|
Post by Tanweer on Jul 3, 2007 13:39:00 GMT 5
(Qist # 29)
Ye to sirf Begga begam he jaanti thi k os nay Chaand bibi k saath kis tarah paida honay walay jaan^nasheen ko dibo diya tha ? wahan say kuch faaslay par mach^heron ki basti thi- onhay hukam diya gaya k darya mein ja kar jaal phenkay jaien- foran he hukam ki tameel ki gaee- darya ki lehrien bari he mon zor theen- bari bari kashtiyon ko bhi apnay saath bahaa kar lay jaati theen- mahaarat rakhnay walay malaah on lehron say lartay hovay chapu k^hetay hovay kashtiyon ko doosray kinaray tak phonchatay the-
Jaal phenknay walay mach^heron ki koshishien bay^sood rahien- en begmaat ki laashien tak na mil sakien- en bay^gunahon ko aisi mot mili thi k na janazaah uth sakta tha aur na he ka kahien mazaar banaya ja sakta tha-
Humayun sadmay say sar pakar kar beth gaya- Begga begam os say hamdardi kartay hovay os k qadmon mein beth kar boli- Ham Chaand bibi aur Shaad bibi ko apnay hamrah laey the- kaash onhay apnay saath he wapis lay jatay- lekin muqadar k likhay ko kon badal sakta hay ? ham tomhien tanha nahi janay dein gay- Khuda say dua karo’ hamien fatah naseeb ho- tom hamaray saath wapis jao gi-“
Doosray din Chonsa mein Sher Shah Soori k lashkar say takrao hova- ghamsaan ka run para- dono taraf k sipahi ji^daar the- marna bhi jaantay the aur maarna bhi jaantay the- es k bawajood Sher Shah Soori raftah raftah havi ho raha tha- os k lashkar mein haatiyon ki taadaad ziyadah thi- wo pahar jaisay haathi Humayun k sipahiyon ko door tak rageed^tay chalay jaatay the- nateejah ye hova k lashkar muntashir ho gaya- jis ka jahan mon para wo odhar bhaagnay laga- sipeh^salaar nay Humayun say kaha- “jang ka paansa palat gaya hay – Zil-e-Subhani ki salamati hamara awaleen farz hay- aap Aagaray chalay jaien- ye khaadim dushman ko roknay ki poori koshish karta rahay ga-“
Jang k medaan mein aagay barhnay k liey kabhi musleh^tan peechay hatna parta hay- daryaey Jamna k doosray kinaray par os k hazaaron foji kashtiyon par mojood the- Humayun wahan pohanch kar onhay os paar say es paar la kar Sher Shah Soori ka raasta rok sakta tha- lehaza wo ghora doraata hova shahi khemay ki taraf wapis aaya to pata chala’ dushman k do haati dandana^tay hovay idhar chalay aaey the- Begga begam jan bachanay k liey aik ghoray par sawar ho kar kisi doosri simt chali gaee hay-
Sipeh^salaar nay kaha- “Zil-e-ellahi! Ye khadim malikaah aaliya ko aap tak zaroor pohnchaey ga- aap foran Aagaray ka rukh karien-“
Humayun do sipahiyon k saath ghoray doraata hova wapis darya kinaray aa gaya- idhar os nay Aagarah pohanchnay k liey darya ko aboor kiya’ odhar os ka sipeh^salaar maara gaya- Sher Shah Soori ko os k sipahiyon nay etelaa di k Humayun wapis apnay doosray lashkar ki taraf gaya hay- oski begam ko giriftaar kar liya gaya hay-
Sher Shah Soori nay foran hukam diya- “Khatoon ka ehteraam kiya jaey- koi na^mehram on k saamnay na jaey- na he koi onhay haath lagaanay ki juraat karay- aagay ja kar dekho …… Humayun halat-e-jang mein hay ya nahi ?”
Sher Shah Soori nay sooraj dhalnay tak entezaar kiya- osay etelaa mili k humayun ka jo lashkar muntashir ho gaya tha’ wo tamam sipahi darya kinaray pohanch kar mutahid ho gaey hain- es kinaray jitni kashtiyan theen’ onhay darya k os paar lay gaey hain-
Aab soorat^haal ye thi k Sher Shah Soori darya aboor nahi kar sakta tha- doosray kinaray hazaron kashtiyan theen- on par musalah sipahi taaza^dam ho kar phir say jang larnay k liey tiyaar the- idhar Humayun ka pal^ra es liey bhaari tha k os kinaray par os nay bari bari topien nasb kar rakhi theen aur idhar Sher Shah Soori k haati darya mein nahi utar saktay the-
Sher Shah Soori entehaee naik aur paak^baaz musalmaan the- os nay mach^heron ki basti say aik kashti mangwaee aur Begga begam ko os mein bitha kar nihayat izat-o-ehteraam k saath wapis bhej diay-
Humayhun Aagaray k mahal mein wapis pohanch gaya tha- Maham begam nay osay galay laga kar duaien dein- os ki peshaani ko choom kar Khuda ka shukar adaa kiya k wo zindah salamat wapis ayaa hay-
Humayun sadmaat say choor tha- wo beth^tay hovay bola- “ham nay shikist nahi khaee hay- aarzi tor par paspa hovay hain- Sher Shah Soori daraya aboor karnay ki juraat nahi kar sakay ga- lekin na harnay k bawajood ham buri tarah haar gaey hain-“
Maa nay shaanay par haath rakh kar poocha- “apni baat ki wazahat karo-“
Wo dilbardaashta ho kar bola- “Chaand bibi aur Shaad bibi Allah ko piyaari ho gaee hain-“
Maham begam k zehan ko aik jhatka sa laga- wo roodaad suna raha tha k kis tarah wo dono darya mein gharq ho chuki hain? Jin do malaahon nay namak^harami ki hay’ onhay talaash kiya ja raha hay- Chaand bibi k saath paida honay wala jaan^nasheen bhi gharq ho gaya tha- Maham begam nidhaal si ho kar beth gaien- Humayun nay kaha- aur …. Aur hamari Begga ….. Begga……. “
Wo boltay boltay ruk gaya- aisa lag raha tha jaisay aansoo halaq mein aa kar atak gaey hon- Maham begam nay osay sawaliyah nazron say dekha- wo sar jhuka kar bola- “ wo medaan-e-jang mein ham say bich^har gaee hay- Khuda jaanta hay wo kahan ho gi ? kis haal mein ho gi ?”
