|
|
|
Post by Tanweer on Jun 21, 2007 15:40:59 GMT 5
Razi Sahib!
Bohat shukriya aapka.
Tanweer
|
|
|
Post by Tanweer on Jun 21, 2007 15:42:18 GMT 5
(Qist # 20)
Emtehaan k nataeij muqararah waqat par samnay aanay lagay. Begga begam nay aik din aur do raaton tak dard-e-zeh main mubtila rehnay k baad aik beti ko janam diya. Jaisay he ye khabar mili k beti hovi hay. Wo sadmay say cheekh^nay lagi. Ghussay say kehnay lagi. “beti ko utha kar phenk diya jaey. Ye hamaray naseeb main khuwari lay kar aaee hay. Ham es ka mon nahi dekhien gay.”
Wo apni khush^daman Maham begam k paas jhooti etelaa nahi bhej sakti thi k betay ko janam diya hay. Kioun^kay os k aas paas Maham begam ki wafa^daar khadmaaien raha karti theen. Doosri hamilah bahu Mewa Jan thi. Das maah guzar chukay the yarwaan maheena laga to poocha gaya. “zachgi kioun nahi ho rahi hay?”
Wo sehmi hovi thi. Jhijhaktay hovay boli. “hamaray khan^daan main aksar das ya yaraah maheeno k baad zachgi hova karti hay. Meray saath bhi yehi ho raha hay.”
Maham begam nay aik tajriba^kar daee ko bula kar kaha. “es ka muainaa karo aur batao’ hamari muraad kab poori ho gi?”
Band kamray main muainaa kiya gaya to bhed khul gaya. Mewa jan pait par chambray ka sakht khol bandhay hamilah bani phirti thi. Wo Hindustan ki malika ko itna bara fareb day rahi thi. Maham begam ghussay say phat pari. Os par chabuk barsatay hovay boli. “bad^bakht! Zaleel! Do kori ki khadimah! To nay ham say jhoot bolnay aur dhoka denay ki juraat kaisay ki? Tujhay bahu banaya’ buland martabah diya aur to sar par nachnay lagi? To nay sabit kar diya hay k neechi zaat k logon ko kabhi mon nahi lagana chahiey.”
Maham begam thak gaee to aik khawaja^sara Mewa jaan ki pitaee karnay laga. Wo ro ro kar keh rahi thi. “mujhay maaf kar dein. Shehzaday ko hasil karnay k liey jazbaat main andhi ho gaee thi. Main nay sahib-e-alam k qadmon main rehnay k liey jhooti khush^khabri sunaee thi. Khuda k liey mujhay maaf kar dein.” Os ka badan lahu^lahan ho gaya tha. Jo zulam ho raha tha’ jo saza mil rahi thi wo naqabil-e-bardaasht ho rahi thi. Phir bhi wo niqaahat say keh rahi thi. “main nay saat maah pehlay jhoot bola tha. Tab say aab tak pachta rahi hon. Andeshon main mubtila rehti thi k mera kiya banay ga? Bas aik omeed thi k sahib-e-alam kabhi mujhay khilwat main talab karien gay to main on k zariey aap say reham ki darkhawast karon gi.”
Maham begam ki bari sahib^zadi gul Badan begam nay aa kar sifarish ki. “Aakam madar! Ye meri khadimah thi. Main nay esay aap k hawalay kiya tha. Es nay jhoot bola’ dhoka diya. Esay bohat saza mil chuki hay. Khudara esay maaf kar dain. Es ki jan bakhsh dain.”
Maham begam nay hiqarat say kaha. “es bad^bakhat ko hamari saltanat say bahir lay ja kar phenk diya jaey. Agar aaindah ye kahien nazar aaey to es ki gardan urra di jaey.”
Foran he hukam ki taameel ki gaee. Yon Humayun ki chaar main say aik saij phir khaali ho gaee. Begga begam Kabul main thi. Osay etelaa mil rahi thi k os ki sokan shahi mahal say nikali ja chuki hay aur khush^daman sahibah aik pota hasil karnay k liey aisi baoli ho rahi hay k phir aik chohti zaat ko mon laga rahi hay. Akhtari naami aik khadimah ko sar charhaya ja raha hay. Jamna kinaray wali zameenay aur aik shaandaar haveli os k naam ki gaee hay. Shehzadah Humayun Kalanjar ki mohim say wapis aaey ga to Akhtari say os ka nikaah parha diya jaey ga.
Begga begam ye sab kuch sun rahi thi aur angaaron par lot rahi thi. Wo doosri baar bhi beti paida karnay k sadmay say aisay toot gaee thi k bistar say utth nahi pa rahi thi. Magar ye suntay utth baithi k beta paida karnay k liey aik naee sokan aanay wali hay. Osay apni khush^daman par ghussa aa raha tha. Ye achi tarah janti thi k jab tak Humayun takht par nahi baithay ga. Wo khud malikah muazimah nahi kehlaey gi. Malikah ban^nay k baad he wo apni saad k haath mein tasbeeh thama kar osay kisi goshay mein bitha sakti thi. Humayun k baray main ye yaqeen tha k wo osay dil-o-jan say chahta hay. Lekin jab tak takht ka waris paida nahi ho ga. Tak tak wo yakay baad deegaray shadiyaan karta rahay ga aur os ki sokanay lataa rahay ga.
Aab wo yaqeen k saath soch rahi thi. “ham agli baar zaroor takht ka jan^nasheen paida karien gay. Lekin os say pehlay beta paida karnay wali ko rokna ho ga.”
(Jari hay ………………. Baqi kal.……)
|
|
|
Post by Tanweer on Jun 23, 2007 11:58:24 GMT 5
(Qist # 21)
Ye baat bhi naqaib-e-bardaasht thi k aik do kori ki khadimah beta paida karnay k baad doosri tamam begmaat say afzal-o-bartar samjhi jaey gi. Malikah moazemah aur wali ehd ki walidah majidah kehlaey gi. Os nay hukam diya. “safar ki tiyariyaan ki jaien ham Aagray jaien gay.”
Os k mekay walon nay’ os ki khaas tabeebah aur tabeeb nay samjahaya k aisi kamzori ki halat main hazaron kos ka safar na^munasib hay. Achi tarah elaaj ho jaey’ kuch tawanaee bahal ho jaey. Phir safar ka qasad kiya jaey.
Wo zidi thi. Os nay kaha. “hamaray saath hamari tabeebah aur tabeeb raha karien gay. Ham jagah jagah parao kartay rahien gay. Aik aadh roz aaram karien gay phir aagay chal parien gay. Apnay Humayun tak dair say pohanchien gay lekin pohanch hi jaien gay.”
