|
Post by Atif Mirza on Feb 18, 2008 21:24:03 GMT 5
Meray Piyaray Sukhanwar Dosto! Salam-e-Adab!
"Kehnay ko bahut kuchh hai magar kis say kahaiN hum"
Kehna bahut kuchh chahta hooN laikin aap logoN ka waqt barbaad nahiN karooN ga.
ChaNd naguzeer wajoohaat ki bina per maiN aik taweel arsay tak hazir nahiN ho sakooN ga. Aur yeh taweel arsa shayad aap logoN say mustaqil judaee ka sabab bhi bunn sakta hai.
September 2007 say aaj 18 February 2008 tak maiN nay bahut achha waqt guzaara.
ChaNd bud-mazgiaN bhi huweeN, woh shayad meri taraf say ghalatiaN sar zad huweeN. Unn ki saza aap maiN say kuchh log meray Karma ko minus yaani manfi ki taraf bhaij kar bhi detay rahay, mujhay uss say bhi khushi hoti rahi keh koi tau hai jo mujh per itni yawajjah deta raha hai. Uss banday nay meray liay apnay qeemti waqt say chaNd seconds nikaalay. aur apnay masroof zehn kay chaNd goshoN ko meray liay masroof kia. Mujhay unn say koi shikayat nahiN balkeh maiN unn ka shukriya adaa karna chahta hooN keh unhoN nay apnay dil maiN meray liay buGHz paal kar meray Sawaab maiN izaafaa kia. Meri unn say guzaarish hai keh agar woh saamnay aa kar mujhay bata detay keh meri zaat unhaiN pasand nahiN tau yeh unn ka mujh per ehsaan hota. Ya kum az kum woh mujhay personal message kay thru hi kuchh keh detay. Khair yeh unn ka amal hai, maiN kia keh sakta hooN.
Mujhay bunyaadi taur per iss mehfil maiN jin dostoN nay mutassir kia unn maiN Razi Bhai, Khalid Sahib, Raamish Bhai, Sunita Behn, Kanwal Ji, Aqeel Malik aur Hasib rana shamil haiN. MaiN nay agar in dostoN maiN say kissi ka dil dukhaya ho tau maiN unn say az hudd maazrat karta hooN.
MaiN agar kuch mazaq karta raha hooN tau yeh samajh kar keh sub meray apnay haiN, mera maqsad kissi ki dil aazaari nahiN tha. Meray mazaq say kissi ka dil mela huwa hotau bhi maiN maazrat khwah hooN.
MaiN Razi Sahib say guzaarish karooN ga keh meri member ship del na karaiN, jabb kabhi moqa milay ga maiN hazir ho kar salam kar liya karooN ga.
Akhir maiN sub dostoN kay liay dheroN duaaiN, Mujhay apni duaooN maiN taad rakhiay ga.
MaiN unn dostoN ka maiN bahut mamnooN hooN keh jinhoN nay meray post per replies diay aur meri hosla afzaaee ki.
Allah Hafiz.