(Jari hay ………………. Baqi kal.……)
|
|
|
Post by Rafi Tabasum on Jul 4, 2007 0:02:48 GMT 5
Wahhh Silsla Khoob chal raha hay Tanweer sahib jari rakhiay
|
|
|
Post by Tanweer on Jul 4, 2007 21:30:19 GMT 5
(Qist # 30)
Maham begam k andar khushi ki aik lehar si uthi- Chaand bibi aur aik jaan^nasheen k doob marnay ka jitna sadmah tha- Begga begam k bich^har’ kahien gum ho janay say itni he aasoodgi mil rahi thi- dil say dua nikal rahi thi k wo kahien mar k^hapjaey- kabhi wapis na aaey-
Wo aik aah bhar kar boli- “hamaray khandaan mein asia bura waqat pehlay kabhi nahi aaya- ba^yak waqat teen bahoien Allah ko piyari ho gaien-“
Humayun nay chonk kar maa ko dekha phir jaldi say kkaha- “aap say andazay ki ghalati ho rahi hay- Khuda na karay k Begga begam ko mot aaey- hamra dil kehta hay’ wo zindah hay-“
Aisay waqat etelaa mili k Kamran Mirza Lahore say apnay masaa^hebeen k saath aaya hay aur sharf-e-baaryabi chahta hay-
Humayun nay hukam diay- “osay foran pesh kiya jaey…..”
Thori dair baad he Kamran Mirza dorta hova aaya phir os k qadmon say lipat kar rotay gir^giratay hovay maafi maangnay laga- Maham begam nay osay hiqarat say dekha aur betay say kaha- “esay hargiz maaf na karna- ye aasteen ka saan^p hay- isi nay Sher Khan ko hamlay ki daawat di thi-“
Humayun nay kaha- “aisi baat nahi aakam madar ! Sher Khan Soori jangjoo tabiyat ka hamil hay- wo Dehli k takht par qabzah jamanay k khawab dekh raha hay- Kamran Mirza os say saaz baaz na karta tab bhi wo ham par hamlah karnay wala tha-“
“Chalo ye he sahi- es nay tomharay khilaaf dushman say saaz baaz to ki hay ?“
“Bay^shak ! os nay bohat bara jurm kiya hay- aik badshah ki nazron mein os ka jurm na^qabi-e-maafi hay- lekin firdos makaani bawa hazoor nay aakhri saanson mein hamien nasihat ki thi k ham bhaiyon k haqooq ada kartay rahien- agar on say chohti bari ghalati ho jaey to osay faraagh dili say maaf kar dein-“
“Firdos makaani ki nasihatien apni jagah hain- zara aqal say socho agar os ki saazish kaamyab ho jati to kiya es waqat tom zindah salamat nazar aatay?”
“Aakam madar ! aap ye dekhien k bhaee nay dushmani ki lekin osay apnay baap k lahu par kitna etemaad hay ? ye baray yaqeen say yahan aaya hay k ham osay maaf kar dein gay- ham os k yaqeen ko majrooh nahi honay dein gay-“
Humayun nay Kamran Mirza ko dono baazu^on say thaam kar uthaya phir osay galay lagatay hovay kaha- “ham nay maaf kiya’ hamaray Khuda nay maaf kiya- agar subah k bhoolay ki tarah shaam ko ghar aaey ho to aaindah aisi ghalati kabhi na karna-“
Maham begam apnay betay ko dekh kar sochnay lagi- “ ye ba^yak waqat teen begmaat say mehroom ho kar sadmaat say toot raha hay- agar marhoom walid ki nasihat par amal kartay hovay sotelay bhaee ko maaf kar k qalabi sakoon hasil kar raha hay to esay aisa karnay diya jaey-“
Ishaa k waqat etelaa mili k malikaah aaliyaa tanha darya aboor kar k wapis aa gaee hain- Humayun namaaz say farigh hova tha- ye khabar suntay he wahan say dorta hova mahal k mukhtalif his^son say guzarta hova Begga begam k esteqbaal k liey janay laga- aik rah^daari mein samana hova to osay dekhtay he firt-e-mussarat say galay laga liya- nidaamat say bola- “hamien sharmindagi hay- ham tomhien bhataknay k liey chohr aaey the-“
Wo boli- “Khudara ! aap nadim ho kar hamien sharmindah na karien- aap halaat say majboor the- medan-e-jang mein bhag^dar machi hovi thi- dushman k haathi pagal ho rahay the- ham aap ka entezar na kar sakay- khud he aap say bich^har gaey-“
Maham begam aik kaneez k saath wahan aaee- kaneez k haathon mein aik bara sa thaal tha- os mein sonay k sik^kay bharay hovay the- os nay wo thaal bahoo par nich^hawar kar k aik khawaja^sara ko detay hovay kaha- “esay maskino aur muhtaajon mein taqseem kar diay jaey-“
Phir os nay bahoo say poocha- “tom tanha kaisay yahan tak pohanchien?”