Wo Humayun ko sirf apni malkiyat banaey rakhnay k liey tarah tarah k jatan karti rehti thi. Os k sotelay bhaiyon ki sazishon say bhi agaah hoti rehti thi. Osay maloom hova k Kamran Mirza Lahore k takht par qabzah jamanay k liey Kabul say nikla hova hay. Os nay aik tez raftaar ghur sawar k zariey Humayun ko pegham bheja tha. “Hamaray majazi khuda! Hamaray sar k taaj! Ye guzarish hay k sotelay bhaiyon say mohabat zaroor karien lekin on par bharosa na karien. Kamran Mirza ki neeyat main fatoor hay. Wo Lahore k takht par qabzah jamanay k liey Kabul say nikla hova hay. Aap bawa hazrat badshah (Babar) say guzarish karien k wo Kamran Mirza ko Kabul wapis janey ka hukan dein.”
Begga begam nay Humayun k naam peghaam bheja tha lekin osay yaqeen nahi tha k Humayun os par amal karay ga. Kioun^kay wo bhaiyon par andha etemaad karta tha. Badshah Babar nay bhi osay yehi nasihat ki thi k aik wali ehd ko apnay sotelay bhiyon say mohabat aur insaaf kartay rehna chahiey.
Mard sazishien kam kartay hain. Apni qooat-e-bazoo par ziyadah bharosa kartay hain. Talwaar k zor par takht-o-taaj hasil kartay hain. Os k bar^aks auratien talwaar nahi utha saktien. Es liey sazishien ziyadah karti hain. Begga begam nay apni hukamrani ko daem-o-qaem rakhnay k liey aik aur sazish ki. Os nay sotelay bhaee Hindaal k naam peghaam bheja. “biradar! Aap jantay hain’ ham aap ko bari behan ki tarah piyar kartay hain aur aap ki behtari chahtay rehtay hain. Jaisa k aap k ilm main hay’ bawa hazrat badshah bistar-e-alaalat par hain. Kamran Mirza ko aab en ka khouf nahi raha hay. Wo Lahore par qabzah jamanay k liey apnay lashkar k saath Kabul say nikal chuka hay. Aab Kabul ka takht khali hay. Aap yahan apnay lashkar k saath aaien aur apni badshahat ka elaan karien. Karan Mirza ki waapsi ka rasta band kar dein.”
Babar k teeno betay Kamran’ Askari aur Hindaal esi entezar main the k baap ki aunnkhien band hon to Humayun say os ka eqtedaar ch^heen liya jaey. Wo sab he baap say khouf^zada rehtay the. Lekin aab os ki beemari nay sara khouf door kar diya tha. Hindaal bhi badshahat k liey par tol raha tha. Begga begam ka khufiya peghaam miltay he wo lashkar k saath Kabul ki taraf chal para.
Begga begam nay phir aik chaal chali. Os nay Kamran Mirza k naam peghaam bheja. “Biradar! Agar^chay rishtay main ham aap k bhaee ki begam hain. Lekin aap ko bari hamsheerah ki tarah chahtay hain. Aap ko bar^waqat etelaa day rahay hain. Agar Kabul main apna eqtedaar qaem rakhna chahtay hain to foran wapis chalay aaien. Kioun^kay Hindaal apnay lashkar k saath Kabul pohanchnay wala hay.”
Begga begam ki ye do tarafah sazishien kaam^yaab rahien. Koi bhi doosray k ghar par qabzah jamanay say pehlay apnay ghar main mazbooti say qadam jamata hay. Kamran ko ye andeshah tha k hazrat badshah Babar bistar-e-alaalat say uth bethay to osay baghawat k jurm main Kabul k takht say bhi mehroom kar dein gay.
Os ka maamo yaani Gul Rukh begam ka bhaee ye peghaam lay kar aaya tha. “betay Kamaran ! Humayun Kalanjar ki mohim k liey nikal raha hay. Aagray ka takht khali hay. Hazrat badshah Babar aleel paray hain. Wo apna difaa nahi kar paien gay. Tom onhay hirasat main lay kar Humayun ko ghutnay teknay par majboor kar saktay ho. Wo hazrat badshah ko jaan say ziyadah chahta hay. On ki khatir hatiyaar daal day ga.”
Kamran Mirza nay maa ko likh bheja. “Aap hamien Hindustan ka badshah bana^na chahti hain. Lekin halaat moafiq nahi hain. Aap ki sokan Dildar begam ka beta hamara sotela bhaee Hindaal apnay lashkar-e-jarar k saath Kabul ki taraf aa raha hay. Hamien os ki sarkobi k liey wapis jana ho ga. Aziz az jaan madar! Ham aap ka khawab zaroor poora karien gay. Hindustan k badshah zaroor banien gay lekin zara sabar karien. Bawa hazrat badshah ko es duniya say kooch karnay dein. Aap k do jawan betay hain. Ham baad main Humayun aur Hindaal say bakhoobi nimat lien gay.”
(Jari hay ………………. Baqi kal.……)
|
|
|
Post by Tanweer on Jun 24, 2007 17:10:11 GMT 5
(Qist # 22)
Betay ka ye tehreeri pegham Gul Rukh begam ko mila to wo ghussay say tilmilaati hovi Dildar begam k paas aaee. Osay betay ka peghaam parhatay hovay boli. “aap ka sahibzadah Hindaal aasteen ka saa^np hay. Hamaray betay Kamran ko das lena chahta hay.”
Dildar nay kaha. “aap hamaray betay ko aasteen ka saa^np es liey keh rahi hain k wo Kabul k takht par qabzah jamana chahta hay ? Kamran Mirza to os say bhi ziyadah zehreela hay. Aap nay apnay betay ko yahan bulaya hay takay wo aik he waar main beemar walid ko qaidi banaey aur yahan k takht par qabzah jama kar Humayun ki waapsi ka raasta rok day.”
“Ham nay waadah kiya tah’ aap k betay Hindaal ko sotela nahi samjha jaey ga. Baad mein osay Hindustan k aik bohat baray elaaqay par hakomat karnay ka mouqa diya jaey ga.”
Dildar nay kaha. “jo biwi apnay majaazi khuda ki nahi hay’ jo beta apnay beemar walid ko qaidi bana^nay k liey yahan aa sakta hay. On k waadon aur qasmon par bharosa karnay wali koi nadaan ya pagal aurat he ho gi.”
Phir Dildar nay dono haath kamar par rakhtay hovay poocha. “kiya ham aisay he nadaan dikhaee daytay hain? Aap apni sokan Maham begam k khilaaf bhar^poor sazishien kar rahi hain. Ham bhi to sokan hain. Kiya Maham begam say nimatnay k baad hamien aasaani say chohr dein gi? Kiya hamaray khilaaf sazishien nahi karien gi?”
