|
Post by Tanweer on Jun 6, 2007 20:51:24 GMT 5
(Qist # 7)[/i]
Begmaat ko chup lag gai thi- imarat k har hisay main kaneezien aur khadmaien dam sadhay haath bandhay khari theen- en k aaqa’ en ki begmaat’ en k undata par bura waqat aya hova tha- agli chand saatoun main ya chand ghanton main ya to matam honay wala tha ya sehatyabi ka jashan manaya janay wala tha-
Bahir barish ka zor kam ho gaya tha- lekin badal garaj rahay the- jaisay waqat garaj raha ho aur aienda toot kar barasna chahta ho- Babar wazu karnay k baad maghrib ki namaz ada kar raha tha- halaat k garajnay aur barasnay ka tor bas yehi reh gaya tha k sajday main gir kar Rab-e-Jaleel say reham ki bheek mangi jaey-
Wo khud gharz nahi tha- matlab barari k liey namazien nahi parhta tha- bachpan say pancho waqat ka namazi tha- sharab noshi say tobah karnay k baad tahajad k waqat bhi ibadat main masroof rahnay laga tha- isay yaqeen tha’ es ka emaan tha k isay ibadat ka phal zroor milay ga-
Wo band darwazay k peechay manajat main masroof tha aur Humayun ki khawabgah k khulay hovay darwazay par Akhtari sar jhukaey baithi thi- ibadat k apnay apnay tareeqay hotay hain- wo chup thi magar mohabat k moabad main apnay shehzaday k liey zindagi ki bheek maang rahi thi- aik aik sajday main yon sar patakh rahi thi’ jaisay mehboob ki jan ki amaan na mili to wo jan say chali jaey gi- wo jhuki jhuki nazron say khawabgah k andar dekh rahi thi- wahan bistar-e-alalat par para hova shehzada saaf tor par nazar aa raha tha-
Aisay waqat rahdari main kharay hovay khawaja sara mustaid ho gaey- hazrat badshah Babar ibadat gah say nikal kar es taraf aa raha tha- aik taraf khari hovi Dildar begam os k peechay peechay chalti hovi boli- “ham aap ki shareek-e-hayat ahin- apnay majazi khuda say ilteja kartay hain- khudara……. Apna faisla badal lein-“
Wo jaisay goonga aur behra ho gaya tha- na kuch bol raha tha’ na sun raha tha- sar jhukaey kalam-e-pak ki aayatien parhta hova rahdari say guzar raha tha- Gul Rukh nay bhi os k peechay chaltay hovay kaha- “bayshak- shehzada Humayun k liey jan ka sadaqah diya jaey lekin wo aap ki jan na ho- hamaray do betay hain- ham en main say kisi aik ko bulatay hain- aap oski jan ka sadaqah day dein- hamien har hal main apki salamati aziz hay-“
Ye badshah ko mehaz khush karnay aur aur mutasir karnay wali batien theen- warna os kdono betay wahan say sainkaron meel door the- en k hazir honay main do char din lag saktay the- itni dair main andher ho sakta tha-
Khawabgah k khulay hovay darwazay par Maham begam khari hovi thee aur Akhtari os k qadmon main baithi jhuki jhuki nazron say khawabgah k andar dekh rahi thi- en lamhaat main jazbaat ki shidat aisi thi k zuban chup ho gae thi- dimagh sun ho gaya tha- sirf aunkhien duaon k saath osay maang rahi theen-
Phir Maham begam aur badshah Babar andar chalay gaey- darwazah band ho gaya- wo girnay k andaz main chokhat say loag gae-
Babar nay andar aa kar betay ko baray jazbon say dekha- phir aik goshay ki taraf isharah kartay hovay Maham begam ko samjhaya k wo chup chap wahan baith jaey- roshan dan say barish ka shor sunae day raha tha- badal garaj rahay the- wo ahista ahista chalta hova betay k sarhanay aaya- karakti hovi bijli ki lamhati chamak roshandan k zareay kamray main aa kar bujh gae-
Babr nay zair-e-lab kaha- “ae hamaray mabood….! Hamara beta gardish main hay- ham bhi gardish main aa rahay hain- betay k gird teen chakar lagaien gay- apni jan ka sadqah utarien gay- ae malik-o-mukhtar…..! esay qabool farma…..esay qabool farma….. amen!”
(Jari hay ………………. Baqi kal.……)
|
|
|
Post by Tanweer on Jun 7, 2007 12:06:58 GMT 5
(Qist # 8)
Wo bismillah parh kar daien taraf ghoom gaya- phir os baray say jahazi palang k atraaf aik aik qadam agey bhartay hovay zair-e-lab kehnay laga- “ye sari aamad-o-shud hay sanson k anay janay par…….. sansien aati jati hain- kabhi jati hain to phir nahi aatien aur ham phir anay ki duaien maang rahay hain-«
Karakti hovi bijli ki lamhati chamak aaee aur gaee- wo betay k sarhanay say paenati pohanch gaya- “ae meray mabood! Lab-e-dam hay ye lakht-e-jigar…… aik badshah faqeer hay teray dar par…….. “
Wo paenati say phir sar ki taraf aanay laga- “shahzor hain ham ……. Jahan panah hain ham……… par tujh he say hain dam ba dam……. Ham teray agay dam nahi mar saktay- apni jan war saktay hain….”
Maham begam aik goshay main dam ba khud baithi hovi thee- aik baap ki baymisal mohabat aur qurbani k jazbay ko amli surat main dekh rahi thi-
Aik chakar poora ho chukka tha- doosra jari tha- oski bhari bharkam magar dheemi dheemi se awaz ubhar rahi thee- “Ham hain mard-e-aahan hazrat badshah Babar….. ham nay darinda sifat dushmano k agey kabhi hatiyar nahi dalay- tamam omar mout ki aunkhon main aunkhien daal kar qooat’ eqtedar aur fatah mandi k liey lartay rahay- aaj pehli aur aakhri baar betay ki aanay wali mout k aagay hatiyar daal rahay hain- sadaqay k tor par apni jan ka nazrana pesh kar rahay hain- qabool kar meray mabood! Qabool kar…..”y hain- qabool kar meray mabood! Qabool kar…..”
Doosra chakar ikhtetam ko pohncha- teesra aur aakhri chakar shuro hova- os goshay main baithi hovi Maham begam apnay majazi khuda ko dekh rahi thi- dil he dil main keh rahi thi- “ae Rab-e-Jaleel…. ! ye hatay katay jawano ko apni baghlon main daboch kar kankaron par dorta aur chalangien marta chala jata hay-
To qavi hay- qadar-e-mutiq hay- to nay he es badshah ko itni qooat di k es nay kamal-e-qooat-e-iraadi ka muzahira kiya- daryae ganga k choray paat ko musalsal tertay hovay paar kiya tha- aaj tak kisi insaan main ye hosla paida na ho saka- ae meray mabood! Ye folaadi insaan teray aagay dam nahi maar sakta- lamha ba lamha bay dam ho raha hay- meray betay ko sehat day- salamati day takay es ki bhi jan main jan aaey-“
Teesra aur aakhri chakar poora ho raha tha- wo dono haath buland kar k girgaratay hovay keh raha tha- “ae malik-o-mukhtar-e-kul….! To nay jo qooatien hamien ataa kien’ wo hamaray jan say aziz betay ko ataa farma- jo kamzori aur marzul mout betay ko day raha hay’osay baap ki taraf muntaqil kar day…. Kul kainaat teray ikhtiyar main hay- ye Babar es kainaat ka haqeer zarah hay’ faqeer hay- es ki jan ka sadaqah qabool farma….. qabool farma…..”