Begga begam nay saas aur shohar ko dekhtay hovay kaha- “agar^chay Sher Khan Soori aap ka dushman hay lekin nihayat he naik ta^enat aur sacha musalmaan hay- os nay hamien hijaab mein rakha phir mach^heron ki basti aik kashti mangwa kar hamien yahan pohancha diya- ham os naik dil insaan ka ehsaan kabhi nahi bhoolien gay-“
(Jari hay ………………. Baqi kal.……)
|
|
|
Post by Tanweer on Jul 5, 2007 10:54:33 GMT 5
(Qist # 31)
Maham begam na^gawaari say mon bana kar wahan say chali gaee- Humayun nay kaha- “bay^shak- dushman agar aalaa zarf hay to os ka ehsan maan^na chahiey aur os ki qadar bhi karni chahiey- ham apnay qaasid k zarieay os ka shukriyah ada karien gay-“
Wo dono thori dair tak batien kartay rahay- phir Begga begam nay kaha- “hamari nigaahon k saamnay do begmaat darya mein doob gaien- medan-e-jang mein haathiyon nay hamien bohat he sara^seemah kiya- ham thakan say choor ho gaey hain- aasaab jawab day rahay hein- ham aaraam karna chahtay hain-“
Humayun osoay oski khawab^gaah tak chohr kar chala gaya- os k jaatay he os nay apnay raaz^daar khawaja^sara Aafat Jan ko talab kiya- phir kaha- “too nay hamara bohat bara kaam kiya hay- ham tujhay maal-a-maal kar dein gay- kiya tujhay yaqeen hay k wo dono malaah girif^taar nahi kiey ja sakien gay ?”
Os nay dast^basta arz kiya- “mein nay koi kacha kaam nahi kiya hay- wo dono malaah sonay k pachaas pachaas sik^kay lay kar bohat khush ho gaey the- onho nay apni zindagi mein pehlay kabhi itni dolat nahi dekhi thi- isi liey jaan par k^hel kar onho nay itna bara kaam kiya hay-“
“Lekin wo kahan gum ho gaey hain ? onhay kisi k haath nahi aana chahiey-“
“Malikaah aaliya ! khatir jamaa rakhien- mein nay dono ko takeed ki thi k wo tertay hovay bagh-e-Gul Afshan ki taraf jaien- wahan hamaray wafa^daar sipahi mojood hon gay- wo onhay tez raftaar ghoron par bitha kar yahan say door kisi doosray elaaqay mein pohancha dein gay-“
Begga begam nay poocha- “kiya onho nay aisa kiya hay ?”
Wo apna aik haath peshaani tak lay jatay hovay bola- “mein aik baar phir malikaah aaliya k enaam ki haqdaar hon- abhi thori der pehlay he Gul Afshan say yahan aaee hon- etmenaan rakhien- aap ka tamam kaam hasb-e-mansha mukamal ho chuka hay-“
“Kaisay hova hay ? wazahat karo-“
wo malaah tertay hovay Gul Afshan k qareeb pohanchay to wahan hamaray sipahi teer-o-kamaan k saath tiyaar kharay hovay the- onho nay dono ko teeron say ch^halni kar diya aur on ki laashien utha kar darya mein phenk dein-“
Begga begam khushi say uth kar khari ho gaee- phir boli- “shabaash to waaqi hamara wafa^daar aur jaan^nisaar hay- bay hisaab enamaat ka mustahiq hay-“
Os nay aik sandooqchi say sachay aur besh qeemat moti^yon ka haar nikaala- phir oski hateli par rakhtay hovay kaha- “ye kuch bhi nahi hay- Dehli pohanch kar ham do kos k raqbay tak teray naam zameenien likhwa dein gay-“
Os nay khush ho kar kaha- “Malikaah aaliya ka iqbal buland ho ….. es haqeer bandi nay aap he ki khidmat k liey janam liya hay- aap nay farmaya tha’ yahan wapis aanay k baad mujhay aik aur aaham farz anjaam dena ho ga ?”
Begga begam nay osay sochti hovi nazron say dekha phir kaha- “haan- aik honay wali sokan reh gaee hay- jaan^nasheen paida karnay wala wo kaanta bhi nikalna hay-“
Aafat Jan nay kaha- “wo apnay naam ki hovi haveli mein aish kar rahi hay- wahan oski khidmat k liey shaid do chaar kaneezien’ do chaar khawaja^sara aur do chaar urda^begniyaan mojood rehti hain ?”
Begga begam nay hukam diya- “on ki sahee tadaad maloom karna phir apnay wafa^daar sipahiyon k saath yon hamlah karna k urda^begniyaan aur khawaja^sara os ki hifazat na kar sakien- balkay sab he os k saath jahanam mein pohanch jaien-“
Begga begam sochnay k andaaz mein idhar odhar tehlnay lagi- phir boli- “es maa^malay nein ehtiyaat laazmi hay- os haveli mein Akhtari k saath sab he ko mot k ghaat utar jana chahiey- agar aik bhi zindah bachay ga to wo teray khilaaf chasham deed gawah ban jaey ga-“
“Aisi nobat nahi aaey gi- hamaray sipahi wardi k bajaey saadah libaas aur niqaab mein rahien gay- koi onhay pehchaan nahi paey ga-“
“Ye kaam entehaee safaee say ho jaey ga to hamien qalabi sakoon hasil ho ga-“
“Khuda nay chaha to aap ki ye murad bhi poori ho gi- agar nagawar-e-khatir na ho to aik sawal karnay ki juraat kar rahi hon-“
Begga begam nay osay sawaliyah nazron say dekha- wo sar jhuka kar bola- “aap kab tak khatraat say k^helti rahien gi ? beta paida karnay wali kitni sokono say peecha chuh^raati rahien gi ?”