Khair Andaish (Shubh Chintak)
|
|
|
Post by sunita on Feb 18, 2008 22:47:04 GMT 5
aadaab Atif sahab aap kuch waqt ke liye bazm se door jaa rahe hain, yeh jaan kar achha to nahin laga lekin ham sab ko bazm ke saath saath zindagi ke baaki kaam bhi karne padte hain.aap ki waapasi ka intezaar rahega. aap ne jo mazaaq kiye vo ham sab dost hain to ek doosare se mazaaq karne ka haq rakhte hain lekin, kayii baataiN iss tarah bazm main kehni kisi ko bhi achhi nahin lagti.Theek ussi tarah jaise aap ne sorry shaheen ji ne Brijinder ji ke liye keh diya tha.aamane saamne do dost chaahe vo kisi bhi mazhab ke hoN, vo har tarah ka mazaaq kar sakte hain aur koii bura bhi nahin maanta.Lekin public mein kahi huii kuch baatain galat lagti hain. meri hamesha se aadat rahi hai ki main saamane jo kehna ho keh deti huN taaki sunane vaala kisi aur ki zubaani na sune.meri is aadat se hamaare sab pooraane member waaqif hain.aur koii bura nahin maanta.kyunki mujhe pata hota hai ki main kitni baat kehne ka haq rakhti huN. ab rahi baat so called karma ki, to mujhe to yeh sab bachkaana sa lagta hai ki ek bachha ro raha hai ki usne mera vo khilona le liye mujhe vo chaahiiye.ham agar bazm mein adab ki khaatir aate hain to in baatoN ko tawajo nahin deni chaahiiye.aap achha likhte hain aur ek zimmedaar insaan hain to aisi baatain kyuN. achha chalen isse ham Indian thinking ke hisaab se dekhte hain to vo to aap ke faayde ki baat hai, kyunki India mein kehte hain ki karam kam hoN to insaan ki rooh ya zaat behatri ki taraf jaati hai.usse jannat naseeb hoti hai.to yeh to aap ke faayde ki baat huii na, to aap ghabra kyun rahe hain? chodiiye yeh sab bachakaana baatain aur adab mein hi dil lagaaiiye.mujhe chaahe aap dost samjheN ya badi behn, kyunki main yahan sab ki didi huN, yaani badi behn.aur badi behn hone ke naate main aap ko galat islaah to dungi nahin. aap ko meri baat pasand na aayi ho to muaafi chaahti huN.pasand aa gayi ho to keh deejiiye ki jo sab aap ne yahan kaha vo sirf gussa dikhaane ke liye tha aur aap kahin ja waa nahin rahe. khush rahen.
|
|
|
Post by kanwal on Feb 19, 2008 1:22:17 GMT 5
Mohtaram o mukaram Atif sahiB ,....
Aaj parlour meiN bohat kaam raha jis ki bina pe abhi chand lamhoN pehle hi “Sukhanwar” pe aana hua,…. Thakan se bura haal hai magar aap jaa rahe haiN iss khabar ne mazeed thakaa diya,… Aap yaqeenan aik ache saath rahe humare liye ,… har ranG meiN sab ko hansaate rahe ,…. Lekin aapka kehna hai ke:
ChaNd naguzeer wajoohaat ki bina per maiN aik taweel arsay tak hazir nahiN ho sakooN ga. Aur yeh taweel arsa shayad aap logoN say mustaqil judaee ka sabab bhi bunn sakta hai.
Be shaQ aap apne faisle par Qaym reh sakte haiN, aur haQ rakhte haiN ke jo chaahe wo kar sakeiN ,….. para yahaN kuch baateiN clear karna apna farZ samjhti hooN ,….
,………HumeiN khushi hui ke Sep.2007 se aaj 18 Feb tak aapka bohat acha waqt guzraa, aur humari khahish thi ke aap aage bhi humare sath yuNhi humsafar rehte lekiN wohi baat ke har insaan ki apni apni majbooriyaN hua kartiN haiN ,... aur INSHALLAH umeed karte haiN ke aap doobara phir se aa kar iss mehfil ko sajaayeiN ge, kyuNke zindagi meiN yeh utaar charhao aate rehte haiN,…. Aapki tarah hum bhi guzishta saaloN se iss mehfil meiN active raha karte the par kuch majbooriyoN ne qadam rok liye to march2007 se ab tak aana dushwaar ho gaya,… lekin dekhiye ab phir se Khuda wand e kareem ne mauqa diya hai to sab dostoN ke darmiyaaN haiN aur umeed karte haiN ke aap bhi INSHALLAH mustaqbil meiN apni “chand naguzeer wajoohat” par qaboo paa kar phir se humare darmiyaN phir se muskuraahateiN bakhereiN ge ,….