Teesra chakar poora hotay he wo chakranay laga- badal zor zor say yon garaj rahay the’ jaisay aasman bolnay laga ho- badshah k moon say niqahat bhari awaz nikli- “bardashteem….. bardashteem….” Bahir karakti hovi bijli kahien giri ho gi…. Wo farsh par gir para-
Maham begam dorti hovi qareeb aaee- wo hanpta hova’ larzta hova uth kar beth raha tha- wo rotay hovay boli- “Khuda aap ko apnay hifz-o-amaan main rakhay- ham abhi tabeeb hazraat ko talab kartay hain-“
Wo apni jagah say uthtay hovay bola- “hamara beta! Hamari jan…..!”
Wo palang k siray ko thaam kar khara ho gaya- betay ko dekhnay laga- aisay waqat badal garjay’ bijli chamki aur os ki lamhati chamak main shehzaday nay aunkhien khol dien- Babar nay musraton say sarshar ho kar dono haath uthatay hovay kaha- “ae Rab-e-kareem ! ae ghafoor-ur-raheem! Bay shak to qadir-e-mutliq hay- qudrat wala hay…. Teri qudrat nay ye karishmah dikhaya hay-“
Wo bistar par girtay girtay shehzaday par jhuk gaya- os ki peshani ko choom kar bola- “foran tabeeb hazraat ko talab kiya jaey- hamaray betay ka muainaa karaya jaey-“
Khud baap ki nabz doob rahi thi- wo achanak he niqahat mehsoos karnay laga tha- es niqahat ka taqazah tha k wo bistar par gir paray magar baray hoslay say betay k paas baitha hova tha- Maham begam ka khushi say ajab haal tha- betay ki aunkhien subah band hovi theen- aab isha ki azaan k waqat khuli theen- wo os ki balaien lay rahi thi- badshah nay zara sakhat lehjay main kaha- “jaien malika! Atibaa aur umraa ko foran yahan talab karien-“
Wo tezi say chalti hovi khawabgah say bahir aa gaee- badshah ka hukam sunaya to khawaja sara dortay hovay hukam ki tameel k liey chalay gaey- Gul Rukh begam aur Dildar begam apnay kamray say nikkal kar rahdari main aa gaee theen- sawaliya nazron say Maham begam ki taraf dekh rahi theen- Akhtari wahien darwazay say lagi baithi thi- os nay os k qadmon ko choohtay hovay bay cheni say poocha- “kiya hamari duaien arsh tak pohanch rahi hain?” (Jari hay ………………. Baqi kal.……)
|
|
|
Post by Sukhanwar on Jun 8, 2007 15:25:03 GMT 5
tanweer bhai kahani bohat khoobsoorat hy aur achay andaz main aap iusay aagay barha rahay hain mujhay aap ka daastan go wala andaz acha lag raha hy thanx razi
|
|
|
Post by Tanweer on Jun 9, 2007 10:49:11 GMT 5
(Qist # 9)
En sokono ko Maham begam k cheharay ki ronaq he bata rahi thi k duaien sharf-e-qabooliyat hasil kar chuki hain- wo bari raoonat say boli- “jisay Allah rakhay’ osay kon chakhay? Hamaray bachay par saat peeron ka saya hay-“
Wo agay barhtay hovay sokono k darmiyan say guzartay hovi boli- “hamaray badshah nay mukamal eeman aur yaqeen k saath ibadat ki hay- apnay Khuda ko raazi kiya hay-“
Wo agay barhtay barhtay ruk gaee- palat kar sokono par nazar daltay hovay boli- “hamaray badshah nay aik baap ki missali mohabat aur qurbani ka sabot diya hay- Khuda ka laakh laakh shukar hay’ hamaray betay nay aunkhien khol dein hain-“
Wo khushkhabri suna rahi thi- lekin ye khushkhabri bandooq ki goliyon ki tarah en k seeno main lag rahi thi- Maham begam k chehray par achanak he dukh k aasar numayan hovay- wo baray dukh say boli- “Ahh……! Badshah salamat ki tabiyat nasaaz ho rahi hay- ham namaz k liey ja rahay hain- onho nay sidq-e-dil say ibadat ki’ Khuda ki khushnodi hasil ki- betay ko pa liya- ham apnay majazi Khuda ko panay ja rahay hain-“
Wo palat kar chali gaee- dono begmaat nay preshan ho kar os khawabgah ki taraf dekha’ jahan aab shehzaday k ilawa badshah bhi beemar ho chala tha- wo maaon ki haysiyat say dilon main keena aur kudurat rakhti theen- lekin biwiyon ki haysiyat say badshah par jan deti theen- wo os ki salamati k liey duaien maangti hovi odhar ja rahi theen- phir achanak ruk gaein- aik khawaja sara awaaz lagata hova aa raha tha- “hijaab lazim hay….. atibaa-o-umraa hazraat tashreef la rahay hain- hijaab lazim hay…”
Dono begmaat foran hi palat kar haram main chali gaien- Akhtari khawabgah k darwazay say door deewar say lag kar khari ho gaee thi- sar k aanchal ko ghoongat bana liya tha- atibaa aur umraa hazraat tezi say chaltay hovay khawabgah main dakhil ho rahay the- tabeeb hazraat wahan phonchatay he Humayun ka muainaa karnay lagay aur beebar badshah ko sambhalnay lagay- chonkay andar afraad ziyadah the’ es liey darwazay ko khula rakha gaya tha takay habas na ho-
Wo andar say bohat khush thi- ye sun chuki thi k shehzaday nay aunkhien khol di hain- wo zindagi ki taraf lot aya hay- es duniya ko khuli aunkhon say dekh raha hay- magar aab kaisa hay? Kiya es ki tabiyat sambhal rhai hay?
Os k andar tajasus paida ho raha tha- wo dekhna chahti thi’ maloom karna chahti thi k shehzadah kis haal main hay?
Wo ahista ahista chalti hovi khulay hovay darwazay k samnay aa gaee- wahan do khawaja sara pehredaar k tor par kharay hovay the- onho nay esay ghoor kar dekha- phir aik nay aagay bhar kar dheemi awaaz main dant^tay hovay poocha- “yahan kiya kar rahi hay?”