Wo aik gehri saans lay kar boli- “bas aik bar^as aur …… Insha Allah aglay bar^as ham zaroor aik jaan^nasheen ko janam dein gay- oskay baad jitni bhi sokanay aaien jitnay bhi betay paida karien- hamaray liey koi faraq nahi paray ga- kioun^kay ham pehli begam hain aur pehla jaan^nasheen ham paida karien gay-“
“Mein jaa rahi hon- kal raat aap ko aik khush^khabri sunao gi-“
ye keh kar wo sar jhukaey ultay qadmon chalta hova khawab^gaah say bahir chala gaya-
(Jari hay ………………. Baqi kal.……)
|
|
|
Post by Tanweer on Jul 7, 2007 18:03:03 GMT 5
(Qist # 32)
Akhtari k din raat os haveli mein guzar rahay the- pehlay jo aik maamooli si larki thi’ aab wo zameen jaedaad waali ho gaee thi- oski ki khidmat k liey chaar kaneezien theen- nigraani aur hifazat k liey khawaja^sara aur urda^begniyaan theen- itna sab kuch pa kar bhi wo maghroor nahi hovi thi- kaneezon k saath aik saheli ki tarah hansti bolti rehti thi- kisi ko shahana andaaz mein koi hukam nahi deti thi- wahan ka mahol bilkul apnay ghar jaisa bana rakha tha- wo sab jaisay os k rishtay^daar banay hovay the-
Wahan aik khawaja^sara ka naam Roohi Saba tha- wo shahi mahal mein bhi Akhtari ki nigrani kiya karta tha- mahal mein sab he khadma^on say bari sakhti say pesh aaya kartay the- lekin wo Akhtari k saath bohat he narmi aur mohabat say pesh aaya karta tha- oski nazrien kehti theen k wo dil he dil mein osay chahnay laga hay- aik zankhay ki chaahat izat aabroo ko nuqsaan nahi pohanchati- wo sab kuch ho sakta hay magar bad^niyat nahi hota- es liey Akhtari bhi bila jhi^jak os say hansti bolti rehti thi-
Aab to wo badshah Humayun say mansoob ho gaee thi- Rohi Saba kuch bujh sa gaya tha- aab aik khidamt^gaar ki tarah muhtaat aur musta^id rehta tha- Akhtari nay kaha- “Rohi ! tom bohat achi ho- mujh par hamesha meharbaan raha kartay ho- aab mein tom par meharbaan raha karon gi- badshah salamat ki mankooha ban^nay k baad bhi tomhein apni saheli bana kar rakhon gi-“
Roohi nay kaha- “mein tomhari taraf say fikar^mand rehti hon- duaien maangti rehti hon- Khuda tomharay tamam khawab pooray karay- magar tom dekh rahi ho’ begmaat kis tarah aik doosray k khilaaf sazishien karti rehti hain ? tom maasoom ho’ nadaan ho’ shahi hat^kandon ko nahi samajhti ho-“
Wo boli- “mein nahi samajhti- lekin tom nay Lahore say Dehli tak shahi mahalon mein bohat kuch dekha hay- mujhay samjhatay raha karo- tom kiya samajhtay ho’ kiya meray khilaaf bhi sazishien hon gi? Kiya mujhay badshah salamat say mansoob nahi honay diya jaey ga?”
Ye malikaah aaliyah Begga begam bohat he khatar^naak hain- badshah salamat ko kuch ghol kar pilaati rehti hain- wo on ki himayat mein ziyadah boltay hain- onhi ko apnay qareeb rakhtay hain aur har baat maantay rehtay hain- mein darti hon k wo tomhari taraf say badshah salamat ka dil na pher dein-“
Wo boli – “koi kitni he sazishien kar lay’ mujhay jeotashi mahraaj ki pesh^goi par yaqeen hay- mein aik raat ki malikaah zaroor bano gi-“
“Aik raat ki batien na karo- Khuda tomhien hazaar raatien day-“
Wo inkaar mein sar hila kar boli- “tomhari ye dua qabool nahi ho gi- jeotashi mahraaj ki pesh^goi at^tal hoti hay- shaid aik raat k baad meray naseeb phoot jaien gay-“
Ae^hay…… naseeb phootien tomharay dushmano k……. aisi batien zaban say na nikalo-“
“Tom nay aik kali ko dekha hay na …..? tamam raat os par shabnam parti hay- subah tak wo phool ban jaati hay- os k baad kali nahi rehti….. shama ki zindagi hay aik raat doosri subah wo tamam ho jati hay-“
Aisay he waqat aik kaneez dorti hovi on ki taraf aae- wo buri tarah sehmi hovi thi- haklaatay hovay boli- “wo…….. ghazab ho gaya- kuch log na^ngi talwaarien liey haveli mein ghus aaey hein- urda^begniyan on ka muqabilah kar rahi hain-“
Roohi Saba nay niyaam say talwaar nikaaltay hovay kaneez say kaha- “tom kahien ja kar chu^hp jao- mein achi tarah samajh gaee hon’ wo log mustaqbil ki malikaah ko halaak karnay aaey hain-“
Kaneez dorti hovi wahan say chali gaee- Rohi Saba nay darwazay ko andar say band kiya phir Akhtari say kaha- “meray saath aao-“
Os nay poocha- “kiya ham haveli k pichlay darwazay say nahi nikal saktay?”
“Hamalah karnay walay nadaan nahi hongay- onho nay haveli ko chaaron taraf say gher rakha ho ga-“
Wo tezi say chalta hova aik deewar k paas aa gaya- wahan aik bari si tasweer lagi hovi thi- os nay osay aik taraf hataya- os k peechay aik khaana dikhaee denay laga- os khanay mein lohay ki aik keel lagi hovi thi- os nay os keel ko pakar kar aik taraf say doosri taraf ghomaya to qareebi deewar ka aik hisah darwazay ki tarah k^hulta chala gaya-
(Jari hay ………………. Baqi kal.……)
|
|
|
Post by Tanweer on Jul 8, 2007 14:18:08 GMT 5
(Qist # 33)
Sadiyon say rajaa^on’ maharajaa^on’ badshah^on aur shehen^shahon k mahalon aur haveli^on mein khufiyaah darwazay aur the^khanay hova kartay the- aisi khufiyah panah^gaahon ka ilm sirf badshah^on ko hova karta tha- jo memaar aur karigar raazdari say ye sab kuch banaatay the’ onhay baad mein qatal kara diya jata tha takay mahal ki khufiyah panah^gahon ka raasta kisi aur ko maloom na ho sakay-
Maham begam nay Rohi Saba ko Akhtari ka nigraan-e-khaas muqarar kiya tha- aur osay ye raaz bataya tha- Akhtari nay bari heraani say os sarakti hovi deewar ko dekha jo darwazay ki tarah raasta bana rahi thi- Rohi Saba nay os tasweer ko dobarah deewar say laga diya- phir aik shama^daan utha kar bola- “foran andar chalo…..”