,………Aap ne arz ki ke aap mazaaq karte haiN to apna samjh kar ,… to bohat hi mohtaram atif jee kehte haiN mazaaq bhi wo hona chahiye jo kisi ki dil azaari ka ba´iss na bane ,… aur yeh bhi zaroori nahiN ke har kisi se aik sa mazaaq kiya jaaye ,…. Guftagoo karne ke behtareen adaaboN meiN se aik yeh bhi hai ke huM saamne waale shakhs ke ikhlaaq o kirdaar, tabiyat aur izzat aur ehtram ko mad e nazR rakh kar guftagoo ya mazaak kareiN ,…
Ab dekhiye na main ramish jee aur didi se bohat free ho kar mazaaQ karti hooN kiyonke main in dono ke mizaaj ko achi taraH jaanti aur samjhti hooN,… mujhe maloom hai ke yeh mera har taraH ka mazaak bardaasht kar sakte haiN aur main inn ka har taraH ka mazaaQ ,…..
Magar humari iss bazM meiN bohat hi mohtaram hastiyaN bhi haiN jaise ke razi jee, rafi jee, tanweer uncle, haamid baqri sahib, waqar sahib, etc yeh wo hastiyaN haiN jin ko main jaanti to hooN aur be shaQ mazaaq bhi karti hooN inn ke ehtraam ko mad e nazar tak,….
“HuM insaan haiN humare liye sab se pehley insaaniyat hai aur insaaniyat kisi rang nassal mazhab ki mohtaaj nahiN jo humare saath acha ho ke chale humeiN bhi waisa hi chalna chahiye aur jo nahiN chale uss se kinaara kashi behtar hai ba nisbat kirdaar kashi ke ,….”
Yeh meri zindagi ka falsafaa hai, aur asool hai aur main iss par mukamal amal kiya karti hooN ,….
Aap ko humari zaat ne mutaasir kiya jis ke liye khaaksaara bohat shukarguzaar hai uss zaat ki jis ne mujh jaisi khaak ko iss Qaabil kiya ke koi iss adnaa si bandi se mutaasir ho sake,… main apne rab ka jitna shukr karooN kam hai ,…….
Aap ne kaha ke aapki ghaltiyoN ki saza basoorat e karma kam kar ke aapko di gayee hai ,... to mere bohat hi mohtaram aur masoom se bhai mujhe to yeh parh kar heart ho rahi hai ke guzishtaa dhaayee saal se huM “Sukhanwar” se munsalik haiN aur humeiN aaj talak kahabr na hui ke aakhir yeh “KARMA” hai kya balaa ,…. Iss BazM meiN kayee toofaan aaye, kayee aandhiyaN chaliN lekin aaj talak na yeh “KARMA” hazrat nazaR aaye aur na pata chal saka ke aakhir inn sahib ki gharz o ghaayat kya hai. Yaqeena aap bohat aQalmand haiN jo chaar mahinoN meiN hi inn hazrat se waaqif ho gaye haiN,…. Bai daad deni pare gi aapko ,…….
Aur aakhri baat Agar humari yeh soch ho na ke loG buGHz diloN meiN rakh kar humare swaab barhaa rahe haiN to mukhlisaana mashwara yeh hota hai ke huM shor machaa kar uss swaab ko raagiyaN na kareiN ,….
Bohat hi mohtarah bhai aapko apni iss behan ki koi baat buri lage to bohat hi modbaana guzaarish hai mu´aaf farmaa dijiye ga ke aapki yeh behan kuch kam aQl waaqe´A hui hai.
Bas main apni nature se majboor hooN ke main sab ki taraH chup nahiN reh sakti,… Jo baat buri lagti hai muN pe kehti hooN ke mujhe yeh pasand nahiN,…. Mujh se jhooti tareef nahiN hoti aur yehi wajaH hai ke aksar nuqsaan uthaati hooN aur auroN ki nazroN meiN buri bhi banti hooN,… bas mera maana hai ke mera bura hona uss acche hone se behtar hai jo sirf peeth peeche hi acha ho ,….