Gul Rukh nay osay chubhti hovi nazron say dekha. Phir kaha. “aap bohat pachtaien gi Dildar begam! Hamaray do kariyal sahibzaday hain. Wo Humayun jaisay wali ehd say takra saktay hain to aap ka Hindaal kis ginti main aataa hay? Osay to wo aik chutki main masal kar rakh dein gay.”
“Agar aisa kuch hova to sirf main he nahi’ aap bhi pachtaien gi. Ham jab chahien Maham begam ka etemaad hasil kar saktay hain. Es jurm ka eteraaf kar saktay hain k ham dono nay Humayun ki halakat k liey wo taaweez aik aamil say likhwaya tha aur osay os k bistar thak pohanchaya tha. Sab he jantay hain k Akhtari jaisi adna kadimaah ka biyaan tasleem nahi kiya jaey ga. Lekin ham to hukamran-e-waqat hazrat badshah Babar ki begam hain. Hamari chasham deed gawahi ko sab he tasleem karien gay. Phir aap ka kiya banay ga Gul Rukh begam …… ?”
wo osay tanziyah andaaz main dekh kar janay lagi. Gul Rukh nay haath utha kar kaha. “ruk jaien….”
Os nay ruk kar osay sawaliyah nazaron say dekha. Wo naram par gaee thi. Qareeb aa kar os k shaanay par haath rakhtay hovay boli. “hamien aapas main nahi larna chahiey.”
Dildar begam nay kaha. “aap ghalat keh rahi hain. Hamien larna chahiey kioun^kay ham sokanie hain. Fil^haal ham nay Maham begam k khilaaf etehaad qaeem kiya hay. Ye kahien k es etehaad ko abhi tootna nahi chahiey…… baad main dekha jaey ga.”
Chalo. Yehi sahi. Hamara ye etehaad abhi qaeem rehna chahiey.” issi sharat par qaeem rahay ga k aap abhi kisi tez raftaar ghur sawar ko Kabul rawana karien. Aik naama aap apnay betay ko arsaal karien gi aur aik naama hamari taraf say hamaray betay k naam jaey ga. Dono ko takeed ki jaey gi k wo aapas main jang na karien aur na he aik doosray ko kisi tarah ka nuqsaan pohanchaien.”
Bay^shak! ham abhi biradar ko bulatay hain. Wo kisi tez raftaar qaasid ka entezaam karien gay. Chalien aaien. Ham apnay apnay sahibzadon ko khat likhien.”
Odhar Kabul main Humayun ki biwi Begga begam aur idhar Aagaray main Babar ki begmaat apni apni shahaana zahanat say jor tor main masroof theen aur Babar par ye kahawat sadiq aa rahi thi. “….. marz barhta gaya joon joon dawa ki.”
Tabeeb hazraat preshan the. On ki koi dawa assar nahi dikha rahi thi. Babar nay kaha. “marz-ul-mout aakhri marz hota hay….. aur es ki dawa duniya k kisi tabeeb k paas nahi hoti.”
Os nay Maham begam aur apni bari hamsheerah ko bula kar kaha. ”hamari dono sahibzadiyon ki foran shaadi ki jaey. Dono ki nisbat pehlay say tay hay. Koi dhoom dhaam na karien. Shaadi biyaah ki pur^takaluf rasoomaat adaa na karien. Bas en ka nikaah parhwa dein.”
Es hukam ki taameel os ki aakhri khawhish ki tarah ki gaee. Maham begam nay foran he Humayun ko peghaam bhijwa diya. “Jaan-e-maadar! Tomharay bawa hazrat badshah ki haalat ghair hay. Aik lamha bhi zaaya kiey baghair aisay aao’ jaisay hawa k ghoray par aaya kartay hain.”
(Jari hay ………………. Baqi kal.……)
|
|
|
Post by Tanweer on Jun 25, 2007 14:26:42 GMT 5
(Qist # 23)
Kalanjar k Qilla fatah ho chukka tha. Wahan qadam jamaey rakhnay ki zaroorat thi. Humayun nay apnay sipha^salaar ko zaroori faraez ada karnay k liey wahan chohra. Phir barq raftaari say beemar walid k paas pohanch gaya. Babar ko khan-e-kalaan ki aik shahaana saij par pohanchaya gay tha. Es saij k samnay sonay chaandi ka takht bich^haya gaya tha. Jab Humayun wahan pohancha to Babr nay os ka haat thaam kar kaha. “ham nay tomhari behno ki shadiyaan kara dein. Aab aakhri farz reh gaya hay.”
Phir os nay tamam umraa ko mukhatib kartay hovay kaha. “ye Naseer-Ud-Din Humayun hamara wali ehd kehlata raha hay. Ham abhi apna ehd poora karna chahtay hain. Ye hamaray takht-o-taaj ka waris hay. Esay takht-e-shahi par bitha kar taaj-e-hukamrani pehnaya jaey.”
Humayun nay hich^kichatay hovay kaha. “Bawa hazoor! Aap ki ye khawhish poori ho gi. Magar zara dam lein. Allah nay chaha to aap jalad he sehat^yaab hon gay. Phir takht nasheeni achi lagay gi.”
“Hamien ye acha lag raha hay k Allah Tallah nay hamari jan ka sadaqah qabool kiya hay. Ham oskay shukar guzar hain. Aagay behas na karo. Hamaray hukam ki tameel karo.”
Tamam umraa Humayun k daien baien aur peechay aa kar kharay ho gaey. Osay saath lay ja kar takht par bithaya gaya. Har taraf say mobarik salamat ki aawazien buland honay lagien. Begmaat aur kaneezien moheen reshmi pardon k peechay theen. Maham begam ki khushi ka to koi thikana nahi tha. Os k bar^aks Gul Rukh begam aur Dildar begam angaron par lot rahi theen. Humayun ki takht poshi ho rahi thi. Kalam-e-Pak ki aayaatien parhi ja rahi thee. Haath utha kar naey badshah ki salamati ki duaien maangi ja rahi theen. Akhtari maray khushi k aik satoon say lipat gaee thi. Aisa lag raha tha’ jaisay Humayun nay aa kar osay apnay wajood say laga liya hay. Maham begam nay kaha tha’ jab wo Kalanjar ka qilla taskheer kar k aaey ga to os k saath os ka nikaah parhwaien gi. Aab wo musarraton bhara din aur suhaag ki aik raat aanay waali thi.
Humayun takht say utar kar tezi say chalta hova walid k paas aa gaya. Jhuk kar os seenay say lag kar ronay laga. Badshah Babar nay os ki pusht thapaktay hovay kaha. “ham say itna faslah rakho k tomhara chehra dekh sakien.”
