Lamha Lamha nazar aata hai kabhi ik ik saal
Kabhi lamhe ki tarah saal guzar jaata hai
Kabhi narmi, kabhi sakhti, kabhi ujlat, kabhi der
Waqt E dost behr haal guzar jaata hai
Sach kaha hai shair ne ,.....
Har baras ki tarah yeh baras bhi palak jhapak te hue
guzar gaya hai, bohat kuch khoya hai, bohat kuch paaya
hai iss palak jhapakne meiN ,....
kahiN khushyoN ki qilqaariyaN phaili thiN to wahaN aansuwoN ka selaab baha aur kahiN mayoosi ki kaali raat thi to wahaN umeed ki sehar namoodaar hui.
Bas issi ka naaM to zindagi hai, aur sach kaheiN to zindagi meiN
yeh dukh sukh ke mausam na hote to zindagi veeraaN veeraaN lagti aur har soo maut hi maut phail jaati, yeh khushyoN ki chaashni aur aansuwoN ke namak ka naaM hi to asl zindagi hai, haaN yeh aur baat hai k iss meiN chaashni kam aur namak ziyada hai, shayed iss liye ke kahiN sugar na ho jaaye ,....
namkeen disheiN chahe jitni bhi hoN khaayee jaati haiN, par sweet dish bas aik hi hua karti hai ,... hai na? ,....
Issi ke paish e nazR yeh thread shuru kar rahi hooN ke aap sab
apni apni zindagi ki dishoN ko sukhanwar ke iss dastarkhwaN meiN humare sath share kijiye, .... aik chota sa jaaiza ke aap ne
kya khoeya, kya paaya, aur iss naye saal kaun kaun si umeedeiN
bar aane ke amkaan haiN.
Meri dua hai ke saal e 2008 sab ke liye beshumaar barkatoNN, rehmatoN ki barkha ban ke barse. Khuda wand e kareem hum
se raazi rahe aur humeiN taufeeQ de ke huM iss saal insaan
ban ne ke ehal ho sakeiN.
Naye saal ki kaNwal ki tarf se aap sab ko bohat bohat Mubarak baad, aur umeed karti hooN ke aap iss dastarkhwaN ko mazeed
khubsoorat banaane meiN meri help kareiN ge.
Yeh meri umr mere maah o saal de us ko
Mere Khuda mire dukh se nikaal de us ko
Wo jis ka harf dua roshni hai mere liye
Main bujh bhi jaoN to maula ujaal de usko
Yeh tere khat tiri khushboo yeh khaab o khiyaal
Mataa e jaaN haiN tere qaul aur qasm ki taraH
Guzishta saal unheiN maine gin k rakha tha
Kisi ghareeb ki jodi hui raqm ki taraH
Aik Khushboo ki tarH kucha e roz o shab se
Jo dabe paaoN guzar jaaye woh saal achha hai
Kuch khushyaN kuch aansoo de kar taal gaya
Jeevan ka ik aur sunehra saal gaya
Gaye mausam meiN jo khilte the gulaaboN ki taraH
Dil pe utre ge wohi khaab azaaboN ki taraH
Kaun jaane k naye saal meiN to kis ko parhe
Tera mayaar badalta hai nisaaboN ki taraH
Nayaa saal aaya naye gham mileiN ge
sitamgar bohat, mehrbaaN kam mileiN ge
Yeh tere waaste khushyoN ka nagar ho
Kya khoob ho har roz teri eid agar ho
Har raat musrat ke naye geet sunaaye
lamhaat peroN pe bhi shabnam ka samar ho