Aatif bhai apna dil mat maila kijiye aur himmat o hausle se apni naguzeer wajoohat par Qaaboo paiye,.. aur phir se hum meiN waise hi ghul mil jaaiye ,… Khuda aapko himmat o ista´qaamat ataa farmaaye,… Ameen ,…. YahaN sab aap ke apne haiN ,….. bas yeh aap par munahsir hai,… aap kuch na samjheiN ge to koi nahiN,… kuch samjheiN ge to aapke sab kuch ….. Izzat deiN ge to be shaQ izzat paayeiN ge,… muhabbat deiN ge to muhabbat paayeiN ge ,…..
|
|
|
Post by kanwal on Feb 19, 2008 1:49:47 GMT 5
Bohat hi mo´azaz Admin & Moderators ,…..
Adaab ,….
Be shaQ huM jaante haiN ke humari zimedaari kayee gunaa barh ke hai,… lekin bad waqt ki sitam zareefi ke humare chahte hue bhi kuch kar nahiN paate ,…. Aur jab karte haiN uss waqt talak itni takheer ho jaati hai ke 70% diloN ki azaari ho jaati hai ,… kaash ke huM zara jald action leiN to kisi ki bhi dil azaari na ho .
JahaN tak main samjhati hooN ke Admin aur Mods ka matlab koi ezaaz nahiN balke aik aisi karri zimedaari hai jiss meiN sab se pehley apni anaa aur nafs ko maarna parta hai ,……..
Main baar haa kehti aayee hooN ke “sukhanwar” humare ghar ki soorat ikhtiyaar kar gaya hai aur gharoN ki baateiN gharoN meiN hi raheiN to bhalaayee hua karti hai,… humeiN jald iqdaam karna chahiye ke koi guest humari inn choti choti larzishoN se mehzooz aur faayeeda na uthaa sake ,… sirf aik jumlaa kehne se kuch nahiN hua karta jumloN ke saath amaL bhi hona chahiye ,…. “Sukhanwar” ke Moderators yaqeenan iss baat ko acchi taraH samjhte haiN bas itnii si guzaarish hai ke ghar ki hifaazat sirf ghar ke sarbaraH ka kaaM nahiN hua karta unn ka bhi hota hai jin ko kuch haqooQ haasil hua karte haiN ,….
Aap sab achhi tarah se jaante haiN ke main be maqsad aur bilaa wajaH nahiN bolaa karti ,… meri har baat ke pas e manzar meiN kuch na kuch zaroor hua karta hai agar koi samjhe to ,………
Aur bolti bhi tab hi hooN jab dekhti hooN ke paani sar se oopar hua chahta hai aur bardaasht se bahir hai ,…..
Lihaaza Aaj main yeh thread close kar rahi hooN kiyonke deleet karna hi koi haL nahiN hai kiyuNke aksar aisi posts jin se dil azaari ho wo deleet ho jaaya kartiN haiN aur baaqi posts meiN sab deewaroN pe sar patakhte nazar aate haiN ,….. aur aane waale samjhte haiN ke “Bai falaaN bechaare ya bechaari ke saath badi hi na insaafi hui” jab ke baat roz e roshan ki taraH saaf hoti hai ke jo jaisa karta hai waisa hi bharta hai, Taali do haath se baja karti hai aik se nahiN,….. kahiN na kahiN ghalti dono freekein ki hua karti hai, ab yeh aur baat hai ke kisi ki 80 % to kisi ki 20.