Wo os chor darwazay say guzar kar aik choh^tay say khaali kamray mein aa gaey- wahan bhi aik deewar par lohay ki keel lagi hovi thi- Rohi Saba nay osay ghumaya to darwaza osi tarah sirakta hova band ho gaya- andar koi khirki ya roshan^daan nahi tha- ooper ki taraf do chaar choh^tay choh^tay soraakh banay hovay the- wo aik oonchi si choki par charh kar os soorakh k zarieay doosri taraf dekhnay laga-
Akhtari ki khawab^gaah dikhaee day rahi thi- os k darwazay ko bahir say peeta ja raha tha’ osay tornay ki koshishien ki ja rahi theen- os nay Akhtari say kaha- “choki k ooper chali aao- ham yahan say dekhien gay k wo dushman kon hein?”
Wo bhi os choki par charh kar aik soorakh k zarieay apni khawab^gaah mein jhanknay lagi- Rohi Saba nay shama bujha di takay dushmano ko roshni ki halki si bhi jhalak na milay-
Kamray ka darwazah toot gaya- chaar afraad nan^gi talwarien liey andar aaey- on k chehron par dha^tay bandhay hovay the- wo kamray mein idhar odhar bari tezi say Akhtari ko talash kar rahay the- aik nay kaha- “wo yahan nahi hay-“
Doosray nay kaha- “es kamray ka darwazah andar say band tha- es ka matlab hay’ wo kisi khufiyah darwazay say doosri taraf nikal gaee hay- yahan koi chor darwazah talaash karo-“
Os nay ye kehtay hovay apnay mon par say niqaab utaar diya- Akhtari aur Rohi Saba dono he osay dekh kar chonk gaey- wo malikaah aaliyaah Begga begam ka khaas khidmat^gaar khawaja^sara Aafat Jan tha- wo aik tijori k paas aa kar osay tor raha tha- doosray teen afraad chor darwazah talash kartay phir rahay the-
Akhtari gehri taareeki mein Rohi Saba say lagi khari thi- os khawaja^sara ka dil tezi say dharak raha tha- os nay osay aik baazu k hisaar mein lay liya- wo sargoshi mein boli- “kiya kar rahi ho?”
Wo bola- “tom choki say gir paro gi- yahan koi khatka ho ga to odhar walay es taraf mutawajah ho jaien gay-“
Wo soorakh say jhanktay hovay boli- “wo dekho! Kam^bakhat aafat Jan tijorii tor kar zewaraat nikal raha hay….. haey Allah ! wo qeemati heera Maham begam nay mujhay enaam k tor par diay tha-“
Wo dekh rahi thi- Aafat Jan nay jaldi say os heeray ko apnay libaas k andar chuh^pa liya tha- odhar akhtari ki qurbat say Rohi Saba ki halat gher ho rahi thi- wo jazbaat say bay^haal ho raha tha- dil he dil mein keh raha tha- “Ya Khuda! Tu behtar jaanta hay’ mein teesri jins nahi hon- mujhay jab^ran aisa banaya gaya hay- mein kiya karon? Behakna bhi chah^on to behak nahi sakon gi-“
Phir wo sard aah bhar kar sochnay laga- “ham jaisay khawaja^saraon ko sakhti say hukam diya jata hay k zanana libaas pehan^ien aur auraton k andaaz mein boltay rahien-“
Sochatay sochtay oski aaunkhon mein aansoo aa gaey- aisay waqat wo sirf ro he sakta tha’ kuch kar nahi sakta tha- Akhtari nay chonk kar kaha- “wo dekho…..! ye log osi tasweer k qareeb aa rahay hein-“
Wo bola- “fikar na karo- mein nay yahan ki keel hataa di hay- bahir waali keel bay^kar ho gaee hay- wo darwazah nahi khol sakien gay- hamien surung k raastay faraar ho kar kisi bhi tarah mahal mein pohanchna ho ga- wahien hamari salamati hay-“
Doosri taraf wo cheekh cheekh kar aik doosray say bol rahay the- “ye dekho! Os tasweer k peechay aik lohay ki keel hay- magar samajh mein nahi aata’ osay kis tarah estemaal kiya jaey? Ye ghoom to rahi hay lekin kahien say koi chor darwazah nahi khul raha hay-“
Andar tareeki mein wo dono oonchi choki say utar gaey the- Rohi Saba osay aik baazu mei samait kar tareeki mein raasta tat^tolta hova aik zeenay tak aa gaya- phir bola- “tom meray peechay raho- mera daaman thaam lo- aagay zeenah hay- aik aik pae^daan par sambhal sambhal kar qadam rakhti raho-“
Wo oski hidayat par amal karti hovi zeenay say utarnay lagi- neechay pohanch kar Rohi Saba nay shama roshan kar di- phir wo dono os ki roshni mein aik surung say guzarnay lagay- taqreeban aik kos ka faslaah te karnay baad onhay doosra zeenah mila- wo os par ch^hartay hovay ooper aa gaey- Akhtari nay dekha’ wahan ghoron ka astabal bana hova tha-
Sawari k liey ghoray mil gaey- wo taqreeban aik ghantay baad Aagaray k shahi mahal mein pohanchay- abhi raat ka pehla pehar tha- taqreeban sab he jaag rahay the- wo dono seedhay Maham begam k khidmat mein hazir ho kar adab say jhuk gaey- os waqat Begga begam’ Humayun k saath wahan mojood thi- Akhtari aur Rohi Saba ko zindah salamat dekh kar preshan ho gaee- wo Maham begam ko apni roodaad suna rahay the- kabhi Akhtari bol rahi thi’ kabhi Rohi Saba bol raha tha- jab onho nay khawaja^sara Aafat Jan ka naam liya to Maham begam nay chonk kar Begga begam ko dekhtay hovay kaha- “ye Aafat jan to tomhara khaas khidmat gaar hay?”