Wo seedha ho kar baith gaya. Badshah Babar nay os ka haath apnay haathon main lay kar kaha. “es mobarik ghari main waadah karo. Kamran Mirza’ Askari Mirza aur Hindaal say biradraan-e-Yousaf jaisa salook nahi karo gay. . Bal^kay hazrat Yousaf ki tarah apnay bhaiyon k saath mohabat aur rawa^dari say pesh aatay raho gay. On ki chohti bari ghalitiyan faraagh dili say maaf kartay raho gay aur on k jaez haqooq adaa kartay raho gay.”
Humayun nay waadah kiya k wo os kay aik aik hukam ki tameel karta rahay ga. Aisay he waqat baap k haathon ki girift betay k haath par dheeli par gaee. Os nay bari niqahat bhair aawaz say kalimah taibah parha. Phir hamesha k liey khamosh ho gaya. Mout ki tasdeeq hotay he aik kohraam barpa ho gaya. Kiya auratien aur kiya mard sab he ronay aur seena kobi karnay lagay. Wo pehla badshah tha’ jis nay Hindustan mein mughal saltanat ki bunyaad daali thi aur aisi mazboot bunyaad daali thi k taqreeban sawa do so bars tak musalman Hindustan par hakomat kartay rahay the.
Wo pehla musalman badshah tha’ jis nay sharaab peenay say tobah ki thi aur sharaab peenay par sakhti say pabandi aaid ki thi. Os nay betay k liey jaan ka sadaqah daytay waqat kaha tha.
“pesh naqd jaan gohar chay bashad Nisaar dost bahsad har chay bashad”
Jab Babar ka dam nikla to Maham begam nay maatam kartay hovay kaha. “sari duniya maa ki mamta aur os ki qurbaniyon ko tasleem karti hay. Magar aaj aik baap duniya ki tamam maa^on par sabqat lay gaya hay.”
(Jari hay ………………. Baqi kal.……)
|
|
|
Post by Tanweer on Jun 26, 2007 11:24:46 GMT 5
(Qist # 24)
Humayun jis takht par betha’ os main kantay he kantay the. Kitnay he dushman hazrat badsah Babar ki aunkhien band honay k entezar main the. Aik taraf Bihaar ka hukamraan Sher Khan Soori tha. Doosri taraf chohtay baray elaaqon k sultan aur aur kitnay he rajay’ mahrajay the. En sab say barh kar aasteen k saanp teen sotelay bhaee the. Sab he Aagaray aur Dehli k takht par bethna chahtay the.
Hazrat badshah Babar ki wafaat k baad iradaah tha k chalees dino tak sog manaya jaey ga. Sotelay bhaiyon nay bhi baap ki mout ka lihaaz kiya tha. En main say kisi nay k^huli baghawat aur lashkar^kashi nahi ki thi. Lekin Matam k saath saath adawati mansoobay banatay rahay the.
Door draaz k elaaqon main chohtay baray’ rajay mahrajay mutahid ho rahay the. On k darmiyaan es tarah etehaad ho raha tha k wo apnay chohtay chohtay lashkaron ko mila aik bohat bara lashkar bana rahay the. Wo musalmaano ko Aagaray aur Dehli say paspa ka k Hindustan say janay par majboor kar dena chahtay the.
Sher Khan Soori k mutaliq mash^hoor hay k wo jitna daler aur jangjoo hukamraan tha’ otna he insaan dost bhi tha. Dukhi insaano k jazbaat ko samajhta tha. Os nay tey kiya tha k jab tak hazrat badshah Babar marhoom ka khandaan sogawar rahay ga tab tak wo Aagaray ka rukh nahi karay ga.
Dildar begam ka mizaaj badal gaya tha. Wo achi tarah samajh gaee thi k Gul Rukh begam say etehaad kar k khasaaray main rahay gi. Os nay apnay betay Hindaal ko takeed ki k w kabhi Kamran aur Askari par bharosa na karay. Hamesha har haal main Humayun ka saath deta rahay.
Gul Rukh nay apnay dono bayton ko peghaam bheja. “jo toot raha ho’ osay torna aur aasaan ho jata hay. Humayun rozay’ namaaz aur Quran khawani main masroof rehta hay. Abhi jang^jooi k silsalay main musta^id nahi ho sakay ga. Dair kis baat hay? Foran dono bhaee mutahid ho kar tamam lashkar k saath Aagaray pohancho.”
Kamran Mirza nay jawaban likh bheja. “aap apnay betay Askari Mirza k mizaaj ko khoob samajhti hain. Wo kisi had tak buzdil bhi hain aur zaeef-ul-eteqaad bhi….. onho nay khawab main firdos-e-makani bawa hazoor ko dekha hay. On ki naseehatien suni hain aur wo saaf keh rahay hain k chalees dino tak apnay sotelay bhaee k khilaaf lashkar^kashi nahi karien gay.
Hamien apnay mukhbaron say etelaa milti rehti hay. Humayun agar^chay din raat ibaadat main masroof rehta hay. Lekin os ka sipeh^salaar apnay pooray lashkar k saath bohat he musta^id hay. Abhi halaat hamaray muafiq nahi hain. Aap zara sabar karien.”
Maham begam bhi apnay shohar say abdi judaee ka sadmah she rahi thi. Os k bawajood os k andar dunyawi taqaazay cheekh rahay the. On main say aik taqaza ye tha k itni bahoo^ien lanay k bawajood takht ka aik waris paida nahi ho raha hay. Jeotashi aur najoomi ki pesh^goee say aik dhaaras bandhi hovi thi. Akhtari say omeedien wabasta kar li gaee theen.
Os nay socha tha k beta Kalanjar ki mohim say wapis aaey ga to foran Akhtari k saath nikaah parha diya jaey ga. Wo chahti thi’ jald say jald matloobah nateejah samnay aa jaey.
Magar halaat nay osay majboor kar diya tha. Aaiendah chalees dino k baad he wo naee bahoo ko betay ki saij par bhej sakti thi. Aisay waqat Humayun ki bari biwi Begga begam wahan pohanch gaee. Maham begam nay osay dil say khush^amdeed nahi kiya. Kioun^kay wo doosri baar bhi aik beti ko janam day kar osay maikay main chohr aaee thi.
Begga begam nay apni khush^daman say kaha. “aab aap k bayzaar honay say hamaray liey koi faraq nahi paray ga. Hamaray Humayun nay aatay he hamien galay say lagaya hay aur hamesha ki tarah wo hamien apna saaya bana kar saath rakhnay walay hain.”
Maham begam nay nafrat say kaha. “tom zaroor hamaray betay ko kuch ghol kar pilaati ho. Esi liey wo tomharay peechay laga rehta hay.”