Wo dono haath jor kar boli- “badshah salamat k liey aur sahib-e-alam k liey duaien maang rahi hon-“
Khawaja saraon k niyaam main talwarien hoti theen aur haath main chamray ka chabuk hota tha jo kaneezien najaez harkatien karti hovi paee jati theen to saza k tor par wo chabuk en k pearon par mara jata tha- ye hukam tha k chabuk ka estemaal aur kahien na kiya jaey- haseen kaneezon ka badan daghdaar na ho- aaqaaon k husan-e-nazar k liey wo tar-o-tazah rahien-
Chabuk walay khawaja sara nay aagay barh kar kaha-“duaien maang rahi hay to hijab main rreh kar maang- chal- yahan say chali ja……”
Akhtari nay sehmi hovi nazron say chabuk ki taraf dekha phir foran he palat kar os rahdari say guzarti hovi aik jharokay main aa kar baith gaee- wahan say bahir ka manzar dikhaee deta tha- barish tham gaee thi- raat ki tareekhi main door thak dikhaee nahi day raha tha- wahan baghon main raat k waqat par charghaan kiya jata tha- raton ko bhi harfyali aur rang barangay phool door thak dikhaee daytay the- lekin es raat begmaat aur aaqaaon k hasb-e-haal had-e-nazar tak tareekhi he tareekhi thi-
(Jari hay ………………. Baqi kal.……)
|
|
|
Post by Sukhanwar on Jun 9, 2007 11:57:54 GMT 5
bohat khoob tanweer bhai kahani umdgi k saath aagay barh rahi hy aur poarhnay walay ko apnay hisaar main lay rahi hy thanx razi
|
|
|
Post by Tanweer on Jun 10, 2007 12:19:41 GMT 5
(Qist #10)
Shehzaday say es ka koi rishta nahi tha- aik mamooli mulazima aur aaqa ka koi rishta ho bhi nahi sakta- es k bawajood wo aisay khush ho rahi thi’ jaisay shehzaday nay aunkhien khol kar os ki taqdeer k darwazay khol diey hain- isay duniya ki sab say bari khushi’ sab say bara inaam mil raha hay- jabkay ooper say koi inaam nahi mil raha tha- andar say piyar mustehkam ho raha tha-
Musaraton k es hajoom main aik andesha sar ubhaar raha tha- Gul Rukh begam aur Dildar begam nay os say kaha tha’ agar shehzadah Humayun sehat yab ho ga to es ka matlab yehi ho ga k os nay wo taweez os k bistar main nahi chuhpaya hay aur agar taweez chuhpaya ho ga to ye samjha jaey ga k os aamil nay taweez likhnay main na^ehli ka saboot diya hay-
Aienda wo dono taraf say pakri janay wali thi- aab os khawab^gah main badshah beemar para rehta to wo do begmaat bhi wahan ja sakti theen- os ki teemardari k doran main bistar ki paenati say wo taweez nikal kar dekh sakti theen-
Phir kiya ho ga?
Yehi k os taweez ko dekhtay he pehlay to en begmaat ko yaqeen ho jata k Akhtari nay bari wafa^dari aur diyanat^dari say apna faraz ada kiya hay- phir os taweez ko aamil k pas lay jaya jata’ osay khola jata to ye bhed khul jata k aik do kori ki mulizmah nay bari bay^baki aur chaal^bazi say muqatadar begmaat ko dhoka diya hay-
Phir to es ki shaamat aa jati- jhoot bolnay’ dhoka daynay aur na^jaez harkatien karnay wali kaneezon aur khadmaon k saath bohat he ghair insaani salook kiya jata tha- wo begmaat osay Maham begam ki la^ilmi main aghwa kara sakti theen- azeeyatien day day kar halak kar sakti theen-
Wo apna anjaam soch kar kaanp gaee- “kiya shehzaday say mohabat aur wafa^dari mujhay mehngi paray gi? Ya Khuda! Main kiya karon……?”
Kahan shahi begmaat ki sazishien aur kahan aik mamooli khadimah…. Wo apni chohti se aqal say bachao ki tadbeer soch nahi pa rahi thi- ye andesha sata raha the k aalaa nasal ki sokano k darmiyan chaki k gandum ki tarah pisnay wali hay-
Idhar aik khawab^gah thi’ do beemar the- fori tor par jo dawaien de gaien’ en say Humayunm ko zara afaaqa hova tha- wo uth kar baith gaya tha- magar kamzori abhi havi thi- tamam umraa aur attibaa dast basta kharay the- aik ameer musheer nay Babar say arz kiay- “Hazrat badshah k liey ye khawab^gah munasib nahi hay- mera mashwara hay’ doosri khawab^gah main muntaqil ho jaien-“
Babar nay kaha- “Kiya es liey munasib nahi hay k ye hamaray beemar betay ki khawab^gah hay? Ham shehzaday ki khatir bad^shagooni aur nahoosat ko rad kartay hain- hamien esi bistar par rehna hay- keounkay ham nay sahibzaday ki sehat^yabi ki khatir esi bistar ka tawaaf kiya hay- hamara hukam hay’ shehzaday Humayun ko doosri khawab^gah main muntaqil kiya jaey-“
Hukam ki tameel ki gaee- haram main khabar phonchi k Humayun ko doosri khawab^gah main muntaqil kar diya gaya hay aur badshah beemar betay k bistar par apni duaon ki qabooliyat k muntazir rahien gay- Gul Rukh begam aur Dildar begam nay ye bhi suna k beemar shehzadah apnay peyron par chal kar doosri khawab^gah tak gaya hay aur apnay manhoos bistar par baap ko chohr aaya hay-
Maham begam jaey^namaz par thi- atahiyat parh kar salam pher rahi thi- Gul Rukh begam nay os ki taraf dekhtay hovay kaha- “ye sarasar na^munasib baat hay- aalaa hazrat beemar hain aur wali ehad enhay apnay bistar par chohr aaey hain-“
En begmaat nay bachpan say shahi mehal k adaab seekhay the- es liey wazeh tor par too too’ main main nahi karti theen- baray muhazib andaz main aik doosray ki mukhalifat kiya karti theen- Maham begam nay dua k liey haath uthaey- wo zair-e-lab duaien maangti thi- es baar buland awaz main kehnay lagi- “Ya^Allah! Hamaray betay ko aur hamaray majazi Khuda ko sehat aur salamati atta farma- es mehal ki doosri begmaat ko namaz pharnay ki tofeeq atta farma- enhay aqal day k doosron ki aag main jalnay say apna he lahoo jalta hay- namaz parh kar apnay majazi Khuda ki sehat k liey duaien mangna en ka awaleen faraz hay- ye ibadat ka waqat hay’ esay zaeya nahi karna chahiey-“