Behr haal main iss behas ko yahiN khatam kiya chahti hooN aur guzaarish karti hooN ke jahaN bhi jis ki bhi aapko koi aisi post nazR aaye uss ke sath do taraH ka salooK kareiN ,…
1,… Agar kayee Qaari parh chuke haiN aur aik do posts ho chukki haiN to mumalaa sambhaal ke usse close kar deiN otherwise
2,… Aap ke hote hote koi aisi post hui hai jis pe view 1 ya 2 haiN to foran deleet kar deiN magar deleet karne se pehley Admin ko uski copy bhijwaa deiN ….
koi baat kisi ko garaaN guzri ho to maa´zrat chahti hooN ,...
|
|
|
Post by Sukhanwar on Feb 22, 2008 23:50:34 GMT 5
main aatif sahib ki yeh post tehreer kiay janay k 2 roz baad parh saka aur is doraan is par kuch jawabaat bhi aa chukay thay 18 feb ko election k roz yeh tehreer post ki gaai aur us roz zaahir hay main to apni zimadaarion k hawalay sy masroof tha k un dinon to 2 roz k liay ghar jana bhi mumkin na raha is saari post k mutaalay jawabaat daykhnay aur saari soorat e haal ka jaaiza laynay k liay main nay mazeed 2 roz intzaar kia mujhay hayrat hui k baaz cheezain yahan ghair mamooli nazar aa rahi theen aik adabi forum par aysa nahi hona chaahiay tha aatif bhai aap ki janib sy alwidaaiay par mujhy hayrat hui magar aap ki kuch baatain mujhay jaaiz bhi nazar aain sunita ji ka yeh kehna bhi drust hy k mazaaq zaroor ho magar kisi k aqeeday ko thays nahi pohanchna chaahiay yeh aik haqeeqat h aatif sahib nay aik sargarm rukn ki haysiat say is forum k husn main izaafa kia woh apni shagufta tabiat k hawalay sy yahan chayrr chaar b kartay rahay jo naagwar bhi guzri kuch doston ko magar main jaanta hoon k aam zindagi main wo aysay hi chayrr chaar kartay hain aur is ka maqsad yaqeenan kisi ki dilazaari nahi hota aik shair ki haysiat sy bhi main un ka ehtram karta hoon aik dost k taur par bhi wo mujhay azeez hain aur sukhanwar forum k member k taur par b main un ki izat usi tara karta hoon jaysa k tamam members ki kanwal nay forum main honay wali bad mazgion ko mad e nazar rakhta huay is thread ko lock kar dia tha main us ka shukar guzar hoon k us nay aysa kia ..us ka yeh kehna drust hy k hamaray ikhtlafaat doosron tak nahi pohanchna chaahian aur baat mazeed nahi barhni chaahiay aatif sahib krma walay jis masalay ka zikr kia main nay is baat ko khaas taur par monitor kia aur un ki shikayat mujhy drust nazar aai....main nay khud mehsoos kia k baaz members aatif sahib ka karma musalsal minus kar rahay thay sunita behn ka yeh kehna to drust hy k aysi baaton ki koi ehmiat nahi hoti magar aik hi shakhs ko agar target kr lia jaay to yaqeenan us ka wohi rad e amal hota hy jo aatif sahib ka hua meri members sy guzarish hy k wo kisi sochay samjhay mansoobay k tehat kisi ko nishana na banaain.. humain aysi baatain zaib nahi daytin adab par baat kijiay aik doosray ko neecha dikhanay ki koshish na kijiay .. hum yahan muhabatain taqseemkarnay aatay hain hamaray kisi bhi amal sy kisi ki dil azaari nahi honi chaahiay mujhay yaqeen hy aatif sahib hum sy juda nahi hon gay sab mil jul kar rahain gy aatif sahib aap wapis aa jaain sab theek ho jaay ga aur agar koi aap ko jaan boojh kar neecha dikhana chaahta hy to bhi fikr na kijiay main nay is thread k zariay sab ko bata dia hy k asal main kia ho raha tha aur ab mujhy yaqeen hay aysa nahi ho ga main is thread ko yahin dobara lock kar k is behas ko khatm kar raha hoon shukria
|
|