Ham aapko ye samjhanay aaey hain k aab aap k ikhtiyaraat mehdood ho chukay hain. Aap k badshah salamat…….. salamat nahi rahay. Allah ko piyaray ho chukay hain. Hamaray majaazi Khuda…………. Khudaey saltanat hain. Aab ham bari begam honay k hawalay say malikah moazimaah hain. Aap sirf badshah ki walidah honay k hawalay say moaziz rahien . ham sab aap ka ehteraam kartay rahien gay lekin aap apnay ehkemaat ham par musalat nahi kar sakien gi.”
Maham begam nay zara tan kar kaha. “ham mehdood ho kar bhi la^mehdood rahien gay. Jab tak aik waris paida nahi ho ga. Ham apnay betay k liey bahoo^ien latay rahien gay aur es silsalay main beta hamari himayat karta rahay ga.”
Wo muskura kar boli. “takht k aik waris ko lanay k liey ham bhi himayat kartay rahien gay. Yon hamaray sartaaj ka piyaar aur etemaad ham par mustehkam rahay ga.”
Phir wo door khari hovi kaneezon ki taraf dekhtay hovay boli. “waisay wo kanwal kahan hay’ jisay aap keechar say nikaal kar badshah-e-waqat ki khawab^gaah main pohnchana chahti hain?”
Akhtari ko talab kiya gaya. Os nay forna he hazir ho kar Begga begam ko adab say salam kiya. Begga begam nay osay sar say paon tak dekha phir nagawaari say mon bana kar kaha. “koi khaas to hay nahi magar najoomiyon nay esay bohat he khaas bana diya hay.”
Maham begam nay kaha. “koi apnay husn-o-shabaab say aur koi shahaana tamtaraq say khaas ban jaati hay. Osay muqadar nay sab say aaham aur khaas bana kar bheja hay. Os din ko socho…. Jab ye aik jan^nasheen ko janam day kar tamam begmaat say bar^tar ho jaey gi.”
Wo boli. “aap hamien aanay walay kal k baray mein sochnay k liey keh rahi hain’ ham to pehlay he bohat kuch soch samajh kar aaey hain.”
Wo wahan say palat kar janay lagi. Maham begam nay chonk kar poocha. “kiya soch samajh kar aaee hain? Zara ham bhi to sunien.”
Wo darwazay k paas say palat kar boli. “Yehi k wo jo aanay wala kal hota hay’ wo kabhi nahi aata.”
(Jari hay ………………. Baqi kal.……)
|
|
|
Post by Tanweer on Jun 28, 2007 20:22:54 GMT 5
(Qist # 25)
Wo kamray say chali gaee. Nazron say ojhal ho gaee. Maham begam khaali darwazay ko na^gawari say dekhti rahi phir Akhtari say boli. “Khuda karay…. Pesh^goi durust ho. Tom nahi jaantien. Aik betay ko janam day kis tarah hamari es maghroor bahoo ka sar jhukao gi?”
Akhtari nay aik gehri saa^ns lee. Phir dil he dil main kaha. “wo waqat to aatay aatay reh gaya hay. Aab baat chalees dino k liey tal gaee hay. Begga begam ki es baat k peechay zaroor koi gehri baat hay k kal kabhi nahi aataa.”
Os nay preshan ho kar apni honay waali saas ko dekha. Phir sar jhuka kar socha. Ya Khuda ! es mahal main sazishien bohat hoti hain. Ye Begga begam to kuch ziyadah he sazishi lag rahi hay. Kiya ye mujhay Humayun badshah tak pohanchnay dain gi …..?”
Taaj-o-takht’ badshahat’ hukamraani’ rob aur dabdaba aur wasee ikhteyaraat ya to ba^zor-e-shamsheer hasil hotay hain ya sazishiyon k zariey… shaahi mahalaat main begmaat sazishi talwaron k zariey aik doosray ka gala kat^ti rehi hain. Wo mamooli si larki aisi begmaat k darmiyaan aa phansi thi jo aik doosray ko talwaron ki dhaar par pohanchati rehti theen. Wo ye soch kar ulajh rahi thi k bata nahi aanay walay dino main kiya honay wala hay?”
Kuch roz baad Humayun ki mazeed do begmaat Chaand bibi aur Shaad bibi aa gaien. Wo thush theen k en k shohar ko badshahat mili hay lekin sus^sar ki wafaat ka sog manaya ja raha tha’ es liey onho nay khushi ka izhaar nahi kiya. Wo dono chaar maah pehlay Humayun k saath Dehli main waqat guzaar chuki theen. Chaand bibi nay saas k galay lagtay hovay kaha. “es sogawar mahol main aik achi khabar ye hay k ham omeed say hain.”
Maham begam nay os say alag ho kar kaha. “hamari kitni he bahoo’n nay omeed k chiraagh roshan kiey aur bujha diey. Ho sakta hay’ tom say omeed bar aaey. Tomharay tibbi muaenay ka aur aish-o-araam ka khaas khiyal rakha jaey ga. Bay^shak. Tom apnay jaleel-ul-qadar badshah say milo lekin …… jab tak zachgi na ho jaey’ tab tak os ki khilwat main na jao.”
Wo dil par ghonsa marnay wala hukam saadir kar k wahan say chali gaee. Bahoo’n k halaat aur on ki kar^kardagi k mutabiq wo onhay betay ki khawab^gaah main bhejti thi aur jab wo zaroori na samjhi jatien to onhay khawab^gaah say nikaal diya karti thi. Sirf aik Begga begam aisi thi jo Humayun ki mon chahri thi. Beta os ki sifarish karta tha wo wo osay ch^hoot day deti thi.
Jab Begga begam ko maloom hova k os ki sokan Chaand bibi maa ban^nay waali hay to sakoon gharat ho gaya. Raaton ki neend^en urr gaien. Agalay chobees ghanton main mahir najoomi Munir Ahmed Shaami nay Maham begam k hukam k mutabiq Chaand bibi ka zaecha banaya tha. Os ka ba^ghor mutaelaa kiya tha phir pesh^goi ki thi k Chaand bibi k sitaaray aik betay ki navid day rahay hain. Aagay jo Allah ko manzoor ho ga’ wohi ho ga.
Ye suntay he Maham begam nay Chaand bibi ko sar par bitha liya tha. Os k naaz nakhray bardaasht kiey janay lagay the. Doori taraf Begga begam angaaron par lotnay lagi thi. Bay^shak wo Humayun ko dil-o-jaan say chahti thi’ os ki behtari aur salamati k saath ye bhi dili khawhish thi k Humayun ka aik jaan^nasheen paida ho. Lekin kisi sokan say na ho. Wo do baar betiyaan paida karnay k baad aab bhi yaqeen say kehti thi k aagli baar zaroor aik betay ko janam day gi.