Aik nay ghoor kar’ doosri nay honton ko sakhti say bhench kar Maham begam ko dekha- phir dono he wazoo karnay chali gaien- namaz k baad itelaa mili k attibaa aur umraa khawab^gah say ja chukay hain- wo dono begmaat foran he hazrat badshah ki taraf chali gaien- Maham begam nay zair-e-lab aayatien parhtay hovay betay k paas aa kar os par phoonk mari- os ki khairyat maloom ki- Humayun nay kaha- “aakam madar! Ham behtari mehsoos kar rahay hain- aap foran jaien aur bawa hazoor ki temaar^dari karien- ham en k liey bohat fikar^mand hain-“
Os nay betay k shanay ko thapak kar kaha- “Hazrat badshah folaad hain- enhay koi moseebat koi beemari tor nahi sakti- fikar na karo betay! Ham wahien ja rahay hain-“ (Jari hay ………………. Baqi kal.……)
|
|
|
Post by Tanweer on Jun 11, 2007 11:05:38 GMT 5
(Qist # 11)
Wo betay ki khawab^gah say nikal kar shohar k paas aa gaee- Gul Rukh begam aur Dildar begam badshah k sarhanay daien baien khari hovi theen- Maham begam nay paenati aa kar kaha- “Bistar ki chaadar aur takeay ko badalna chahiey-“
Babar nay kaha- “hargiz nahi- es par hamaray betay nay beemariyan jheli hain’ aab ham jhelna chahtay hain- duakarti rahien k hamara sadqah qabool ho jaey-“
Gul Rukh begam nay kaha- “aap hamara sar qalam karnay ka hukam dien- magar ham aisee dua kabhi nahi karien gay-“
Wo bola- “ham kisi hasid say dua ki towaqa nahi kar rahay hain… Maham! Hamaray qareeb aaien-“
Wo aagay barhi to Gul Rukh begam apni jagah say hatt gaee- shohar k qadmo k paas aa gaee- Maham begam nay qareeb pohnch kar badshah ki peshani par haath rakha phir preshan ho kar kaha- “aap ka badan tap raha hay-“
“Fikar na karo- ye bukhar chahrta utarta rehta hay- ham tomhien naseehat karna chahtay hain- Gul Rukh begam aur Dildar begam ki baton’ rawieyon ko dil par na liya karo- en k dil main baith kar en ki aunkhon say dekho’ en k dimagh say socho to ye apni jagah durust nazar aaien gi- ye apnay shohar ki salamati chahti hain- kisi k liey bhi sadqah dena gawara nahi kartien-“
Wo aik gehri sans lay kar bola- “agar ham en ki olaad k liey apni jan ka sadqah daytay to tomhien bura lagta- agar en begmaat k kisi sahibzaday ko apna wali^ehad aur taj-o-takhat ka janasheen bana daytay to tom hasad aur jalapay main mubtila rehnay lagtien- har insaan apni fitrat say majboor hay- achay aur buray halaat k mutabiq os ka rawiya badalta rehta hay-“
Teeno begmaat sar jhukaey beemar badshah ki batien sun rahi theen- Gul Rukh begam ki nazrien bistar k gaday k neechay bhatak rahi theen- aik shareek-e-hayat ko ye khiyal tarpa raha tha k wahan jo taweez rakha gaya hay’ wo aik beemar ko mout ki aghosh main phonchanay k liey hay- lekin aab beemar badal gaya hay- wo es k jism-o-jan ka malik tha- os ka suhaag aur os k sar ka taaj tha- wo kabhi ye gawara nahi kar sakti thi k sotelay betay ko aanay wali mout os k shohar ko aaey-
Babar nay kaha- “Maham! Ham tomhien naseehat kartay hain- apni sokano k liey aur sotelay beyton k liey apnay rawiey main narmi aur lachak paida karti raho- agar en ki taraf say koi baat nagawar-e-khatir ho to esay nazar andaz kiya karo-“
Dildar begam nay kan ankhiyon say shohar k qadmo ki taraf dekha- idhar Gul Rukh begam khari hovi thi- os ka haath gaday k neechay pohancha hova tha- ungliyaan os taweez ko tat^tol rahi theen- aisa kartay waqat wo es tarah shohar ki taraf rukh kiey estaadah thi k kisi ko shubah nahi ho sakta tha-
Dildar begam nay kaha- “Khuda gawah hay’ ham hasid nahi hain- Maham begam ki dil say izat kartay hain-“
Babar nay kaha- “yehi behtar hay- begmaat k darmiyan mohabat ho ya na ho’ nafrat nahi honi chahiey- jab nafratien phalti phoolti hain to phir ye sazishi rawieya ikhtiyar leti hain aur aisee mahalati sazishien apnay he badshah ko nuqsaan phonchati hain- Hindustan main hamari abhi ye naee saltanat hay- ham abhi achi tarah yahan qadam nahi jama paey hain- agar sokano ki sazishon say hamaray shehzadon k darmiyan nafratien paida hoti rahien gi to ham andar say kamzor ho jaien gay- hamaray qadam pehlay mahal say ukhrien gay phir Hindustan say ukhar jaien gay-“
Bistar k neechay reengnay wali ungliyon nay os taweez ko chuhpa liya- wo bay^ikhtiyar sar jhuka kar dekhnay lagi- Maham begam nay odhar dekhtay hovay poocha- “kiya baat hay?”
Gul Rukh begam aik dam say gar^bara gaee- wo chahti thi k taweez ko chup chaap wahan say lay jaey- aab foran he koi baat banaee nahi ja sakti thi- os nay kaha- “yahan koi cheez jhalak rahi hay-“
Wo foran he os taweez ko gadday k neechay say khench kar zara samnay lay aaee takey wo jhalakta rahey-
Maham begam aur Dildar begam tezi say aagay barhien- sar jhuka kar dekha to bistar k neechay zafraani rang ki cheez jhalak rahi thi- Dildar nay hayrat say poocha- “ye kiya hay?”
Maham begam nay esay bahir nikaal kar dekhtay he taqreban cheekh kar kaha- “ye to taweez lagta hay-“
Aisay he waqat Babar ka sar chakranay laga- dar-o-deewar ghoomnay lagay- wo aunkhien band kar k apna sar idhar odhar jhataknay laga- Dildar begam aur Gul Rukh begam dorti hovi os k paas aaien- Maham begam tezi say chalti hovi darwazah khol kar khawja^sara say boli- “foran tabeeb hazraat ko hazir kiya jaey-“
(Jari hay ………………. Baqi kal.……)
|
|
|
Post by Rafi Tabasum on Jun 11, 2007 11:17:42 GMT 5
kahani dilchaspi liay huay aagay barh rahi hay Tanweer bhai jari rakhiay
|
|
|
Post by Tanweer on Jun 12, 2007 16:21:23 GMT 5
(Qist # 12)
Wo khawaja^sara hukam ki tameel k liey dorta hova wahan say chala gaya- wo taweez Mahma begam ki chutki main daba hova tha- wo kabhi shohar ki bigarti hovi halat ko aur kabhi os taweez ko dekh rahi thi- phir os nay cheekh kar poocha- “ye taweez yahan kis nay rakha tha?”