Begga begam nay hichkicha^tay hovay kaha- “nahi bhala wo Akhtari ko halaak karnay kioun jaey ga? Ye osay pehchan^nay mein ghalati kar rahay hein-“
Maham begam nay betay say kaha- “saanch ko aanch kiya ….? Sipahiyon ko hukam do- osay talaash kiya jaey- jahan bhi milay osay giriftaar kar k yahan hazir kiya jaey-“
(Jari hay ………………. Baqi kal.……)
|
|
|
Post by Tanweer on Jul 9, 2007 14:04:55 GMT 5
(Qist # 34)
Hukam diya gaya- foran he os ki tameel ki gaey- thori der baad he mahal ki urda^begniyaan Aafat Jan ko hirasat mein lay kar on k saamnay hazir ho gaien- Humayun nay sakhat lehjay mein poocha- “kiya tom Akhtari ko halaak karnay oski haveli mein gaee theen?”
Wo inkaar mein sar hila kar bola- “mujh say bari say bari qasam lay lein- mein nay to odhar ka rukh bhi nahi kiya hay-“
Akhtari nay Maham begam k saamnay dast bastah sar jhuka kar kaha- “os nay wahan meri tijori tori hay- zewaraat nikaalay hain- aap nay mujhay aik qeemati heera inayat farmaya tha- es nay wo heera chura kar apnay libaas mein chuh^paya tha- mumkin hay’ wo abhi es k libaas mein ho?”
Maham begam nay aik urda^begni ko hukam diya- “es ki jamaah talashi li jaey-“
Aafat jan ka chehra zard par gaya tha- urda^begni hukam ki tameel kar rahi thi- soki talaashi lay rahi thi- jalad he wo heera os k libaas say bar^aamad ho gaya- Aafat jan foran he Humayun k qadmon kein gir kar gir^garaanay laga- “mujhay maaf kar dein badshah salamat! Mein sirf choori ki neeyat say wahan gaee thi- chori ka tamam maal wapis kar don gi- aik baar meri es ghalati ko maaf kar dein-“
Rohi Saba nay kaha- “ye jhoot bol rahi hay- ye aur es k saathi na^ngi talwarien liey Akhtari begam ko talaash kar rahay the-“
Humayun nay Aafat jan ko thokarien maartay hovay kaha- “sach ugal day…… warnah tujhay jalaad k hawalay kar diya jaey ga-“
Aafat jan nay Begga begam ko reham talab nazron say dekhtay hovay kaha- “aap he mujhay bacha sakti hein Malikaah Aaliyah! Ye na^cheez aap ki namak khawar hay- mein to wohi karti hon’ jo aap kehti hain-“
Begga begam nay preshan ho kar Humayun ko dekha- phir Aafat jan ko thokarien maartay hovay kaha- “kam^bakhat! Jhooti! Makaar! Tu hamaray kehnay say kiya karti hay? Kiya ham nay tujhay os haveli mein chori karnay ka hukam diya tha?”
Maham begam nay sakhat lehjay mein kaha- “ye chori karnay nahi ……. Akhtari ko halaak karnay gaee thi-“
Humayun nay Aafat jan say kaha- “ham aakhri baar poochtay hain’ jo sach hay wo bolo- warnah hamaray jalaad sach ugalwana khoob jaantay hain-“
Wo sajday mein gir kar bola- “nahi nahi- mujhay jalaad k hawalay na karien- mein sach bolti hon- Malikaah Muazemah nay hukam diya tha k Chaand bibi ko darya mein gharq kar diya jaey- kioun^kay wo es saltanat ka jaan^nasheen paida karnay wali theen-“
Maham begam aur Humayun nay aik^dam say chonk kar bay^yaqeeni say Begga begam ko dekha- wo on say nazrien chura kar Aafat jan ko ghoornay lagi- wo bol raha tha- “mein nay on ki kashti mein sooraakh karaya tha- os kashti mein zil-e—subhaani ki aik begam k saath doosri begam bhi doob marien-“
Humayun nay qehar alood nazron say Begga begam ko dekha- wo seham kar peechay hat^tay hovay boli- “ye jhoot bol rahi hay- ham par bohtaan baandh rahi hay- kiya aap aik zaleel khawaja^sara k ilzaamaat ko durust maan lein gay?”
Aafat jan sajday say uth kar dono haath phela kar bola- “Malikaah Aaliyaah! Sach bol dein- mein bay^qasoor hon- hukam ki bandi hon- jo hukam diya jaey ga’ wohi karon gi aur mein nay wohi kiya hay-“
Phir os nay Maham begam ki taraf rukh kartay hovay kaha- “Malikaah Moazemaah nahi chaahti theen k on ki koi bhi sokan es takhat ka jaan^nasheen paida karay- do begmaat ko dibonay k baad Akhtari begam reh gaee thi- ye bhi beta paida karnay wali theen- es liey mujhay hukam diya gaya k aaj he en ka bhi kaam tamam kar diya jaey-“
Phir wo Humayun ki taraf dono haath phela kar bola- “Alam Panaah! Aap sachay motiyon ki es maala ko to pehchaan saktay hein jo aap nay Malikaah Moazemaah ko aata ki thi- onho nay wo maala meri khidmaat k silay mein mujhay inayat ki hay- wo es waqat meray hujray mein rakhi hay- mein osay abhi pesh kar sakti hon-“
Begga begam buri tarah sehmi hovi thi- Humayun osay baray dukh say dekh raha tha- wo os par andhaa etemaad karta tha- magar aaj wo etemaad ka sheesh mahal toot kar chikna choor ho gaya tha- Maham begam nay betay say kaha- “tom yehi samjhtay the k ham khaam^khaah bari bahu ki mukhalfat kartay rehtay hain- bay^shak- Khuda k ghar dair hay’ andher nahi hay- aaj Begga begam ka as^Sali chehra bay^niqaab ho gaya hay-“
Humayun nay hukam diya k Aafat jan ko jalaadon k hawalay kar diya jaey aur Akhtari ko shahi mahal mein ba^hifazat’ araam say rakha jaey-“