Aab oskay dimaagh main ye baat pak rahi thi k nahoomi Munir Ahmed Shaami ki pesh^goi durust na ho. Agar sahee ho to osay ghalat kar diya jaey….. aur osay ghalat kis tarah kiya ja sakay ga? Os k liey aik thos mansoobay ki zaroorat thi.
Odhar Maham begam nay Humayun say kaha. “Akhtari jaisi adna khadimah ko izat di ja rahi hay. Os ka martabah buland kiya ja raha hay. Osay Jamna kinaray waali aik chohti si jageer di gaee hay. Osay isi shart par tomhari mankooha banaya jaey ga k wo aik betay ko janam day gi lekin…………. “
(Jari hay ………………. Baqi kal.……)
|
|
|
Post by Tanweer on Jun 30, 2007 13:35:02 GMT 5
(Qist # 26)
Betay nay maa ko sawliyah nazron say dekha. Wo boli. “hamaray najoomi Munir Ahmed Shaami nay Chaand bibi k liey pesh^goi ki hay k hamari es bahoo say aik betay ki omeed hay. Agar pesh^goi durust ho gi’ aik jaan^nasheen paida ho ga to phir Akhtari jaisi adna khadimah ko kioun sar par charhaya jaey?”
Humayun nay kaha. “bay^shak. Shahi khandaan k waris ka hasab-o-nasab sirf baap ki taraf say he nahi…. Maa ki taraf say bhi arfaa-o-aalaa hona chahiey. Lekin Shaami ki pesh^goi mubhim hay. Agar wo durust nah hovi’ Chaand bibi aik betay ko janam na day sakien tab aap ka faislah kiya ho ga?”
“aglay teen maah main zachgi motwaqa hay. Agar hamara matloobah nateejah samnay na aaya to chaar maah baad Akhtari say tomhara nikaah parhwa diya jaey ga.”
Akhtari nay ye faislah suna to oska dil doobnay laga. Pehlay to ye kaha gaya tha k Humayun Kalnajar ki mohim say wapis aaey ga to nikaah parhaya jaey ga. Os k baad hazrat badshah Babar nay wafaat paee to ye moa^mila chalees dino k liey tal gaya. Aab mazeed chaar maah k liey tal raha tha. Wo apnay mehboob ko aab tak sirf aik baar chooh paee thi. Yaani darwazay par dastak di thi. Dehleez par muntazir khari thi. Andar qadam rakhnay k liey nikaah ki san^ad nahi mil rahi thi. Judaee ka arsaa tool khenchta jar aha tha.
Osay jo jaageer ataa ki gaee thi wahan aik khoobsurat si haveli thi. Maham begam nay hukam diya k wo chaar maah tak os haveli main rahay gi. Os ki hifazat k liey chaar kaneezie’n, nigraani k liey chaar khawaja^sara aur muhafiz k tor par chaar urda^baigniyaan raha karien gi.
Urda^baigni aisi muhafiz auraton ko kaha jata tha jo sipahiyon ki wardiyon main raha karti theen. Teer-o-talwaar chalana khoob jaanti theen. Jis tarah qurbani k janwar ko chaar diwaari k ahaatay main baandh kar rkaha jaata hay osi tarah akhtari ko haveli ki chaar diwaari tak mehdood kar diya gaya tha.
Odhar chalees din pooray honay say pehlay he Gujraat k Sultan Ahmed Shah nay baghawat ka elaan kar diya. Humayun nay apnay bawa hazoor k chaleesvien say pehlay saltanat k amoor main dilchaspi nahi lena chahta tha. Lekin aik sultan ki baghawat say doosray sultan aur rajon’ mahrajon k bhi hoslay buland ho saktay the aur firdos-e-makani (hazrat badshah Babar) ki qaeem kardah saltanat kamzor hoti chali jati. Doosron ko baghawat say roknay k liey sultan Ahmed Shah ki sarkobi laazmi thi. Es liey Humayun ko majbooran apna lashkar k saath Aagaray say bahir jana para.
Kamran Mirza ko khabar mili k Aagaray ka takht khaali para hay. Wo kisi jang-o-jadal k bagher wahan qabzah jama sakta hay. Lekin halaat phir os k moafiq na rahay. Aas paas k rajaa’on nay mutahid ho kar aik bara lashkar tiyaar kiya tha. Wo Lahore ki taraf barhna chahtay the. Kamran Mirza ko majbooran apnay qareebi dushmano say nimatna para.
Dono bhaiyon ko fatah naseeb hovi. Kamran nay on rajaa’on ko buri tarah shikist day kar bhaagnay par majboor kar diya. Humayun nay sultan Ahmed Shan say Gujraat ka elaaqa ch^heen liya. Ye keh kar osay mot k ghaat utaar diay. “too musalmaan hay lekin deeni ehkamaat ka paband nahi hay. To nay firdos-e-makani hazrat badshah Babar ki wafaat par taaziyat bhi nahi ki. Hamaray bawa hazoor k chalees^vien ka entezar bhi nahi kiya…… ja aab mot ka entezar na kar. Ye aa chuki hay.”
Osay jahanam main pohncha diya gaya. Humayun Aagaray wapis aaya phir baap k chalees^vien tak khairiyat rahi. Os k chand roz baad he etelaa mili k Sher Khan Soori aik lashkar-e-jarar k saath Bihar say nikal para hay aur medaan marta hova Qanoj ki taraf barhta chala aa raha hay.
Humayun nay apnay sipah^salaar ko hukam diya k pooray lashkar ko darya paar koson door tak pohnchaya jaey. Dushman ko apnay elaaqay say bohat door roka aur paspa kiya jaey ga. Osay aagay barh kar darya aboor karnay ka mouqa nahi diya jaey ga.
Begga begam nay Humayun say kaha. “aap nay waadah kiya tha k takht par bethnay k baad hamien hamesha apnay saath rakha karien gay. Lehaza hamien apnay saath darya paar lay chalien. Jab tak jang shoro nahi ho gi’ ham aapki khidmat kartay rahien gay.”
Wo bola. “hamien apna waadah yaad hay. Lekin aakam madar ijazat nahi dien gi.”
“Badshah salamat bhool rahay hain. Ham malikah hain. Aab kisi ki ijazat k muhtaaj nahi hain. Aap ki walidah majidaah hamaray liey mohtaram hain. Lekin hamari aur aap ki azdawaji zindagi main onhay mudakhalat karnay ka koi haq hasil nahi hay.”