Dildar begam nay kaha- “esay to osi nay rakha ho ga’ jo hamaray suhaag ka dushman ho ga-“
Maham begam nay kaha- “ye taweez hamaray majazi Khuda k liey nahi balkay hamaray sahibzaday k liey rakha gaya tha- ham aisee jan laywa sazish karnay walon ko zindah nahi chohrien gay-“
Os nay khawaja^sara say poocha- “hamien es khawab^gah main aanay janay walon ka hisaab do-“
Gul Rukh begam tezi say chalti hovi darwazay par aa kar boli- “khamkhah cheekhnay say hazrat badshah ki tabiyat mazeed nasaaz hoti chali jaey gi- es mo^amalay ko sahoolat say nimtaya jaey-“
Aik khawaja^sara door say awaaz lagata hova aa raha tha- “hijaab lazim hay…. Attibaa hazraat tashreef la rahay hain….. hijaab lazim hay….”
Wo teeno begmaat foran he wahan say chalti hovi haram main aa gaien- aik khawaja^sara en k peechay chalta hova Maham begam say bola- “Malika-e-Alam! Aa shehzada-e-Alam k kamray main kisi ko aanay ki ijazat nahi deti theen- wahan sirf tabeeb hazraat aatay jatay rehtay the ya phir safaee k liey wo khadimah akhtari aaya karti thi-“
Maham begam nay sochti hovi nazron say khawaja^sara ko dekha phir hukam diya- “Akhtari ko hazir kiya jaey-“
Wo hukam ki tameel k liey chala gaya- Dildar begam aur Gul Rukh begam aik doosray ko sawaliya nazron say dekh rahi theen- Dildar nay kaha- “ham nahi mantay k ye taweez shehzaday Humayun k liey rakha gaya tha- keounkay es nay koi bura assar nahi dikhaya hay- es k bar^aks shehzadayko sehat yabi naseeb ho rahi hay-“
Gul Rukh nay kaha- “agar hamari nazar es taweez par na parti to hamaray suhaag ko nuqsaan phonchnay wala tha-“
Maham begam nay kaha- “agar hazrat badshah ko nuqsaan phonchanay k liey ye taweez rakha gaya hay to phir esay Akhtari nay nahi rakha ho ga-“
Dono begmaat nay chonk kar osay dekha- phir Dildar begam nay poocha- “ye aap kaisay keh sakti hain?”
Maham begam nay kaha- “hazrat badshah ki aamad k baad Akhtari nay es khawab^gah main qadam nahi rakha-“
Aisay he waqat Akhtari os khawaja^sara k saath wahan aa gaee- os k chehray say pata chal raha tha k andar say buri tarah sehmi hovi hay- Maham begam nay wo taweez osay dikhatay hovay kaha- “jhoot bolnay walay ki zuban guddi say khench li jaey gi- sach bol…. Ye taweez’ to nay hamaray betay k bistar main rakha tha?”
Akhtari nay ghabra kar dono begmaat ko dekha- Gul Rukh nay aik^dam say cheekh kar kaha- “hamien kiya dekh rahi ho? Jawab do- “Dildar nay kaha- “haan bolo- esay tom nay rakha tha?”
Os nay bokhla kar kaha- “jab aap bolnay ko keh rahi hain to bol rahi hon…. Aap nay…. Aur aap nay kaha tha k esay wahan rakh doon aur main nay rakh diya-“
Gul Rukh nay aik^dam say preshan ho kar osay dekha- phir ghussay say os k gaal par aik tamancha raseed kar diya- Maham begam foran he Akhtari k samnay dhaal bantay hovi boli- “doosri baar es par haath na uthana- es khadimah k jawab nay aur aap k rad-e-amal nay hamien bohat kuch samjha diya hay-“
Gul Rukh nay peechay hat kar kaha- “aap es khadimah ki baton main aa kar ye kehna chahti hain k ye taweez ham nay wahan rakhwaya tha? Aur ham aap k betay say dushmani kar rahay hain?”
“Ham abhi kuch nahi kehna chahien gay- hazrat badshah ki tabiyat sambhalnay dain- ye muqadimah on k samnay pesh kiya jaey ga-“
Phir wo palat kar Akhtari say boli- “aur tom…. tom nay hamaray betay ki jan lenay k liey en ka saath diya hay- ham tomhari khaal utarwa dain gay-“
Os nay dast basta arz kiya- “meri jan hazir hay- lekin ye koi taweez nahi hay-“
Dono begmaat nay chonk kar osay dekha- Maham begam nay apni muthi khol kar os taweez ko dekhtay hovay poocha- “kiya bakwaas kar rahi hay?”
Sach keh rahi hon- main namak haram nahi hon- sahib-e-Alam ko nuqsaan phonchanay k baray main kabhi soch bhi nahi sakti- aap esay khol kar dekhien-“
Dildar aur Gul Rukh uljhi hovi theen- es ki batien samajh nahi pa rahi theen- Maham begam nay os zaafrani rang k kaghaz ko khol kar andar say doosra teh shuda khaghaz nikal liya- phir osay khol kar dekha to wo saadah tha- wahan aik harf bhi likha hova nahi tha- os nay herat say kaha- “ye to saadah hay-“
Teeno begmaat nay sawaliya nazron say Akhtari ko dekha- wo malika k qadmon k paas baithtay hovay boli- “taweez likha hova tha- mujhay hukam diya gaya tha’ esay shehzaday k qareeb kahien rakh don- agar main inkar karti to bay mot mari jati….. mujhay khud ko bhi bachana tha aur sahib-e-Alam say bhi es taweez ko door rakhna tha- meri naik niyati ko Khuda janta hay- aise naiki k baad bhi dil ko dharka laga hova tha- ye jaanti thi’ k aaj nahi to kal meri shaamat aanay wali hay-“
(Jari hay ………………. Baqi kal.……)
|
|
|
Post by Tanweer on Jun 13, 2007 10:55:59 GMT 5
(Qist # 13)
Maham begam apni sokon ko ghusay say dekh rahi thi- Gul Rukh nay tanak kar kaha- “aap es tarah kiya dekh rahi hain? Ham aap say kamtar nahi hain- sab he ka rutba barabar hay- ham sab aik he badshah ki saij parrehti hain- ham sab nay beton ko janam diya hay-“
Dildar nay kaha- “aik mamooli khadimah k keh denay say ham par koi ilzaam sabit nahi ho sakta- ham nay koi sazish nahi ki hay-“
Maham begam nay bay^basi say enhay- en sab ki haysiyat aur maan partaba barabar tha- wo aik he baddshah ki begmaat theen- en ki azmat aur shan-o-shoukat aise thi k aik mamooli khadimah ka biyaan aur gawahi qabil-e-qabool na hoti- ye kabhi sabit nahi hota k en begmaat nay os taweez ko shehzaday tak phonchanay k liey do kori ki khadimah ko apna raazdar banaya tha-
Aisay halaat main sokanay aik doosray ka kuch nahi bigaar saktien- wo aapas main larti hain’ aik doosray ko galliyaan deti hain aur tarah tarah say kosti rehti hain- Maham begam ka bhi ji chah raha tha k cheekh cheekh kar enhay kosna shoro kar day- lekin wo aisa kar nahi sakti thi- adaab-e-shahi ki pabandi har haal main lazmi thi-
Phir bhi os nay kaha- “aap dono nay sokono ka harba estemaal kar liya- Khuda bara kar^saaz hay- hamaray betay par aanch nahi aaee- lekin aap k sahibzadon ka kiya ho ga……?”
