chand roshan hai to bus shab ki aziyyat tak hai
janta hooN kay tera saath zaroorat tak hai
aik kirdar kahani kay liey maeN bhi hooN
aur sehra bhi meri Akhri hijrat tak hai
tu naheN hota agar kis nay yahaaN rehna tha
dost yeh ghar bhi faqat tayri sakoonat tak hai
intehaa koi to ho tayri taraf say janaN
muntazir tayra koi shakhs qayamat tak hai
apni tanhai say puchooN ga agar puch saka
kia ye sach hai her ik dost sahoolat tak hai
mar gaey log yahaaN saaray magar ab bhi nadeem
koi zindah hai to bus uski mohabbat tak hai