Maham begam nay sunaa to kaha. “bay^shak. Hamien badshah aur malikah k moamelaat mai mudakhalat nahi karni chahiey lekin badshah ko doosri begmaat say bhi na^insaafi nahi karni chahiey. Agar tomharay saath aik shareek-e-hayat jaey to to Chaand bibi aur Shaad bibi ko bhi janay ka haq pohanchta hay. Aab tom shehzaday nahi rahay ho. Tomhein insaaf pasand badshah ban kar hakoomat karna hay- Socho- Doosri begmaat k saath insaaf karo gay ya nahi?”
Yon Maham begam nay aik pakh laga di- Begga begam nay bay^basi aur na^gawari say khush^daman ko dekha- Humayun nay foran he tasleem kar liya k wo doosri begmaat k saath bhi insaaf karay ga- aisay waqat aik khawaja^sara nay aa kar dast bastah arz kiya- “badshah salamat ka iqbal buland ho………. Hamaray sipahiyon nay aik mukhbar ko pakra hay- wo shehzadah Kamran Mirza ka peghaam lay kar Sher Khan Soori k paas ja raha tha-“
Os nay aik khat pesh kartay hovay kaha- “ye os mukhbar k libaas say bar^aamad hova hay-“
(Jari hay ………………. Baqi kal.……)
|
|
|
Post by Tanweer on Jul 1, 2007 16:03:39 GMT 5
(Qist # 27)
Humayun osay khol kar parhnay laga- Kamran Mirza nay likha tha- “buland hoslah Sher Khan Soori ka iqbal buland ho. ta dam-e-tehreer ham Lahore mein hain- Hamaray darmiyaan ye tay paya hay k aap Qanooj fatah karnay k baad Chonsa ki taraf barhien to ham Aagaray par charhaee karien gay- es tarah Humayun hamaray darmiyaan phans jaey ga- aagay aap hongay’ peechay ham…… hamaray etehaad say fatah yaqeeni ho gi.
Aap jawaban ye tehreeri ehd^naamah likh dein k Aagaray par qabzah karnay k baad aagay pesh^qadmi nahi karien gay- Lahore hamaray liey chohr dien gay- aap ka ye ehd^naama mosool hotay he ham apna lashkar lay kar Aagaray ki simt rawanah ho jaien gay-“
Es tehreer k neechay Kamran Mirza ka naam aur os ki mohar dikhaee day rahi thi- chonkay wo Humayun ki adm mojoodgi mein Lahore ka qaeem maqam badshah tha- es liey os nay badshahat ki mohar os tehreer par lagaee thi-
Humayun ghussay say tilmilanay laga- Maham begam nay es tehreer ko parhnay k baad kaha- “Gul Rukh begam Lahore pohanchi hovi hay- wohi apnay betay ko tomharay khilaaf bharka rahi hay-“
Begga begam nay kaha- “wo soteli maa hain- wo to bharkaien gi- lekin sotelay bhaee bhi saanp^on say kam nahi hain-“
Phir wo Humayun ko dekhtay hovay boli- “Hamaray badshah salamat par bura waqat aaya hay- aagay dushman hain- peechay wo sotelay saanp^on say bhi ziyadah zehrilay hain- aap pehlay en ka sar kuchalnay ka entezaam karien- phir Aagaray say bahir niklein-“
Humayun nay halaat say majboor ho kar apnay lashkar ka aik hisah Aagaray mein he rehnay diya- Phir Kamran Mirza k naam aik khat likha- “pidar zaad Kamran Mirza! Hamaray dushmano say saaz baaz tomhien bohat mehngi paray gi- tom nay Humayun ki taaqat ka ghalat andazah kiya hay- ham do^tarfah jang lar saktay hain- aao- apnay lashkar k saath chalay aao- hamara lashkar teeron’ talwaron’ bandooqon aur top k golon say tomhara esteqbaal karnay wala hay-“
Kamran Mirza ko es baat nay khof^zadah kar diya k os ka khat pakra gaya hay aab Humayun ka lashkar osay Aagaray ki hadood main dakhil nahi honay day ga- wo jaanta tha k Humayun firos-e-makani hazrat badshah Babar ki tarah jitna reham^dil hay’ otna he sangdil bhi hay- agar wo Aagaray par yalghaar na karay to shaid osay maafi mil jaey- warnah sihkist ho gi aur wo giriftaar ho ga to Humayun osay zindah zameen mein gaar day ga-
Wo tazbazab main raha k kiya karna chahiey? Sher Khan Soori os ka saath day raha tha- lekin qismat saath nahi day rahi thi- khat pakra gaya tha- Humayun k lashkar ka aik hisaah os ki goshamali k liey tiyaar khara tha-
Humayun Aagaray say nikal kar darya paar gaya to os k hamrah os ki teen begmaat’ kaneezien aur khawaja^sara wagherah bhi the- onho nay aik jagah par^rao daala- badshah aur begmaat k liey khemay lagaey gaey- on say das kos aagay lashkar-e-jarar Sher Khan Soori ki aamad ka muntazir tha- mukhbar nay khabar di k Sher Khan pachaas kos aagay kisi majboori k baaes ruka hova hay- shaid do chaar dino main pesh^qadmi karay ga-
Darya kinaray tamaam begmaat k alag alag khemay lagaey gaey the- Humayun Begga begam k saath ziyadah waqat guzaarta tha- magar Chaand bibi aur Shaad bibi ka bhi bohat khiyaal rakhta tha- wo Shaad bibi k saath aik raat guzaarnay k liey os k khemay mein gaya lekin os pehlay Chaand bibi say mulaqat kar k kaha- “Akam madar ka hukam hay’ zachgi honay tak hamien apnay darmiyaan faaslah rakhna chahiey- teen maah baad tom aik jaan^nasheen ko janam do gi- os kay baad ham din raat saath raha karien gay-“
Chaand bibi nay oska shukriya aada kiya- wo osay tasaliyaan denay k baad Shaad bibi k khemay main aa gaya- Begga begam apnay khemay mein tanha thi- os nay kaneez say kaha- “bahir jao aur Aafat jan ko yahan bhej do-“
Wo hukam ki taameel k liey bahir chali gaee- Aafat jan aik khawaja^sara ka naam tha- wo Begga begam ka wafa^daar bhi tha aur raaz^daar bhi—os nay khemay mein pohanch kar aadaab baja laatay hovay kaha- “malikah aaliyah k iqbal buland ho-“
Bega begam nay dheemi aawaz mein poocha- “tujhay jo kaam diya tah’ os ka hisaab denay kioun nahi aaee?”