Os nay Dildar begam say kaha- “aap ka aik beta Hindaal hay aur gul Rukh begam! Aap k do betay hain- ye sab he waqtan fowaqtan fatohaat hasil karnay k liey medaan-e-jang main utartay rehtay hain-“
Os nay apni ungliyaan chatkhatay hovay kaha- “ham nay beemar betay k sadmaat uthaey hain- ham ye bad^dua detay hain’ Khuda karay’ dono ka aik aik beta jang main mara jaey ya haath paoun say apahaj ho kar wapis aaey-“
Wo dono ghusay main tan gaien- Maham begam nay kaha- “aan^haan- ghusay main na aaien- ham to sirf bata rahay hain k aise bad^duaien lagien gi to aap main say kisi ka beta wapis nahi aaey ga- ham sab aam si khawateen nahi hain- adaab-e-shahi k pesh-e-nazar na to aik doosray k khilaaf kuch kar sakti hain’ na bol sakti hain- es liey ham kuch nahi bol rahay hain-“
Wo jawaban kuch kehna chahti theen- aisay he waqat aik khawaja^sara nay aa kar kaha- “hazrat badshah zil-e-subhani ko araam aa gaya hay- wo abhi gehri neend main hain- tabeeb hazraat ja chukay hain- en ki hidayat hay k hazrat badshah zil-e-subhani ki neend main kisi ko mukhil na honay diya jaey-“
Maham begam nay wahan say jatay hovay Akhtari ko dekha- phir kaha- “hamaray peechay aao-“
Wo wahan say chalti hovi betay ki khawab^gah main aa gaee- wo bistar par gao takiey say tek lagaey betha hova tha- os k samnay phalon say bhara hova thaal aur doodh say labraiz aik jug rakha hova tha- do kaneezien es ki khidmat k liey wahan phonchi hovi theen- aik khawaja^sara en kaneezon ko bata raha tha k enhay kis waqat kon si dawa shehzaday ko deni hay- malika begam ko dekh kar sab he taazeem say jhuk gaey- os nay betay ko dekh kar khushi ka izhaar kiya- “Ya Khuda ! tera laakh laakh shukar hay- hamara beta dushmano k shar say mehfooz hay- ham dekh rahay hain’ ye hansnay bolnay aur khanay peenay k qabil ho gaya hay-“
Darwazay par khari hovi Akhtari bhi shehzaday ko aise lagan say’ aisay jazbay say dekh rahi thi’ jaisay os ki aunkhien apnay halqon say nikal kar apnay shehzaday k qadmon main phonch jaien gi- Humayun nay maa say kaha- “ham nay abhi aik khoraak dawa li hay- tabeeb hazraat ki hidayat k mutabiq dawa k saath doodh peena lazimi hay-“
Maa nay chaandi k katoray main rakhay hovay doodh ko utha kar betay k honton say lagaya- os nay pehla ghoont maa k haton say piya phir wo katora haath main lay kar bola- “hamaray bawa hazoor kaisay hain?”
Tabeeb hazraat ki dawaien kuch asar dikha rahi hain- wo baray aaraam say so rahay hain-“
Phir os nay khawaja^sara aur kaneezon say kaha- “takhliyah…..”
Wo teeno sar jhuka kar wahan say janay lagay- Humayun nay darwazay par khari hovi akhtarai par aik nazar dali to os chohkari ka dil pagal ho gaya- seenay ki deewar say takrien marnay laga- Humayun nay poocha- “Aakam madar! Ye kon hay?”
Maham begam nay Akhtari say kaha- “andar aa jao-“
Wo sar jhukaey ahista ahista chalti hovi shehzaday k palang k qareeb aa gaee- maa nay kaha- “ye khidmat gaar hay’ wafa daar hay- aaj sabit kar diya hay k ye jaan^nisaar bhi hay-“
Phir wo betay ko batanay lagi k soteli maaon nay kis tarah es k khilaaf sazish ki thi aur kis tarah es larki nay on ki sazishon ko nakaam bana diya hay-“
Humayun nay pehli baar aik hakim ki nazron say Akhtari ko dekha tha- doosri baar os k muqadar ka badshah mamnoon ho gaya- ehsan mandi say esay dekhnay laga-
Os ki nazrien jhuki hovi theen- larkiyon main ye qudarati salahiyat hoti hay k nazrien zameen main garri rehti hain- lekin wo samnay walay ki nazron ko bhaanpti rehti hain- aaj os k mun ki murad poori ho rahi thi- wo chahti thi k shehzada kabhi os par aik nazar dalay-
Gul Afshan main khoobsurat kaneezon aur tarah^daar khadmaon ka mela laga rehta tha- shehzaday ko kabhi itni fursat he nahi mili k wo es chodah baras ki kam sin larki par nazar dalta- kabhi os par nazar parti bhi ho gi to phisal kar doosri taraf chali jati ho gi- aaj wohi gher aaham larki itni aaham ho gae thi k shehzada osay sar say paoun tak nazar bhar kar dekh raha tha-
(Jari hay ………………. Baqi kal.……)
|
|
|
Post by Tanweer on Jun 14, 2007 10:45:24 GMT 5
(Qist # 14)
Os nay maa say kaha- “bawa hazrat badshah nay apni zid poori ki- ani jan ka sadaqah diya aur aab beemar ho gaey hain- ham ghusal-e-sehat k baad din raat ibaadat karien gay- en ki salamati k liey duaien mangtay rahien gay-“
Wo aik gehri sanss lay kar bola- “bawa hazoor apni ibaadat say’ riyazat say aur eeman ki pukhtagi say hamien naee zindagi day rahay hain aur ……”
Os nay Akhtari par nazar dali phir kaha- “es larki nay apni zahanat aur tadbeer say hamien ye naee zindagi di hay- ham es k maqrooz ho gaey hain-“
Shehzaday ki ye baat os k dil main utar rahi thi- es say bari baat aur kiya ho sakti thi? Samarqand say Aagaray tak fatah mandi hasil karnay wala shehzada khud ko os ka maqrooz keh rahah tha- qarz k hawalay say he sahi….. es say mansoob ho raha tha-
Maham begam nay kaha- “bay^shak- aik maa bhi es ki maqrooz hay- ham esay inaam-o-ikraam say nawazien gay-“
Wo bola aap apni marzi say inaamaat day kar apna farz adaa karien gi- lekin ham….”
Dil dhak say reh kar jaisay apni dharkanien bhool gaya- shehzada koi bohat bari baat kehnay wala tha- “ya Khuda! Sahib-e-alam mujhay farash say utha kar arsh par phonchanay ki baat na karien- sirf dil say laganay ki baat karien-“
Maham begam nay betay say poocha- “jan-e-madar! tom es ka qarz kis tarah adaa karna chahtay ho?”
“Ham es ki teen khawhishaat poori karien gay-“
Phir os nay Akhtari ko dekhtay hovay kaha- “apni pehli khawhish biyaan karo….”