Os kay hukam k mutabiq wo sab wahan say chalay gaey- Begga begam bari sakhat jaan thi lekin os waqat os ki aaunkhon mein aansoo aa gaey the- jis Humayun ko dil-o-jaan say chahti thi- osay hamesha k liey khonay wali thi- Maham begam nay kaha- “jaan-e-madar! Jab tak ye naagan hamaray khandaan mein rahay gi- kabhi tomhara jaan^nasheen paida nahi honay day gi aur na he khud paida kar sakay gi- hamari salaah hay k esay mot k ghaat utaar diya jaey-“
(Baqiyaah AAKHRI qist mein.……)
|
|
|
Post by Tanweer on Jul 10, 2007 17:06:16 GMT 5
(Aakhari Qist)
Wo inkaar mein sar hila kar bola- “nahi- aakam madar ham nay es k saath bohat acha waqat guzara hay- es k aaba-oajdaad k saath hamaray aaba-o-ajdaad k bohat achay marasim rahay hain- es nay hamaray honay walay aik jaan^nasheen ko darya mein diboya hay- doosray ko bhi halaak karanay wali thi- es ka jurm na^qabil-e-maafi hay- lekin ham esay saza^ey mot nahi dein gay- ye zindah reh kar omar bhar ye zilat uthati rahay gi k badshah nay osay hamesha k liey thukra diya hay- ye es mahal mein aur hamari saltanat mein nahi rahay gi-“
Urda^begniyon ko bulaya gaya- wo aurtien sipahiyon ki wardi mein na^ngi talwarien shaano par rakhay ghoomti phirti theen- Humayun nay onhay hukam diya- “ye hamari malikaah nahi rahi hay- esay mahal say bahir lay jao- sipahiyon say kaha jaey k raaton raat safar kartay hovay esay hamari saltanat say bahir pohancha diya jaey-“
Begga begam urda^begniyon k darmiyaan sar jhukaey os khawab^gaah say bahir chali gaee- Maham begam nay kaha- “jaan-e-madar! Apnay halaat ko achi tarah samjho- dushman mahal k bahir he nahi andar bhi hain- sotelay bhi hain’ begmaat bhi hain- tomhien kisi begam ki mohabat mein andhay ban kar nahi rehna chahiey-“
Wo qareeb aa kar boli- “apni maa ki os tarap aur bay^cheni ko samjho- ham apni zindagi mein tomhara aik jaan^nasheen chahtay hain- jis tarah ye Begga begam nahi chahti thi osi tarah tomharay sotelay bhaee bhi nahi chahien gay k tomhara koi jaan^nasheen paida ho- wo tomharay baad aur apnay baad apnay he bayton ko jaan^nasheen bana^na chahien gay-“
Wo bola- “bay^shak- aap jahan deedah hain- hukamrano k hathkandon ko khoob samajhti hain- ham tadabur say aur zor-e-bazoo say firdos makaani bawa hazoor ki saltanat ko qaeem rakhnay ki koshishien kartay rehtay hain- lekin en ki nasal ko aagay barhana hamaray ikhtiyaar mein nahi hay- qudrat ko jab manzoor ho ga’ tab he aik jaan^nasheen paida ho ga-“
Wo boli- “jaan-e-madar! Qudrat ko manzoor hay- Chaand bibi aik baytay ko janam denay waali thi- lekin os naagan nay osay das liya- Akhtari say bhi poori tawaqo hay- wo zaroor aik pota hamari gd mein day gi-“
“Khuda karay- aisa he ho-“
“Naik kaam mein dair nahi karo gay to aisa zaroor ho ga- dair karo gay to dushmano ko mouqa milay ga-“
“Dushmano ko ye kehnay ka mouqa bhi milay ga k do begmaat k martay he ham chothi shaadi kar rahay hain-“
“Teen dino tak mahal mein on ka sog manaya gaya hay- yon bhi ham koi dhoom dhaam nahi kar rahay hain- es mahal ki chaar deewari mein khamoshi say nikaah ki rasam adaa ki jaey gi- larki mahal mein hay- jo kaam aaj ho sakta hay’ osay kal par kioun taala jaey? Aaj he tomhara nikaah parhaya jaey ga-“
Os nay chonk kar Maham begam ko dekha- wo darwazay tak gaee phir palat kar boli- “abhi rasm-e-nikaah adaa ki jaey gi aur kal tamam umraa aur deegar moazezeen k liey pur takaluf daawat ka ehtemaam kiya jaey ga- ham abhi hukam detay hain k qazi ko bulaya jaey aur Akhtari ko dulhan banaya jaey-“
Ye keh kar wo chali gaee- Humayun khaali darwazay ko taktay hovay sochnay laga- “ye kaisi larki hay? Achaanak he hamari zindagi mein aaee’ achaanak he es nay hamaray aur walidaah majidaah k saamnay aik raat ka mutalibah kiya aur aaj achaanak he hamari shareek-e-hayat ban^nay wali hay-“
Akhtari nay baray yaqeen say kaha tha k os k jeotashi ki pesh^goi kabhi ghalat nahi hoti aur waaqi wo durust ho rahi thi- aaj raat wo apnay mehboob Humayun k hujlaa aroosi mein aanay wali thi- ***
Shaadi dhoom dhaam say nahi hovi- phir bhi mahal k andar achi khaasi ronaq ho gaee thi- bahir itnay chiraagh aur andar itni shamaien roshan ki gaee theen k raat mein din nikal aaya tha-
Jhonpari mein rehnay walay mahalon k khawab nahi dekhtay hain lekin wo khawab dekhany wali dulhan ban kar Hindustan k badshah Humayun ki khawab^gaah mein pohanch gaee thi- aik maamooli si mulazimah apni mohabat say’ lagan say’ koshishon say aur muqadar ki meharbaniyon say na^mumkin ko mumkin bana chuki thi-