Wo zara qareeb ho kar baray raaz^darana lehjay mein bola- “aap kay hukam ki taameel kar rahi thi- saaray entezamaat ho chukay hain- Aagaray wapis janay say pehlay he Chaand bibi ka khaitmah kar diya jaey ga-“
Begga begam nay kaha- “Chaand bibi aik jaan^nasheen ko janam denay wali hay- jab baans nahi rahay ga to baansari wajood main nahi aaey gi’ os sokan ko har haal mein khatam hona chahiey-“
(Jari hay ………………. Baqi kal.……)
|
|
|
Post by waqaar on Jul 1, 2007 16:37:06 GMT 5
tanweer Saaheb,
bahut khoob! abh~ii meNnay isay paRh~na Shuruu' kiYa hay.
keep up the good work. waQaar:)
|
|
|
Post by Tanweer on Jul 2, 2007 11:04:07 GMT 5
(Qist # 28)
Tamam khem^on kay andar shama^ien roshan theen aur khem^on k bahir mashalien jal rahi theen- en khem^on say door mazeed mashalien roshan thee- wahan musalah sipahi badshah salamat aur os ki begmaat ki hifazat k liey jaag rahay the- en wafa^daron ki mojodgi mein na dushman aa saktay the’ na mot aa sakti thi- koi zaroori nahi hay k mot teer-o-talwaar’ bandoqon aur topon k dhamakon say he aaey- wo to dabay qadmon bhi aa jaati hay aur wo bari raaz^daari say Begga begam ki sokano ki taraf aanay wali thi-
Doosary din khabar mili k Sher Shah Soori jahan ruka tha’ wahan say aagay chal para hay- doosri subah Chonsa pohanchnay wala hay- Humayun ka lashkar Chonsa k qareeb tha- os nay begmaat say kaha- “aab tom teeno ko wapis jana chahiey- hamien apnay lashkar mein pohanchna hay-“
Phir os nay hukam diya- “do kashtiyaan darya mein dali jaien- begmaat wapis jaien gi-“ Begga begam nay Humayun ka bazoo thaam kar kaha- “do nahi- aik kashti daali jaey- pehlay do begmaat yahan say jaien gi- dushman kal subah Chonsa pohanchnay wala hay- ham aaj shaam tak aap k saath rahien gay- phir doosri kashti mein wapis chalay jaien gay-“
Wo aisay piyaar say’ aisi dil^rubaee say baat manwati thi k wo foran maan jaata tha- wo apni begmaat k saath darya kinaray aa gaya- on k liey makhsoos rehnay wali kashtiyaan baray he shahana andaaz mein aaraasta ki jaati theen- badshah aur begmaat k bethnay k liey mulaa^em gad^day’ makhmali gao takiey aur tarah tarah ka aaraeshi samaan hota tha- darya ki lehron par lachak lachak kar chalnay wali kashtiyon mein aik kaneez saaz bajaati thi aur doosri geet gaati rehti thi- Humayun nay dono begmaat ko bari mohabat say rukhsat kiya- on k saath do kaneezon k elawah aik khawja^sara tha- aik malaah kashti k aakhri siray par betha hova tha aur doosra malaah kashti ko gehray paani mein la raha tha- Begga begam Humayun k hamrah khari on rukhsat honay wali begmaat ko dekh rahi thi aur zair-e-lab muskura rahi thi-
Wo shahi kashti doosray kinaray ki taraf ja rahi thi- darya ka paat kaafi chora tha- doosra kinara dhund mein lipta hova tha- dikhaee nahi day raha tha- kashti mein bethi hovi mutribah nay saaz chehra aur geet gaanay lagi thi-
Zindagi bari na^paeydar hoti hay aur mot bari sangdil ……. Wo mut^ranim geeton ka bhi gala ghont deti hay- darya labalab bhara hova tha aur lehrien biphri hovi theen- manjdhaar mein es ki gehraee ka andaazah nahi lagaya ja sakta tha- aik malaah jagah badal badal kar chapu chala raha tha aur doosra malaah ibteda mein jahan betha tha’ mustaqil wahien beth kar daaien baaien chapu chalaata ja raha tha- os k yon bethnay k peechay zabar^dast makaari thi-
Wo peetal k aik baray say mazboot dhakan par betha hova tha- os k neechay kashti k farsh mein pehlay he bohat bara sooraakh bana diya gaya tha- isi liey wo ibteda say os dhakan par jam kar betha hova tha takay paani ruka rahay- kashti k andar na aaey-
Phir aik malaah nay doosray ko isharaah kiya- os nay apni jagah say uth^tay he os peetal k dhakan ko utha kar door darya mein phenk diya- phir dono nay chapu^on ko bhi phenk kar achaanak he darya mein chah^laang laga di- kashti mein bohat bara sooraakh banaya gaya tha- paani bari tezi say andar aanay laga- begmaat cheekhnay chilaanay lagien-
Door sahil par kharay hovay Humayun nay garaj kar poocha- “wahan kiya ho raha hay ? malaah^on nay kashti say chah^laangien kioun lagaee hain ? “
Os nay sipahiyon ko hukam diya- “foran darya mein chah^laang lagao aur kashti tak pohanchnay ki koshish karo-“
Tamam sipahi teraaki jaantay the lekin aisay bhi maahir teraak nahi the k firdos makaani Babar ki tarah tertay hovay aik kinaray say doosray kinaray pohanch jaatay- darya mein foran he kashtiyaan daal di gaein- sipahi on mein beth kar manjhdar ki taraf janay lagay- begmaat ki kashti itni door thi k wahan tak pohanchnay k liey acha khaasa waqat darkaar tha-
Doosri taraf khawaja^sara nay aik bara sa kapra lay kar os soorakh mein thonsna chaha to paani mein chuh^pay hovay dono malaah^on nay kashti ko pakar kar zor zor say hilaana shoro kar diya- khawaja^sara tawazan qaeem na rakh saka- dagmagaata hova gehray paani mein gir gaya- dono begmaat shahaana tarz ki kursiyon say lipti hovi theen- kaneezien bhi cheekh rahi theen- paani itna bhar chuka tha k wo kashti aadhi say ziyadah doob chuki thi-
Sahil par Humayun bay^chen tha- idhar say odhar dorta ja raha the- Begga begam os k saath saath thi- wo preshaan ho kar keh raha tha- “ham kiya karien? Begmaat ko bachanay k liey hamien bhi darya mein utarna ho ga-“
Os nay foran hukam diya k darya mein aik aur kashti daali jaey- Humayun k saath Begga begam nay bhi chalnay ki zid ki- wo dono kashti mein sawar ho gaey- aik malaah bari tezi say os kashti ko k^hnay laga- lekin bohat dair ho chuki thi- wo kashti aahista aahista doobtay hovay apnay saath begmaat ko bhi dibo chuki thi-
(Jari hay ………………. Baqi kal.……)
|
|