Haeey……! mun ki muradien poori karnay wali kaisi qabooliyat ki ghari aaee thi……! Wo mussarat say ziyadah khouf k baes andar he andar kanpnay lagi- chohtay moun say bari baat kehnay k liey baray hoslay ki zaroorat hoti hay aur es k andar hosla nahi tha-
Shehzaday nay kaha- “bolo …. Tomhari pehli khawhish kiya hay?”
Wo larazti hovi aawaz main boli- “jan ki amaan paoun to kuch arz karoun-“
On dono nay taeed main sar hila kar esay dekha’ wo dheemi magar larazti hovi awaaz main boli- meri teen nahi’ sirf aik khawhish hay aur aisee khawhish hay k…….”
Wo aagay boltay boltay ruk gaee- kaisay kahey? Kahan say hosla laey? Maham begam nay kaha- “baat poori karo-“
Wo phir larkharatay lehjay main boli- “bas aik aisee khawhish hay k poori hotay he main mar jaoun gi-“
Maa betay nay chonk kar aik doosray ko dekha- Humayun nay poocha- “aisee kiya khawhish hay k jis ki takmeel par tom mar jao gi?”
Os ka sar aisay jhuka hova tha’ jaisay garden par pahaar rakh diay gaya ho- Humayun nay dekha’ os k koray kanwaray hont kanp rahay the- os nay kaha- “foran bolo- hamaray tajas^sus ko na bharkao-“
Wo aikdam say jhuk kar Maham begam k qadmo main giri-khouf say laraztay hovay’ rotay hovay boli- “main ………… main sirf aik raat chahti hon-“
Maham begam nay herat say poocha- “aik raat……….?”
Wo sar jhukaey dono haath jor kar boli- “sahib-e-alam k sa…….saath….”
Maa betay nay chonk kar aik doosray ko dekha- os nay apni oqaat say bari khawhish zahir ki thi- Maham begam nay osay ghussay say dekhtay hovay aik zor ki thokar mari- wo peechay ki taraf ulat gaee- “bad^bakht! Do kori ki khadimah! Mahal main paoun rakhnay ka mouqa mila hay to apni oqaat bhool gaee hay?”
Os nay phir thokar mari- Humayun nay haath utha kar kaha- “aakam madar ! aap ko hamari jan ki qasam……. Ruk jaien…”
Wo peechay hat kar boli- “esay saza milni chahiey- ye tomhien panay ki baat kar rahi hay- ham esay khonkhaar kuton k aagay daal dain gay-“
Wo palang say utar kar khara ho gaya- aajzi say bola- “aap thanday dil say ghor farmaien- es nay apna muda^aa biyaan nahi kiya tha- ham nay es ki khawhish poochi thi- ye bolnay say katra rahi thi- ham nay esay bolnay par majboor kiya tha-“
Maham begam peechay hat kar osay sochti hovi nazron say dekhnay lagi- Humayun nay kaha- hamari duniya main kitnay he kamzor hain jo hamari tarah shahzor ban jana chahtay hain- kitnay he ghareeb hain ‘ jo badshah ban^nay k khawab dekhtay rehtay hain lekin hamaray samnay moun nahi khol saktay- agar ham enhay bolnay ki ijazat dain to wo isi tarah bolien gay’ jis tarah abhi es larki nay bolnay ki jur^rat ki hay-“
“Ye ghalati ham nay nahi… tom nay ki hay- tom nay he es ki khawhish poochi thi-“
“Bay^shak- ham nay ghalati ki- aap hamien saza dain- es wafadar larki say bad^zan na hon-“
maa nay betay ko tatolti hovi nazro say dekha- phir poocha- “sach batao … tomharay dil main kiya hay?” (Jari hay ………………. Baqi kal.……)
|
|
|
Post by Sukhanwar on Jun 15, 2007 16:34:34 GMT 5
tanweer bhai aap jis muhabat aur mehnat k saath yeh qistain mukamal kar rahy hain woh qabil e sataaish hy yeh tareekhi kahani bhi dilchasp hy aur aap ny is main jis saadgi aur salaasat k saath waqiaat ko aagay barhaya woh bhi bohat umda hy thanx razi
|
|
|
Post by Tanweer on Jun 16, 2007 11:22:25 GMT 5
tanweer bhai aap jis muhabat aur mehnat k saath yeh qistain mukamal kar rahy hain woh qabil e sataaish hy yeh tareekhi kahani bhi dilchasp hy aur aap ny is main jis saadgi aur salaasat k saath waqiaat ko aagay barhaya woh bhi bohat umda hy thanx razi Razi Bhaee! Mashkoor hon aapka k aap bhi esay itni he dilchaspi say parh rahay hain. Tanweer
|
|
|
Post by Tanweer on Jun 16, 2007 11:26:55 GMT 5
(Qist # 15)
Ye ham mughal^on ki riwayat rahi hay k jab waadah kartay hain to zaban say nahi phirtay- ham maa betay ye faislah baad main karien gay k kis tarah apnay waaday ka bharam rakha jaey ga? Fil^haal es ki dil^joi laazmi hay-“
“ham mantay hain’ esay tomhari jan aziz hay- ye har haal main tomhari salamati chahti hay- tomhari behtarin muhafiz aur nigraan ban kar yahan reh sakti hay-“
Wo farash say uth kar khari ho gaee thi- haath bandhay hovay the’ sar jhukha hova tha- Maham begam nay aik khawaja^sara ko talab kiya- phir os say kaha- “Akhtari ka rutba buland kiya ja raha hay- esay Gul Afshan main rehaishi kamrah diya jaey- aaj say ye kaneezon k ranga rang malboosaat main raha karay gi-“
Phir os nay Akhtari say kaha- “tom ja sakti ho-”
Wo sar jhukaey khawaja^sara k saath wahan say chali gaee- maa nay betay ko gheri sanjeedgi say dekha- phir kaha- “ham na nu maah tak tomhien apnay shikam main rakha’ apna doodh pilaya- ham tomhien bachpan say aik kitaab ki tarah parhtay aur hifz kartay aa rahay hain- tomharay mizaaj ko aur tomhari nigaahon ko khoob samjhtay hain-“ Wo betay k samnay idhar say odhar jatay hovi boli- “wo aab tak aik bohat he adna khadimah thi- agar esay tomhari khilwat main bheja jata to hamari peeth peechay tarah tarah ki batien banee jatien- hamari subki hoti- lehaza pehlay es ka rutbah buland kiya gaya hay- aaj k baad wo khadimah nahi- es haram ki kaneez kehlaey gi-“
Wo ruk kar betay ko dekhtay hovay boli- “kuch arsey baad ham esay apni khaas kaneez banaien gay……. Samajh rahey ho na……? kam az kam wo taat ka pewand to na lagay-“
Ye keh kar wo wahan say chali gaee- os k janay k baad bhi Humayun khulay hovay darwazay ko dekhta raha aur maa k baray main sochta raha- wo os ki aik kamzori ko khoob samjhta the- wo kamzori ye thi k osay potay ki shaded khawahish thi- wo chahti thi k Humayun ki aik he sahi lekin olaad-e-nareena ho takay betay k baad wo potay ko takhat-o-taaj ka waris bana sakay-