Maham begam hujla aroosi k saamnay aik takhat par bethi hovi thi- do bahu^on k sog mein raqs-o-saroor ki mehfil nahi jamaai gaee thi- phir bhi kaneezien aur qalma^qaniyaan khush rang libaas mei theen- os k aagay bethi ashaar aur chutkalay cuna rahi theen- wo sun rahi thi’ lutf andoz ho rahi thi lekin oska saara dhiyaan hujla aroosi ki taraf tha-
Os nay aisi ujlat mein nikaah parahwaya tha’ jaisay naee bahu raat ko hujla aroosi mein jaey gi aur subah hotay he takhat k jaan^nasheen g^od mein lay kar bahir aaey gi- wiasay baaz halaat mein insaan aisa he ujlat pasand ho jaata hay- wo es silsalay mein chaar bahuon ko aazmati rahi thi aur mayoos hoti rahi thi- aik jaan^nasheen k maamalay mein honay wali sazishon nay osay majboor kar diya tha k wo hatheli par sarson jamaey aur kal honay waala kaam aaj he kar daalay-
Khawaja^sara Rohi Saba aik taraf haath bandhay sar jhukaey khara tha- jhuki jhuki nazron say hujla aroosi k band darwazay kko dekh raha tha aur sard aahien bhar raha tha- aisa lag raha tha’ jaisay zindagi ki saari poonji os say ch^heen li gaee ho- wo aisi poonji thi’ jisay wo dekh sakta tha’ seenay say laga sakta tha’ magar kharch nahi kar sakta tha-
Wo dil ki gehraiyon say duaien maa^ng raha tha k os ki tamam khawahishaat poori hoti rahien- wo jald he aik jaan^nasheen ko janam day aur pooray Hindustan ki malikaah moazemaah kehlaey-
Lakri k takhat par ya chaarpaee par sona wali shah ki makhmali saij par thi aur hawaon mein urr rahi thi- musaraton k hajoom mein kabhi kabhi ronay lagti thi-
Humayun nay kaha- “hamari zindagi mein kitni he dulhanien aaien magar tom on sab say mukhtalif ho- tomhara andaaz judagaana hay- aaj tak hamari kisi dulhan nay aansoo^on say musaraton ka izhaar nahi kiya- ham ye samjhanay say qaasir hain k khushiyaan loot rahay hain ya tomharay haathon lut rahay hain?”
Wo boli- “bay^shak- mein khushi k maaray baar baar ro parti hon- lekin wisaal k lamhaat mein judaee ka khiyal bhi rula raha hay-“
“khatir jama rakho- ham tomhien juda nahi honay dein gay….. ye batao’ ye aansoo aur kiya kehtay hain?”
Wo aik gehri saa^ns lay kar boli- “ye kehtay hain……..
Ae shama teri omar taba^ee hay aik raat Chahay hans kar guzaar lay ya ro kar guzaar lay”
Humayun nay kaha- “aab say pehlay tom nay hamari aik raat mangi thi- ab to mankooha ban chuki ho- hamari hazaar raatien tomhari hain- phir shama ki aik raat ka zikar kioun kar rahi ho?”
Wo boli- “aap ilm-e-najoom aur ilm-e-haiyat ko maan^tay hain- aahm maamelaat mein najoomiyon ki raey zaroor latay hain- aap maan^tay hain na?”
“Bay^shak- ham maan^tay hain- har insaan apnay burj ki had mein sitaaron k zair-e-asar rehta hay-“
“meray sitaaray bhi yehi kehtay hain’ bas yehi aik raat hamari hay….. mein aik raat ki malikaah hon- es k baad khawab toot jaey ga-“
“Aisa na kaho- ham tomhien tootnay nahi dein gay-“
Gharyaali raat ki teen baja raha tha- Humayun ki baat khatam hotay he door say topon k garajnay ki aawaazien sunaee dein- wo aikdam say har^bara kar uth betha- “Ya Khuda khair ho……”
Wo bari phurti say chaadar lapait^ta hova tezi say chalta hova jharokay mein aa kar bola- “Salamat Khan! Ye topien kioun daaghi ja rahi hain?”
Neechay kharay hovay muhafiz nay dast bastah arz kiya- “Zil-e-Subhani par Subhan-e-Tallah ka saaya hamesha salamat rahay- Sher Khan Soori raat ki taareeki ka faidah utha kar darya aboor kar chuka hay- makhbar nay etelaa di hay’ os ka lashkar yahan say chaar kos k faslay par hay aur wo mazeed aagay barhta chala aa raha hay-“
“Ham abhi apnay lashkar mein jaein gay- foran ghora tiyaar kiya jaey-“
Os nay palat kar Akhtari k paas aatay hovay kaha- “dushman shab khoon maarnay aa raha hay- hamein abhi jaana ho ga- tom Aakam Madar k paas jao-“
Wo osay aaghosh mein lay kar bola- “waapsi mein tom say mulaqat ho gi- ye hamari pehli raat thi’ esay aakhri na samjho- ham zaroor waapis aaien gay-“
Phir wo Khuda Hafiz keh kar ghusal khaanay mein chala gaya- Akhtari k seenay say aik aah nikli- “meray badshah! Meray sartaj! Aap dushmano say jang lar saktay hain- muqadar say nahi lar saktay….”
Os nay chaaron taraf ghoom ghoom kar os shahaana khawab^gaah ko alwidaaee nazron say dekha- phir sar jhuka kar wahan say janay lagi-
Wo shab-e-shadmaani guzaar chuki thi- agar sitaaron ki chaal lar^kharati nahi hay to aaiendah shab-e-gham guzarnay waali thi- (Khatam Shud)
|
|
|
Post by Rafi Tabasum on Jul 11, 2007 8:38:56 GMT 5
Khoobsoorat silsla raha Tanweer sahib ab aap ko chahiay keh isay kitabi shakl main bhi lay aaiN INSHA ALLAH pazeerai hasil karay gi yeh kitaab
|
|
|
Post by Sukhanwar on Jul 15, 2007 16:44:51 GMT 5
tanweer sahib bohat khushi hui aap ki yeh tehrteer parh k aap ka shukar guzaar hoon k aap nay sukhanwar k arakeen ko itni dilchasp tehreer parhnay ko dee alaah karay zor e qalam aur ziaada thanx razi
|
|