youNhi iss ishq maeN itna gawara kar lia jaey
kissi pichli mohabbat ko dobara kar lia jaey
shajar ki tehnioN kay pass Anay say zara pehlay
dua ki chaoN main kuch pal guzara kar lia jaey
hamara mas-ala hai mashwaray say bohot Agay
kissi din ehtiatan istekhaara kar lia jaey
mera maqsad yahaN rukna naheN bus itna socha hai
safar say payshtar uss ka nazara kar lia jaey
hawalay kar kay apna jism ik din taiz lehroN kay
phir uss k baad dariya say kinara kar lia jaey
nadeem iss shehr main manoos galiaN bhi bohot si haeN
aur ab Aey haeN to in ka nazara kar lia jaey