Humayun ki aik biwi Begaa begam thi- os nay aik beti ko janam diya tha- Maham begam nay takhat-o-taaj ka jan^nasheen pota paida karanay k liey betay ki teesri aur chothi shaadi bhi karwaee thi- lekin en main say koi mar gaee- koi betiyaan he paida karti reh gaee-
Aab Maham begam ki ye halat thi k jahan bhi aalaa khandaan ki koi haseen aur sehat^mand shehzadi dekhti to osay betay k liye muntakhib kar leti- es khiyaal say osay bahoo bana leti k wo beta paida karay gi- agar nahi karay gi to baad main os ki chuhti kar di jaey gi-
Mughaliya dor main Babar say lay kar Aurangzeb Alamgir tak jitney bhi badshah guzray hain’ wo sab namaz rozay k paband rahay- deeni ehkamaat par sakhti say amal kartay rahay (illah Jalal-Ud-Din Akbar)- onho nay eyaashiyaan bhi kien- sharaab-o-shabaab main mast bhi rahay- aakhir insaan the’ raat ko behaktay the’ din ko sambhal jatay the-
Maham begam nay kabhi ye nahi chaha k Humayun kisi kaneez say na^jaaiz taluqaat qaaem karay- en maa betay ko jab bhi koi pasand aaee to os say nikaah pharwaya- pehlay os na^mehram ko mehram banaya’ phir os say azdawaji rishta qaeem kiya- yehi wajah thi k Akhtari ko os waqat wahan say taal diya gaya tha-
Humayun ko yaqeen tha’ walidah majidah apni kamzori k mutabiq aik pota hasil karnay k liey Akhtari ko bhi aazmaaien gi- agey chal kar os larki say nikaah zaroor parwahien gi-
(Jari hay ………………. Baqi kal.……)
|
|
|
Post by Tanweer on Jun 17, 2007 10:48:25 GMT 5
(Qist # 16)
Hazrat badshah Babar ki tabiyat roz-ba-roz bigarti ja rahi thi- es k bar^aks Humayun raftah raftah sehat^yaab ho gaya tha- baap k liey tashweesh main mubtila tha- aatibaa aur umraa ka ijlaas talab kar k poochta tha- “aakhir kiya baat hay? Bawa hazoor par aap main say kisi ki dawa asar kioun nahi kar rahi hay?”
Es sawal k mukhtalif jawabaat the- en main say aik nay kaha- “ham nay badshah salamat ko jan ka sadaqah denay say manaa kiya tha- lekin hazrat badshah apnay faislay par attal rahay- aap k liey en ka sadaqah aur on ki duaien qabool ho rahi hain-“
Aik tabeeb nay arz kiya- “kuch arsa pehlay Ibrahim Lodhi ki walidah nay badshah salamat k k^hanay main zehar milaya tha- jisay k^hanay k baad ye qareeb-ul-marg ho gaey the- ham nay apanay bharpoor tajarbaat say kaam lay kar enhay kisi tarah bacha liya tha-“
Humayun nay kaha- “purani batien kioun duhraee ja rahi hain ?” Aik mo^amar tabeeb nay kaha- “ham tamam aatibaa ki mutefiqah raey hay k os zehar ka asar reh gaya hay- ye kehna chahiey’ es arsay main os zehar nay andar say apni jarien mazboot kar li hain-“
Aik aur nay kaha- “ham sab es zehar ka tor karnay k liey apni si koshishien kar rahay hain- Allah Tallah ko manzoor hova to ham zaroor kaamyaab rahien gay-“
Babar nay betay ko bula kar kaha- “hamari fikar na karo- hamaray ilaaj k liey batheray aatibaa mojood hain- ye wafa^daar umraa es buray waqat main hamaray saath hain- Mashallah – tom sehat^yaab ho gaey ho-ham hukam detay hain’ apni foj k saath yahan say kooch karo aur Kalinjar ka qillaa taskheer kar k hamien jald he khush^khabri sunao-“
Aagaray ki foji chahwani main ye khabar phonchaee gaee k doosri subah lashkar ko tiyaar rehna chahiey- Kalinjar ka rukh kiya jaey ga- Humayun apni khawab^gaah main aaya to wahan Akhtari ko dekh kar thitak gaya- khush ho kar bola- “yahan kaisay chali aaien? Kisi khawaja^sara nay nahi roka?”
Os ka sar jhuka hova tha- wo nazrien nahi mila rahi thi- dheemi si aawaz main boli- “bari mushkalon say ch^hup ch^hpa kar aaee hon-“
Os nay aagay barhtay hovay muskura kar poocha- “kioun aaee ho?”
“wo- wo …. Mera dil bohat ghabra raha tha- main nay suna hay’ aap apnay lashkar k saath jang k liey ja rahay hain?”
ye badshahon aur shehzadon ka muqadar hay- hamari aadhi say ziyadah zindagi medaan-e-jang main guzarti hay-”
Malika begam wafa^dari k silsalay main hamien inaamaat day rahi hain- yahan say bees kos k faslay par jo zameenien hain’ wo hamaray naam ki ja rahi hain- onho nay naqdi aur zewaraat bhi diey hain-“
Wo bola- “hamien maloom hay-“
Wo apni orhni k paloo say kheltay hovay boli- “main… main aap k inaam ki muntazir hon-“
Hamari aakam madar tomhien inaam-o-ikram say nawaz rahi hain- tomhara martabah buland karti ja rahi hain- aaiendah jab wo munasib samjhien gi’ hamara nikah pharwa dien gi-“
Main aapki mankoha begam ban kar khush fehmi main mubtila nahi rehna chahti- main ghareeb khandaan say taaluq rakhti hon- hamara koi shajrah nahi hay- aap ki doosri begmaat hasab nasab wali hain- aalaa khandaan say taaluq rakhti hain- wo sab mujhay hamesha ehsaas-e-kamtari main mubtila karti rahien gi-“
Hamari aakam madar aik potay k liey tarap rahi hain- agar shaadi k baad tom nay betay ko janam diya to samjho’ tamam begmaat say bar^tar raho gi- tomharay aagay sab hi kamtar ho jaien gi-“
Wo inkaar main sar hila kar boli- “meray naseeb main shahi khandaan nahi hay- main jewtash widya par yaqeen rakhti hon- aik maha giyaani jewtashi nay meri janam kundali aur haath ki rekhaien dekhi hain-“
Hamien bhi ilm-e-najoom say raghbat hay- tomhara jewtashi kiya kehta hay?”
Onho nay pesh^goi ki hay k main apni zindagi main kisi ki muhtaaj nahi rahon gi- meray pas achi khaasi dolat ho gi- lekin masaail say guzarti rahon gi- meray buray waqat main mera majaazi khuda saath nahi rahay ga- es saath sirf aik raat ka ho ga- main sirf aik raat ki malika ban paaon gi aur os k betay ko janam doon gi-“
(Jari hay ………………. Baqi kal.……)
|
|